Sa cida sulcitana in curtzu. Dae su 25 a su 31 de maju
Est passada fintzas sa de 4 cidas de sa fase 2 in trancuillidade e duncas e torrende a partire bene totu s’atividade amministrativa de is amministratziones comunale. Pro èsempiu in Sant’Antiogu sunt operativos 6 sartadròrgios pedonales illuminados, chi sunt parte de unu progetu prus mannu de siguresa istradale, in istradones prus trafìcados de su centru urbanu. Is cartellos postos in artu faghent lughe meda a manera chi si bidant dae atesu e “avisint” calincunu automobilista tropu impressidu.
Pretzisos custa cida puru is algerinos sunt isbarcados in su Sulcis. Infatis lunis a chitzi mannu sa Guàrdia de Finantza, at intecetadu in mesu de mare 2 barchitas cun in totu 23 personas (e àteras 3 ddas firmadas sa marineria algerina) e de custas 11 ddas isbarcadas a su portu de Ponti, is àteras in su Portu Canale de Casteddu. Comente sèmper nche-ddos ant lòmpidos a su tzentru de collidura de Muristenis pro is protzeduras de identificadura e de espulsione.
A dolu mannu tocat a sinnilare la dispidida de su grandu archeòlogu Luciano Alba chi at istudiadu in manera funguda su territòriu e is repertos agatados in Igrèsias e est pròpriu gràtzias a issu, istudiosu apassionadu, chi “Sa Ciutari” est essida a foras dae is “Muras e dae s’istòria medievale” pro iscobèrrere totu sa richesa e is testimònias chi si agatant in su sartu .
Giòbia is sìndigos de sa zona su Sulcis si sunt atobiados in su poliambulatòriu de Santu Giuanni Suèrgiu pro resonare in contu de is sòlitas tancaduras. Ormai est 3 annos chi is sìndigos si chesciant pro custas problemàticas e s’ùrtima bella nova est sa suspensione de su servìtziu de diabetologia in custu mese chi intrat in is poliambulatòrios de S.G. Suèrgiu, Narcau, Caleseda e Santadi. E a comenti no essit abastadu custu ant suspèndiu, ridùsidu o trasferidu fintzas su screening territòriale e àteros servìtzios ambulatoriales cun su personales sanitàriu chi no abastat prus e duncas non acudit a chini tenit abisòngiu. Pariat, assumancus a fueddos, chi totu fessit arrisòlvidu, ma s’emergèntzia de su covid-19 at impeuadu sa situatzione ancora de prus. Duncas ancora una borta is sìndigos narant ca no a is tancaduras e torrant a dimandare un’atòbiu a is vèrtices regionales.
Tocat a sinnilare àteras chèscias de is sìndigos, cust’orta sceti de cussos de sa zona de Sulcis de Bàsciu, chi sunt preocupados meda pro is traballos de sa retza de su gas. Infatis in su mese de donniassantu passadu, a pustis de 10 annos de chi si-nde chistionaiat, aiant incumentzadu is traballos pro fàghere custa retza in is comunos de Sant’Anna Arresi, Giba, Masainas, Perdaxus, Piscinas, Narcau e Villaperùciu. Is ditas in subapaltu, assumancus a su chi parit fiant traballende bene e a lestru, ma pro mori de s’emergèntzia COVID-19 ant firmadu is traballos. Imoi ant torradu a incumentzare sceti in Narcau (in sa fratzione de Rio Murtas) ma in is àteros comunos sunt firmos. Is sìndigos ant sinnialadu custu problema giai de su is primos de maju, ma ancora non sunt arribadas rispostas dae sa dita esecutadora (Medea chi apartenit a s’Italgas) chi at lassadu siat is operàios in cassaintegratzione siat is istradas mali aconciadas (ant fatu una ghetada de ciumentu a pitzus de is tàllios candu invècias est previstu chi torrint totu a comente fiat in antis de su cumentzu de is traballos). Pro custu motivu is sìndigos sunt dimandende un’atòbiu a s’assessora regionale a s’indùstria Anita Pili e ant lassadu is istradas sena de arrangiare
Est incurtzende s’istadi e comente dònnia annu gente male intraniada atacat fogu. Duncas cenàbara est dèpidu intervènnere s’elicòteru de sa base de Marganai pro agiudare is iscuadras a terra in sa zona de Is Gannaus in comunu de Carbònia tanti chi est tocadu a fàghere evacuare unas cantu domus proite chi sa pampa e su fumu fiant acostende meda.
Roberto Pinna
