sa cida sulcitana in curtzu. Dae su 16 a su 23 de martzu
Puru custa Cida Sulcitana in Curtzu est dedicada a s’emergèntzia sanitària chi ormai s’est ispainada in totu su mundu. In s’essida de cida passata chini iscrit custa rubrica no est istadu pretzisu meda e duncas imoi provat a pònnere rimèdiu: Su nùmene pretzisu de custa maladia est COVID-19, chi est causada dae su virus “SARS-CoV-2” chi apartenit a sa famìlia de is corona-virus proite chi osservados a microscòpiu parint pròpiu chi siant coronados. Dae is datos asserit ca sa parte prus manna de is chi sunt cuntagiados passant sa maladia sena de si-nde acatare opuru dda passant a “ligeru” uguale a un’arresfriu ma podit acuntèssere chi massimamente in personas prus dèbiles e antzia, si trasformit in d-una purmonita chi podet èssere mortale.
Ancora non s’est pigada nisciuna decisione uficiale ma est meda probàbile chi in Igrèsias si fatzat sa Cida Santa sena de prucessiones, fatu chi in 350 annos est acuntèssidu sceti in su 1916 e in 1943. Is Cunfraris sunt provende a istudiare a una solutzione chi non privit de su totu Sa Ciutari de una de is manifestatziones prus importantes. Sunt acabaos Is traballos de restàuru de sa basìlica de Sant’Antiogu e su 18 de martzu depiat torrare a abèrrere a su cultu ma custa initziativa puru est rinviada a candu at a passare s’emergèntzia.
In custa emergèntiza ammancant is mascherinas chi serbint pro protègere siat is dotores e totus is chi traballant in sa sanidade siat is personas comunas. Duncas in logos meda is assòtzios sunt organizende-sì e ddas faghent in domu: pro esèmpiu e in Caleseda is volontàrias de Pro Loco nd’at a cosire 20.000 oberende unu materiale chi at lòmpere dae s’Ispagna. Est cosa connota a totus chi non sunt presìdios mèigos ma sunt mellus de nudda.
Sa de martis est istada una die trumentada meda. Infati s’est scìpidu de unu tampone positivu in Sant’Antiogu e sùbitu ant incumentzadu a cùrrere is boghes in Whatsapp e inderetura faghiant fintzas su nùmene de is personas interessadas cun bona paghe de sa privacy. Nc’est bòffidu s’interventu in Facebook de Nàssiu Locci chi at demostradu de èssere persona firma e de gabbale: at nadu, cun tonu trancuillu, a totus de abarrare calmos e chietos in domu proite chi fiant giai incumentzadas totus is protzeudras pro tratare su casu in siguresa. E semper martis s’est scìpidu ca sunt ammancadas prus de 1000 mascherinas chi fiant destinadas a s’uspidale Sirai de Carbònia. Sa sienda de Bari chi at mandadu su pacu at cunfirmadu chi s’ispeditzine est partida integra e duncas Is Carabineris ant incumentzadu is indàgines pro circare de cumprèndere aundi si siant “pèrdidas” custas mascherinas e si timit chi calincunu male intragnadu ddas apat postas a bèndere in su web.
Sàbudu sa Giunta Regionale at comunicadu su pianu istratègicu progressivu de àrea crìtica in sa Regione Sardigna pro cuntrastare su COVID-19. In custu pianu est previstu de mòvere su puntu nàschidas dae su CTO a su Brotzu de Casteddu, e de lassare su CTO che istrutura de riferimentu territoriale. Sa reatzione de is sìndigos de sa zona est istada forte meda. Pro primu at faeddadu in Facebook su sìndigu de Igrèsias, pustis dd’ant postu avatu totus is àteros sìndigos cun d-unu comunicadu ufitziale: si su puntu nàschidas si depet mòvere depet andare a su Sirai e no a Casteddu proite nc’at sa timoria de ddu perdere a manera definitva; in prus is sìndigos si chesciant proite chi dae su primu momentu de s’emergèntzia ant inditadu su Santa Bràbara che istrutura prus adata a sa gestione de malàdios (fintzas is chi sunt crìticos) aici de non pònnere in perìgulu s’atividade de totus is àteros repartos e a s’acabada sunt dimandende de modificare su documentu arricende is rechestas insoru. Fintzas su Consilieri Regionale de su PSdAz Fabio Usai at pediu a sa Giunta Regionale unu commissàriu istraordinàriu, comente ant fatu giai totus is regiones de su nord, pro sa gestione de custa crisi.
In mesu de totu custu treullu sighint is apellos de is sìndigos a abarrare in domu, e in comunos meda sunt boghende ordinàntzias chi sunt meda prus istrantas de su chi prevedint is DPCM de s’8 e de s’ 11 de martzu: a logos est proibidu a nche essire de su totu ma si podet andare a nche bogare su cane abarrende a 200 metros de domu (in S.Antiogu, S.A.Arresi, S.G. Suèrgiu) àteros comunos non bogant peruna ordinàntzia proite chi est giai totu previstu in is decretos. Fatu istat nc’est istadu calincunu denuntziadu in totu su territòriu ma in generale sa gente est arrispetende sa norma: pro esèmpiu in Carbònia custa cida ant controlladu 229 personas e 323 atividades commerciales e ant postu sceti 3 multas.
Aici nc’est passada puru sa duas cidas de corantena, su cuntzillu est su de cida passada: est a abarrare in domu e de nch’essire sceti si est necessàriu, de arrispetare is règulas de igene e de distàtnzia interpersonale e s’auguriu est de abarrare sanos.
