Sa cida sulcitana in curtzu. Dae su 13 a su 20 de abrile
Su Lunis de Pasca est una die de essidas e de gitas e in is ùrtimos annos singiat s’incumentzu de s’istasone turìstica. Invècis ocannu is atividades de su setore incumentzant a contare is pèrdidas. Giustu pro bos si fàghere un esèmpiu: dònnia annu in is grutas de Santadi, intru personale de su ristorante e guidas, ddoi traballaiant in 20 e invècis ocannu mancu unnu. Ormai is operadores sunt iscrètidos e pentzant chi custa istasone siat pèrdia de su totu. Est siguru chi si sa situatzione generale abarrat aici (conoscèntzias a pitzus de s’ispainadura e de s’isvilupu de sa maladia) si s’ant a deper cambiare cosas meda pro chi su setore de su turismu torrit a partire: si depint pentzare in manera noa is bìsitias in sitos archeològicos e museos, e fintzas is ristorantes ant a dèper smenguare su nùmeru de is postos sena de pigare in cunsideru su fatu chi at a tocare a agatare unu sistema pro sa sanificatzione de is bagnos. Però est berus puru chi custa firmada si podet trasformare in d-una oportunidade de torrare a partire de bellu e nou si is siendas incumentzant a si modernare dae unu puntu de vista tecnològicu. Totus is operadores si depent adatare e a lestru puru, proite chi sinuncas in Sardigna eus a pèrdere totu su chi s’est gualangiadu, cun traballu mannu, in is ùrtimos annos.
Custa cida puru ant sighidu a circare su piciocu de Perdaxus chi ormai est isparèssidu de 3 cidas. Po custu fatu est imputadu un’òmine chi si agatat in su presone de Uda. A su chi at nauin d-una intervista su sìndigu de Perdaxus, chi est puru s’abogau de sa famìlia de su giòvanu, is intercetatziones telefònicas lassant pagu isperàntzias e invitadu a chini scit calincuna cosa, de nàrrere mancai in forma anònima, aundi potzat èssere su corpus pro ddu torrare a sa famìlia.
A bellu a bellu in totus is comunos sunt arribende is mascherinas mandadas dae sa Protetzione Civile. Craramente, sende ca su prètziu est artu meda e sa rechesta est ancora prus manna, no abastant pro totu popolatzione. Duncas is amministratziones locales in sa distributzione sunt sighende custa prioridade: prima andant a su personale comunale chi est prus a cuntatu cun su pùbblicu (assistentes sotziales e politzia municipale), pustis a is gestores de is atividades cummertziales e a ùrtimu a is famìlias chi atendint in domu personas dèbiles.
Sàbudu a mangianu in Carbònia (e fintzas in Cortoghiana), aici a comente est previstu in s’ùrtimu DPCM, ant torradu a fàghere su mercau in pratza de fronte a su mercau cìvicu. Nci fiant sceti is paradas de is chi bendiant alimentos cun sa Protetzione Cìvile chi at cuncordadu unu sistema de transennas pro incanalere is personas a manera de non fàghere avollotos. No est chi is paraderis apant fatu afàrios meda proite chi ddoi at andadu pagu gente, ma assumancus est unu tentativu pro incumentzare a torrare a sa normalidade. In su mentris sighint is operas de sanificatzione de is logos pùbblicos e in s'interis chi acabit su blocu totale in certos comunos sunt torrende a incumentzare is traballos pùbblicos (comente in Santuanni e in Villaperùciu aundi ant incumentzadu a arrangiare is istradas comunales).
Domìnigu un ex polìticu regionale at pubblicadu s’elencu de totus is comunos sardos aundi si sunt registrados casos de positividade a su coronavirus, iscriende ca fiant datos ufitziales sena de mentovare sa fonte sua e chi nci fiant ancora nùmeros de agiornare. In custu elencu est arresurtadu unu casu in Nuxis, fatu chi at pesadu cimbella manna in is bidda de su Sulcis de Bàsciu (aundi ddoi at una RSA chi ospitat antzianos meda) proite ca nemus ddu scidiat. Su fatu est ca custa persona (chi istat bastante bene) in Nuxis est sceti residente e dae bidda ammancat de tempus meda e duncas no nc’est mai stètiu nisciunu perìgulu de cuntàgiu. Duncas si podit cumprèndere chi is datos “ufitziales” tenint in cunsideru su critèriu de sa residèntzia de is personas ma in antis de ispainare novas chi podent causare preocupatziones chi non serbint a nudda fortzis est mellus a si firmare a arrexonare pagu pagu.
Aici nc’est passada sa de ses cidas de corante e de accoru. Gràtzias e sa bona sorte e pruscatotu a s’impegnu de is totus in su rispetu de is normas de noas de distàntzia sotziale, in logu nostru non si sunt registrados casos nous de positividade a su corona virus. Is cuntzillos de chini iscriet custa rubrica sunt semper is uguales: tocat a abarrare in domu, a nche nch’essire sceti si pròpiu si benit a marolla, a arrispetare is règulas de igene e de distàtnzia interpersonale candu andaus a logos serrados. S’augùriu puru est uguale: a abarrare semper sanos!
Roberto Pinna
