Sa cida sulcitana in curtzu.Dae su 23 a su 29 de martzu.
Lunis eus incumentzadu sa de tres cidas de acorru e de corantena. Pariat chi fessit andende totu bena ma martis est istada una die unu pagu trumentada. Infatis de bonu menagianu est arribada sa cunfirma de su primu casu positivu a su covid-19 in Carbònia. Custa boghe fiat essida dae unas cantu dies ma custa persona fiat giai in corantena e duncas totus is personas chi sunt intradas in cuntatu cun su malàdiu (chi est arricoveradu in s’ispidale de Is Mirrionis in Casteddu) sunt monitoradas dae su primu momentu. A meigama sunt ispainados prus a lestru meda de su virus unas cantu messàgios vocales de whatsapp aundi si fueddaiàt una persona chi fiat lòmpida dae continente positiva in Masainas chi si nde fiat andada a giru. Est dèpidu intervènnere sìndigu Ivo Melis a fàghere craresa: totus is personas interessadas o aiant giai acabadu sa corantena e is chi teniant sìntomos fiant isoladas in domu insoru e sighidas dònnia die dae is dotores de famìlia sichei no esistiat nisciunu perìgulu. Prus a trigariu s’est scìpidu de àteros 2 casos in Sant’Antiogu e a custos s’est aciuntu su messàgiu de su sìndigu de Teulada chi ispiegaiat chi ddoi fiat una persona positiva chi at cassadu sa maladia in d-unu uspidali e duncas non in bidda. Est fintzas inùtile a nàrrere ca est de importu mannu a arrispetare prima de totu sa privacy personas e de non pònnere mente a messàgios chi girant in is telefoneddos, massimamente candu non conosceus chini ddus mandat. Duncas si pròpiu boleus informatziones ddas depeus circare sceti oberende is canales ufitziales de is entes pùbblicos.
Mèrcuris, chi fiat sa die de s’Annùntziu, s’obispu nostru, monsignor Zedda, at fatu sa missa in sa crèsia de Nostra Sennora de is Gràtzias de Igrèsias. Totus is campanas de is crèsias de sa Diocesi ant sonadu paris pro regordare a totus is fideles sa netzessidade de pregare totus in pari. Monsignore at scioberadu custa crèsia proite chi su 25 de martzu de 1735, pustis de 20 annos de carestia causada dae su pibiritziri chi aiat invàdiu su sartu, su Capìtulu de sa Seu e is responàabiles de su Comunu di Igrèsias aiant fatu promitèntzia a sa Biada Vìrgine de is Gràtzias e a Santu Giusepi, pro ddis agratziare de àere iscaburtu Sa Ciutari dae cussa calamidade.
Sighint, is su mentris, is atziones de solidariedade in totu su Sulcis. In dònnia logu si cosint mascherinas, su Comunu de Bidda Matzràxia nd’at donadu 150 (de cussas cun su filtru) a is operadores de su 118 de Igrèsias, is dipendentes de is istabilimentos de sa Portovesme SRL de Portovesme e de Santu Aìngiu ant a donare un’ora de su traballu insoru pro agiudare is uspidales de Carbònia, Igèsias e Santu Aìngiu e sa sienda at a doppiare su contributu chi ant a pònnere is traballadores.
A totu cida ant sighidu puru is controllos de is Fortzas de s’Òrdine in totu su territòriu: sa situatzione est uguale a cida passada cun sa parte prus manna de sa gente chi est arrispetende is règulas de distantziamentu sotziale ma at fatu ispantu mannu un’òmine de Cortoghiana chi si-nd’est andadu a giru e at postu su vìdeo in social network insuliende sa gente a non abarrare in domu. Custa bella furriada dd’est costadu sa denùntzias pro aere violadu is normas de cuntenimentu de su corona virus. Sa pròpiu sorti est tocada a un’àteru òmine de Carbònia chi est evàdiu dae is arrestos domiciliares e a unu santantioghesu chi chi fiat impunnadu a Carbònia pro comperare droga e dd’ant agatadu is Carabineris.
Andant a innantis is programmas de sanificatzione istraordinària de is edifìzios pùbblicos e de is istradas de is tzentros urbanos chi ant aprontadu giai totus is amministratziones comunales de sa zona nostra.
Sàbudu s’est scìpidu chi est isparèssidu unu piciocu de 23 annos de Perdaxus. A cantu ant nadu su babbu e sa mamma custu giòvanu biviat in domu de is ajajos e sàbudu passadu est sètzidu in d-una vetura chi s’est firmada pròpiu de fronte aundi bivint is ajajos dae insaras non si scit prus nudda. Su babbu at presetandu sa denùntzia in sa caserma de Narcau e de insaras ant icumentzadu a ddu circare. Dae s’aposentu de su piciocu ammancant sceti una pariga de cartzolas e su telefoneddu chi siguramente at pigadu avatu. Ant provadu a ddu telefonare unas cantu bortas e mèrcuris su telèfunu at sonadu ma no at mai arrispùndiu nemus. Sa cimbella de custa famìlia est manna meda e duncas chini scit calincuna cosa andit anche is Carabineris e fueddit.
Chini iscriet custa rubrica si lassat cun su pròpiu cuntzillude cida passada: tocat a abarrare in domu, a nche nch’essire sceti si pròpiu non faghet a nde fàghere de mancu, a arrispetare is règulas de igene e de distàtnzia interpersonale. S’auguriu est de abarrare sanos.
a cura di roberto pinna
