Sa cida sulcitana in curtzu. Dae su 15 a su 21 de làmpadas
Lunis est essida sa nova chi sa Regione, gràtzias a s’interventu de s’assessore a is traballos pùbblicos Roberto Frongia, at postu 300mila èuros pro fàghere unu collegamentu intr'e sa SP 83 e is parchègios de sa pràgia de Funtamare. Custu dinari at a permìtere a su comunu de Gonnesa assigurare a s’atzèssu a una de is pràgias prus abitadas de totu su territòriu e rapresentant sceti una parte de su progetu prus mannu chi prevedit de torrare a fàghere de bellu e nou su ponte chi nd’est arrutu su 2 de abrile passadu.
In Carbònia Carla Cannas est intrada in consìliu comunale a su postu de su dimissionàriu Elio Loi e at decraradu chi passat a s’opositzione, duncas sa magiorantza sighit a tènnere sceti unu votu in prus de s’opositzione. A cantu parit ddoi at giai una motzione de isfidùcia aprontada de Michele Stivaletta. Imoi su “problema” est cussu de agatare is firmas chi serbint pro dda presentare e nde serbint assumancus 10. S’idea de una parte de s’opositizione est cussa de provare a nde “sciusciare” su sìndigu pro torrare a votare custu atòngiu chi benit, ma est berus puru chi s’àtera parta de s’opositizione de siguru no est pronta pro nudda a fàghere campagna eletorale (siguramente is partidos de tzentru-manca chi ant abertu una debata pùbblica a corpos de decraratziones). Duncas est capassu chi custa motzione non bengat mancu presentada.
Sabùdu passadu 5 migrantes algerinos sunt isbarcados sàbudu in su polìgonu de Teulada e comente semper is Carabineris nde-ddos ant pinnigados a lòmpidos a su tzentru de collidura de Muristenis pro incarrerare is protzeduras de espulsione. Martis s’est scìpidu ca una de custas personas est risurtada positiva a su tampone de su coronavirus e dd’ant posta in corantena e si agatat asuta de controllu sanitàriu istrintu totus su personale chi est intradu in contatu. A comente est essida sa nova, a dolu mannu, si sunt lìigidos scimpròrios mannos in is social network. Eis a perdonare a chini iscriet custas rubrica, ma sa dimanda nascit sola: si in casu agatant unu turista lombardu o tedescu – ca sunt arribende in s’Isula – positivu sa reatzioni iat a èssere uguale? Fortzis in antis de si pònnere a murigare in is tastieras de is telefoneddos est mellus a alluere su ciorbeddu.
Custu acabu de cida ant fatu una sèrie de eventos in su Sulcis meda interessantis pro sa promotzione de s’archeoastronomia: infatis a pustis de sa bìsita fata a ora de iscurigare is espertos de su Planetario de s’Unione Sarda ant ispiegadu is costellatziones in sitos de Antas, de Pani Lòriga e de su Casteddu de Àcua Frida e is bisitadores (pagos e contados pro mori de is normas anticovid) ant pòtziu osservare is astros a telescòpiu. In prus tocat a signalare ca in d-unas cantu sitos de su Sulcis (Seruci, Pani-Lòriga etotu, Sirai e Sant’Antiogu) is traballadores de s’ex ATI-IFRAS ant postu unu istricione cun iscritu: <<si mi lassas a solu mi-ndi sciùsciu>> sende chi su cuntradu insoro iscadit a s’acabu de custu su mese e nc’at su perìgulu mannu chi custos sitos abarrint isbandonados. S’ispera de is amministradores locales e de is traballadores est chi in Casteddu ascurtit custu apellu e chi si agatit una solutzione chi permitat de assigurare siat su traballu siat su gosamentu de custos logos chi contant s’istòria millennària de Sardigna e s’abillèntzia de is antenados nostros.
Sàbudu in Guroneddu, in territòriu de Gonnesa, unu politziotu foras de servìtziu, at agatadu unu pacu mannu prenu de hascisc e at telefonadu prontamente a is collegas de s’anticrìmine. In totu in custu pacu chi teniat sètiu de una valìgia ddoi ant agatadu 35 kilos de droga ispartzida in paneddos de 100 grammos. Sa Politzia est indaghende pro cumprèndere de aundi nde siat arribada.
Est incumentzada s’istade e domìniga su maestrale fiat sulende a forte e, a su sòlitu, gente male intraniada at atacadu fogu. A parte su “clàssicu” de abrusare Sa Pranedda de Nuxis (isturadu cun s’agiudu de un’elicòteru), est partidu unu fogu mannu acanta in sa zona PIP de Su de is Gallus in comunu de Carbònia. Sunt dèpidos intervènnere is elicòteros de Marganai e de Fenosu, is pompieris de Carbònia e is iscuadtas voluntàrios de sa protetzione civile de Carbònia, Bidda Massàrgia, Igrèsias, Gonnesa chi ant postu in siguresa unas cantu animales e ant fatu evacuare una pariga de domos proite chi sa pampa arta fiat acostende tropu.
Aici nc’eus passadu sa de seti cidas de sa fase 2 e pro imoi sa cosa est sighende a andare bene. Arregordeus-si-ndi ca nosi tocat semper a abarrare atentos: est pretzisu a mantènnere su distantziamentu sotziale e a oberare sa mascherina in logus serrados. S’augùriu est semper cussu de abarrare sanos!
a cura di Roberto Pinna
