Sa cida sulcitana in curtzu. Dae s’8 a su 14 de mese de argiolas
Lunis 8: Antonio Guerrieri est s’assessore nou a sa programmatzione e bilànciu de su comunu de Carbònia. Guerrieri est nàschidu in Roma e est bivende in Casteddu dae 20 annos. Est tenente colonellu de sa Guàrdia de Finantza, tenit s’abilitatzione pro fàghere su commertzialista e tenet puru unu dotoradu de circa in s’economia e deretu de is sistemas produtivos otènnidu in s’universidade de Tàtari. A parridade de su sìndigu Paola Massidda imoi, pro mori de is cumpetèntzias de Guerrieri, sa giunta est prus forte.
Martis 9: is portos sunt serrados (e drìnghili eis a nàrrere…) ma sighint a isbarcare is algerinos in su Sulcis. A chitzi mannu is Carabineris de sa cumpangia de Carbònia ant firmadu unu grupu de 13 personas in Porto Pino. Invècias in Sant’Antiogu, pròpiu in grofu de meigana, ant firmadu 3 personas chi fiant andende a pee acanta de s’Àcua de sa Canna. Custos ant nadu ca nche-nde fiant àteros 11 in s’ìsula de su Toru e duncas est partidu unu mezu pro nde-ddos pinnigare. De chi nde-ddos ant arrigotos custa gente at ispiegadu ca est bènnidu a marolla a isbarcare in s’isuledda proite ca sa barchita fiat incumentzende a aciuvare. Comente dònnia borta a custos piciocos nche-ddos ant lòmpidos a su tentru de collidura de Muristenis pro is protzeduras de identificadura e de espulsione.
Mèrcuris 10: in sa Salina de Sant’Antiogu in comunu de Santu Giuanni Suèrgiu un un’operàiu de 67 nd’est arrutu dae unu machinàriu e nc’at donadu sa conca a terra. Is cumpàngius de traballu ant tzerriadu s’ambulàntzia ma s’òmine s’est mortu in s’uspidale Sirai de Carbònia. Is Carabineris e is tènnicos de su servìtziu de preventzione e de siguresa in su traballu de sa ASL sunt indaghende pro cumprèndere ita siat acuntèssidu in manera pretzisa ma su chi faghet ispantu mannu est chi un’òmine de cussa edade in logu de si gosare sa pentzione depat sighire a fàghere traballos perigulosos.
Giòbia 11: seus in grofu de s’istadi e comente dònnia annu gente male intraniada atacat fogos in su sartu. Nd’ant postu unu in Narcau chi est partidu dae s’istradone chi artziat a Terraseu e fiat impunnende conca a bidda ma is voluntàrios de sa Protetzione Civile agiudados dae s’elicòteru partidu dae Marganai sunt arrinnèscidos a nde-ddu istudare a lestru. Prus perigulosu meda su fogu chi ant postu cenàbara in sa zona de Tuerredda in comunu de Teulada. Inguni ant abruxadu 30 ètaros de crachi e at tocadu a serrare puru s’istradone provintziale. Sunt dèpidos intervènnere 2 elicòteros cun is òmines de sa Forestale e is Pompieris de Casteddu chi istudaiant dae terra e is turistas, atzicados meda, chi fuiànt in presse dae sa pràgia.
Cenàbara 12: ant incumentzadu is traballos in Is Pirixeddus, chi est su setore nord de sa necròpoli pùnica de s’antiga Solky, pro su ponimentu in siguresa de su percursu chi at permìtere de nche calare in d-unas cantu tumbas e in prus s’at a pònnere puru un’impiantu de lughes internas e esternas, ddoe ant a èssere puru cartellos cun is informatziones iscritas in lìnguas diferentes e s’at a cuncordare una domixedda de linna pro fàghere s’infopoint e pro bèndere is billetos. In totu custos traballos balent 100mila èuros chi ant postu sa Fondazione Sardegna e su Comunu de Sant’Antiogu.
Sàbudu 13: est andada bene meda sa tapa chi ant fatu in Carbònia de Sciampita, su fesitival folk internatzionale chi est nàscidu in Cuartu Sant’Aleni in su 1985. In s’anfiteatru de Pratza Marmilla ant fatu unu bellu ispetàculu is grupos chi beniant dae Mèssico, Bolìvia, Macedònia de su Nord e Ossètzia e ant fatu bella figura puru is grupos folk locales de Santa Maria de Frumentèpidu e de Santa Giuliana de Serbarìu.
domìniga 14: s’istagione turìstica est intrende in su prenu suo e is previsiones cunfronta a s’annu passadu non sunt bonas: infatis si chistionat de una smenguadura de is presèntzias de su 10% in totu s’Ìsula e non sunt pagos is albergadores chi puru in logu nostru chi si chesciant proite chi tenint ancora istàntzas medas isboidas. Perou si si castiat su nùmeru de bisitadores in is museos o parcos archeològicos a su 30 de làmpadas opuru su nùmeru de personas in is pràgias, is datos narant ca is presèntzias o sunt, prus o mancu, uguales a s’annu passadu. Custu proite ca est crescende su nùmeru de is domos privadas de apesonare e de is B&B e si bidint meda prus camper in is istradones e duncas benit male a contare su nùmeru reale de presèntzias in su territòriu. Pro unu bilànciu tocat a abetare assumancus s’acabu de su mese de cabudanni ma podet èssere ca ocannu puru s’istagione turìstica siat discreta.
Roberto Pinna
