Sa cida sulcitana in curtzu. Dae su 5 a su 12 de abrile
Sa de cincu cidas de inserru pro mori de s’epidemia causa dae su SARS-CoV2 fiat incumentzada cun sa nova, pubblicada domìnigu a note in giornales on-line, aundi si naraiat chi su centru territoriale pro gestire is maladios de covid-19 fiat mòvidu in Carbònia. Inùtile a iscriere chi custa nova at postu in allarme totus is sìndigos de su territòriu ma lunis a mangianu est arribada sa precisatzione de sa ATS regionale. Infatis est berus chi esistit unu pianu de emergèntzia, ma custu pianu esistit in dònnia uspidale, e s’at a ativare sceti si in casu sa situatzioni essit impeuada meda (giustu pro cumprèndere, e Deus non bolat, si arribamus a is livellos de sa Lombardia). Duncas su presìdiu de riferimentu territoriale pro su covid-19 est a abarrat su CTO de Igrèsias.
In sa ASSL de su Sulcis Iglesiente est ativa dae su 10 de abrile sa possibilidade de fàghere su tampone sena de nde calare de sa vetura. Infatis bastat chi is personas cunvocadas pro su tampone andint a s’uspidale Santa Brabara e aundi su personale at a prelevare diretamente de sa màchina su campione nasofaringeu ma craramente abarrat aberta sa possibilidade pro sa persona de intrare in su laboratòriu.
Pariant cosa giai fata is trballaos pro su dragàgiu de su canale de Sant’Antiogu ma ancora una borta s’òpera, chi depiat cumentzare su 15 de abrile, s’est firmada. In is dies passadas fiat lòmpida, dae Taranto, sa nave-ponte Argo e fiat giai pronta s’ordinàntzia pro firmare de su totu s’atividade in laguna dae su 15 a su 30 de abrile. Fatu istat ca sa dita chi at bintu s’apaltu at fatu ischire ca ant a serbire àters 10 dies pro aprontare su ponte e duncas su progetu de 700mila èuros postos dae sa Provìncia de su Sud Sardigna sighit a abarrare firmu, cun s’ispera chi assumancus incumentzint a s’acabu de custu mese.
In su mentris custa cida at fatu tempus fiat bellu meda e est torrada a lòmpere gente dae s’Algeria in sa costa de su Sulcis. Su 7 de abrile In Teulada sunt isbarcados 6 personas in Portu Tramatzu. Fiant provende a si-nde andare ma is Carabineris ddos ant firmados e nche-ddos lòmpidos, comente dònnia borta, a su tzentru de collidura de Muristenis pro incarrerare is protzeduras de identificadura e de espulsione.
Cenàbara is ritos de sa Cida Santa depiant intrare in sa fase prus importante ma ocannu est beniu a marolla a non ddos fàghere cun su pùbblicu. Duncas sa Cunfraria de su Sacru Monte ant trasmìtidu totu in direta Facebook e su ritu barocu de origine ispagnola de su Via Crucis, chi a logos ddu narant “Prucessione de Adamu”, s’est fatu in manera diferennte. Dae sa crobetura de su campanile de sa Seu unu giòvanu bistiu a babbaloti at sonadu su tamburu chi pretzedit s’essida de sa prucessione e is citadinos si sunt incarados in is balcones de su centru istòricu e ant acumpagiadus su sonu de su tamburu a cun is matracas e is tzacarreddas.
Pertantis sighint a circare su piciocu de Perdaxus chi est isparessidu giai duas cidas a coa. Lunis is pompieris in pari a sa protetzione civile e sa Politzia cun is unidades cinòfilas e unu drone ant circau in su sartu in zona de Is Fonnesus e de Serbàriu in comunu de Carbònia. In su mentris aiant giai agatadu su scooter de su giòvunu in d-una discàrriga e ant indagadu una cantu personas pro ricetatzione. Est nova de sàbudu chi su GIP de Casteddu at cunfirmadu s’arrestu chi is Carabineris ant fatu giòbia. Est òmine de 35 annos chi est imputadu de omicìdiu volontàriu. Siguramente pro is familiares de su giòvanu custu est unu corpu mannu, ma mancai pitica, esistit ancora s’ispera de agatare biu custu giòvanu.
Dòminigu fiat Pasca Manna, se festa prus manna pro is fideles cristianus, e de siguru est istada diferente meda pro totus: non s’est fatu s’ Incontru in pratzas de Gesus resortu cun sa Mama chi perdiat su lutu, però is campanas de is parròchias de sa Diocesi ant arrepicadu totus paris pro donare unu sinnu prexu e de unione. A su pròpiu non s’est festa in is domos candu si costumaiat a pràndiri in pari cun is parentes e is amigos. In medas aprofitaiant de custas dies pro si fàghere unas cantu dies de fèrias. Ocannu, a dolu mannu nostru, nos est bènnidu a marolla a cambiare su costumu, ma s’ispera e chi s’annu chi benit torrit totu a uguali a prima.
E aici nc’est passada sa de cincu cidas de corantena e de inserru. Sa bona sorte e massimente s’impegnu de is sulcitanos chi sunt arrispetende is règulas noas de distàntzia sociale ant fatu a manera chi in logu nostru no nche siant istados àteros cuntàgios. Is cuntzillos sunt is matessis de cida passada: tocat a abarrare in domu, a nche nch’essire sceti si pròpiu si benit a marolla, a arrispetare is règulas de igene e sa distàtnzia interpersonale candu andaus a logos serrados. S’augùriu est a abarrare sanos.
a cura di Roberto Pinna
