Sa cida sulcitana in curtzu. Dae su a s’8 a su 14 de làmpadas
Lunis in sa sede regionale de s’AREA de Casteddu su commissàriu regionale at atobiadu unu grupu de rapresentantes istitutzionale, de is assòtzius e de is professiones de su comunu de Carbònia chi est su comunu sardu chi tenit su nùmeru prus mannu de fàbricos de propriedade pùbblica. Is problemas signalados sunt sa mancàntzia de personale chi serbit pro fàghere prus a lestru s’assegnatzione de is domos, sa mancàntzia de manutentzione, e medas portziones de terrenu e de is giassos de is intradas chi ancora oi non si connoscit de chini est sa cumpetèntzia. Su commissàru at promìtidu chi s’at a impegnare a lestru pro agatare solutziones pro potentziare is orgànicos e de nomenare unu dirigente ùnicu pro sa zona de su Sulcis.
Sighint is problemas in sa sanidade sulcitana. Cust’orta però su dissèrtvìtziu pertocat su personale de su CTO: infatis unu rilevadore de is presèntzias, pro mori de unu guastu a su server, non fiat funtzionende dae su 23 de abrile passadu. Duncas a is traballadores de s’ùspidale ddis tocat a carrigarre issos etotu is datos in su server e tenent a arriscu totus is ispetàntzias atzessòrias pro is istraordinàrios e is turnos de a de note. Dae sa diretzione de sa ASSL assigurant ca ant a pagare totu su chi ispetat a is traballadores ma candu at a èssere non si scit.
Mèrcuris in Sant’Antiogu ant presentadu su logo e totu su protocollo de “Sant’Antioco Destinazione Turistica Serena, Sana, Sicura” chi est nàsciu gràtzias a sa collaboratzioni de s’Amministratzione Comunale cun s’espertu de marketing ispagnolu Josep Ejarque e is operadores commertziales. S’iscopu printzipale est cussu de ridùsere su riscu de cuntàgiu pro is turistas e is residentes. Duncas s’ant a cuncordare cartellos cun is normas de respetare, distribudore de disinfetante, botos ispetziales pro regòllere guantos e mascarinas, e gazebos informativos in su tzentru de Sa Idda e in is pràgias prus importantis (Maladroxa, Coe Cuaddus, Cala Longa e Cala Sabone). De siguru custa initziativa est positiva chi andat in sa diretzione de sa siguresa ma iat a èssere cosa prus bene fata si totus is operadores e amministratziones locales de su territòriu si ativessint in custa diretzione.
Giòbia est arribadu su comunicadu de sa Lega Nazionale Dilettanti chi annuntziat chi totus is iscuadras in is campionados de ecellèntzia regionale chi fiant primas in antis de sa serrada sunt promòvidas diretamente in sèrie D. Duncas su Carbònia – chi aiat giai bintu sa Coppa Italia regionale in Aristanis contras a s’Atletico Uri, a pustis de 23 giorronadas teniat 6 puntos in prus de su Castiadas – torrat a pustis de 30 annos in sèrie D.
In is bandos nous pro is traballadores de s’ex ATI-IFRAS non sunt previstos sunt previstos is servìtzios pro is cantieris archeològicos e custu ponit a arriscu medas cantieris e sitos. Infatis in custu momentu sunt 53 is dipendentes chi traballant cun sa Fundatzione de su Camminu de Santa Bràbara e chi curant sa manutentzione de Pani Lòriga (Santadi), is nuraghes de Seruci (Gonnesa) e de Sirai (Carbònia) e unas cantu sitos in Sant’Antiogu. Duncas s’Assessoradu regionale a su Traballu at cunvocadu una riunione cun is sindacados e totus is entes chi ant assurbidu is traballadores (380 in totu). S’ispera est chi est si agatit una solutzione chi non siat sa sòlita “formatzione” sende chi sa parte prus manna de custas personas tenit prus de 50 annos e sunt giai ispetzializados connoschent bene su traballu insoru. In su mentris sighint a protestare is dipendentes de su Sistema Museale de Carbònia chi cuntestant su demansionamentu e sa consighente ismenguadura de s’istipèndiu insoru. De siguru custa novas sunt bonas pro unu territòriu chi assumancus in is fueddos de is amministradores e fintzas de is operadores bollet bìvere de turismu e de cultura.
A bellu a bellu sunt aumentende is collegamentos de is portos e de is aeroportos sardos cun sa Penìsula e est aumentende sa gente chi est arribende in Sardigna. Pruscatotu sunt sardos chi torrant a domu insoru o a bisitare is parentes ma a cantu parit est lompende puru calincunu furisteri in is segundas domos. Aici nc’eus passadu sa de ses cidas de sa fase 2 e pro imoi est andende totu bene e s’ispera est chi sigat aici. Nosi tocat semper a abarrare atentos sighende a mantènnere su distantziamentu sotziale e a oberare sa mascherina in logus serrados. S’augùriu est semper su pròpiu: a abarrare sanos!
Roberto Pinna
