sa cida sulcinta in curtzu. Dae su 20 a su 26 de Mese de Argiolas
Lunis est arribada una nova bona po is amantiosos de su Blues: a pustis de is ùrtimas dispositziones emanadas dae sa RAS in matèria de cuntenimentu de sa pandemia de covid-19 s’at s’assòtziu Progetto Evoluzione dae su a su de austu at a cuncordare un’editzione unu pagu diversa de su Narcao Blues. Infatis medas artistas sardos ant a sonare sa mùsica insoro in is sitos archeològicos e paesagìsticos prus importantes de su territròriu sulcitanu e s’at a fàghere unu DVD chi a iscopu promotzionale chi at a èssere mandadu siat a is sotziedades de booking siat a is festival musicales prus importantes de s’Europa. Duncas mancai no nci potzat èssere su pùbblicu s’isfortzu de Progetto Evolutzione depit èssere apretziatu a abantadu proite chi circat de promòvere siat is artistas isulanos siat su logu nostru.
Martis s’est scìpidu chi in sa RWM de Domus Noas ant a èssere 80 is operàios interinales chi ant a abarrare sena de traballu e a custos tocat a assungere àteros 90 in cassa integratzione. S’amministradore de s’istabilimentu Fabio Sgarzi at comunicadu chi s’87% de is òrdines non si podet prodùsere pro mori de is restritziones detzisas de su Guvernu in is cunfrontus de s’Aràbia Saudita e su restu sunt òrdines chi arribant dae s’èsteru. Nc’est puru su perìgulu de sa tancadura totale a incumentzare de su 2021 si no ant a arribare àteras cummissas mancai su Ministeru de sa Defensa apat decraradu chi su de Domus Noas est un’asset stratègicu natzionale. Sa mobilitatzione est incumentzada sùbitu e eus a biere a comente at a andare sa cosa.
Mèrcuris: un’àtera nova bona pro su Sulcis. In Roma, a pustis de meses de rinvios e de arresonos, s’Enel e sa Sider Alloys ant firmadu s’acòrdiu pro su prètziu de s’energia. Duncas custu acòrdiu at a permìtere (o assumancus aici isperant totus) a sa multinatzionale isvìtzera de istabilire su pianu industriale e isblocare 150 miliones de èuros de investimentos pro torrare a fòghere partire su Smelter. Su Mise s’est impegnadu a cunvocare a lestru un’àteru atòbiu pro definere is pròssimos obietivos pro industriale pro assigurare sa partentza. In su mentris sindacados si sunt cunfrontados cun su presidente de sa Regione Solinas dimandende un’interventu in su Minesteru de su Traballu in contu de is ammortizadores sotziales chi iscadint in mese de ladàmine.
Giòbia, a pustis de 12 annos cummissàriamentu, su Comunu de Igrèsias est intradu mere de sa ZIR de Sa Stoja. Su sìndigu Mauro Usai at nadu chi s’Amministratzione sua s’at a impegnare pro partecipare a is bandos regionales e europeos pro potetnziare totus is infrastruturas (rete elètrica, àcua, fibra òtica, lughes…) a manera is 40 siendas chi operativas potzant traballare mellus e chi nde potzant arribare àteras.
Cenàbara una bella crica de piciocheddos, sardos e “contintales”, ant dedicadu su merie a allichirire sa pineta de Porto Pino. In totu ant regortu e seberadu prus de 20 bustones de àliga lassada dae sa gente caddotza. A issos su ringratziamentu de s’Amministratzione Comunale e s’ispera chi in medas sigant custu bellu esèmpiu de sensu de apartèntzia e de bona educatzione.
Is ufìtzios postales de Tratalias, Nuxis e Piscinas sighint a abarrare abertos sceti tres bortas a sa cida comente in su periodu de su lock-down cosa chi no acuntessit invècias in is comunos de acanta chi funt uguales o prus minores pro su chi pertocat su nùmeru de residentes. Duncas cenàbara is sìndigos, de chi no ant otentu rispostas craras de sa dirigentza regionale, ant mandadu una lìtera a sa dirigentza natzionale de Poste Italiane, a su Ministeru de s’Isvilupu Econòmicu e fintzas a su Prefetu de Casteddu chescende-sì de si sa situatzione. In sa lìtera insoru ant arregordadu chi Poste Italiane in d-una mega convention fata in su mese de ladàmine 2019 iat promìtidu agiudu e presèntzia in is entes locales prus piticheddos e chi su servìtziu insoru est fondamentale pro s’erogatzione de servìtzios de tipu finantziàriu pro is residentes chi sunt in parte manna antzianos sena de sa possibilidade de andare in àteras biddas.
Domìniga, sende chi su tempus fiat bonu meda e sulada bentu de sole, sunt prus de 50 is algerinos chi sunt arribados in su Sulcis. 19 ddos firmados, àteros 8 deretos a Porto Pino, un’àteru tanti fiant impunnendi a pee conca a S.Anna, 20 ddos at firmados sa Guàrdia de Finantza in mesu de Mare. Comente dònnia borta nde-ddos ant pinnigados e lòmpidos a su tzentru de collidura de Muristenis aundi ant a fàghere is duas chidas de corantena e in su mentris ant a incumentzare is protzeduras de identificatzione e de esplusione.
Roberto Pinna
