Sa cida sulcitana in curtzu. Dae su 18 a su 24 de maju
Est passada sa de tres cidas de sa fase 2 e a bellu a bellu fintzas in logu nostru si provat a torrare a sa normalidade. A pustis de is polèmicas de cida passada, in dònnia comunu ant torradu a abèrrere totus is butegas e is servìtzios a sa persona. In su mentris chi sa RAS detzidit de abèrrere is aeroportos e is portos pro fàghere bènnere is turistas (pro imoi sa data istabilida est 22 de làmpadas) sunt incumentzende a torrare in atividade is sitos turìsticos de zona e pro su primu de su mese chi intrat ant a èssere totus prontos pro arricere is bisitadores e provare a sarvare unu pagheddu s’istasone turìstica. Dae is albergos, B&B e agriturismos arribat un’allarme: is chi no dd’ant fatu in su periodu peus de s’epidemia, in custas dies ant incumentzadu a iscancellare is prenotatziones pro custa istade e de siguru no est sinniale bonu. Comente no est sinniale bonu su fatu chi pro mori de su COVID-19 sa Sider Alloys e sa GMS srl ant prorogadu pro àteras 5 cidas sa cassaintegratzione ordinària de is traballadores.
Lassende a una parte custos ùrtimos fatos nc’at puru meda sinniales chi arribant dae su territòriu chi ammostrant sa ganas de torrare a incumentzare sa vida de prima.
In is pràgias de Gonnesa ant postu is passarellas de linna e sunt allichidende s’arena cun is machinàrios est ancora si apetat una solutzione, mancai provìsoria, permitat s’atzessu a sa pràgia de Funtamare sende chi su ponte nd’est arrutu a is primos de su mese de abrile passadu.
S’amministratzione comunale de Igrèsias circat de cumbàtere su fenòmenu de s’ispopolamentu boghendi-nde sa TARI: pro tres annos a is residentes nous (is chi sunt arribdos dae su 1 de gennàrgiu 2020) no dd’ant a pagare aici a comente is famìlias cun rèdditu ISEE prus bàsciu de 2.000 èuros e ddoe ant a èssere sentziones progressivas finas a 4.000 èuros e su fundu comunale pro is esentziones at a èssere aumentadu a 400.000 èuros. Is amministradores ant ispiegadu ca totu custu si podet fàere gràtzias a s’atzione de recùperu de s’evasione fiscale chi at portadu dinari meda in is càscias comunales.
In su mentris ammancat ancora un’annu pro is eletziones comunales de Carbònia ma is partidos e is grupos polìticos incumentzant a si mòvere. Sa segreteria de Articolo UNO de Carbònia, cun s’ex consilieri regionale Luca Pizzuto, at fatu sa proposta a is fortzas de su centru-manca pro traballare a unu progetu pro fraigare una coalitzione ampra chi però abarrit atesu de is fortzas de sa dereta. Craramente custu progetu, chi depit punnare a torrare a Carbònia su ruolu de ghia de su territòriu, non si podet fàghere in pagu ora ma est netzessàriu a unu cunfrontu cun is fortzas de su centru-manca, massimamente a su PD, pro incumentzare a individuare temàticas e candidados.
Fintzas s’isbarcu de algerinos, a pustis de unu mese e prus, in su Sulcis est giai-giai sinniale de normalidade. Infatis sàbudu a chitzi mannu sa Guàrdia de Finantza at intercetaddu in mesu de mari una barchita chi fiat impunnendi conca a Sant’Antiogu. In custa barchita ddoi iant 7 personas (6 òmines e 1 fèmmina) e de chi nche-ddos ant isbarcados a su portu de Ponti nche-ddos lòmpidos a su centru de collidura de Muristenis aundi, fatas is 2 cidas de corantena, ant a incarrerare is protzeduras de espulsione.
Abbanoa, su gestore ùnicu de sa retza ìdrica de sa parti prus manna de is comunos sardos, at annuntziadu chi dae cida chi benit torrat a incumentzare a cambiare is contadores bècios de s’àcua in is comunos de Narcau, Caleseda, Perdaxus e Piscinas (sunt prus de 1000 is utèntzias interessadas). S’iscopu de custa initziativa est cussu de otènnere una faturatzione regulare pro is utentes e craramente is operadores de sa sienda ant a èssere postos de totus is dispositivos de siguresa e duncas si pro cambiare unu contadore benit a marolla a intrare a intru de sa domu de s’utente s’at a torrare a programmare s’interventu.
Domìngia ant torradu a tzelebrare sa missa cun su pòpulu. Is postos in is bangos sunt senniados pro respetare sa distàntzia de siguresa e ddoi at s’ òbbligu de abarrare postos de mascherina in sa funtzione, e intamis de si tocare sa manu pro si donare sa paghe abastat sceti una mirada a is bighinus de bangu. E est su predi a passare in mesu de is bangos a donare su Comunione a is fideles. Siguramente est bastante istranu ma custos sunt sinniales bonu chi ammostrat sa ripartèntza.
Aici nc’eus passadu sa de tres cidas de sa Fase 2 ma est pretzisu a abarrare atentos proite chi abastat unu momentu pro perdere su sacrifìtziu chi eus fatu fintzas a imoi. Duncas candu andaus a logos serrados e ddoi at àteras personas depeus oberare sèmper guantos e mascherinas, depeus donare cura a s’igene de is manos e depeus sighire a mantènnere sa distàntzia sotziale. S’augùriu est semper uguale: a abarrare sanos!
a cura di Roberto Pinna
