Sa cida sulcitana in curtzu. Dae a su 4 su 10 de friàrgiu
Lunis 4 s’AIAS at pagadu una parte de is istipèndios arretrados a is dipendentes suos ma lestru e est incumentzada sa polèmica de is sindacados proite chi sighint a ammancare 9 mensilidades e sa situatzione pro is traballadores est impeuende semper de prus. Dae sa sienda arrispundint chi sa polèmica est sceti pro campagna eletorale in sa pedde de is traballadores proite chi sunt faghente totu su chi podent pro pagare s’arretradu.
Martis 5: sa RAS at postu àteru dinari (1 milione e 300mila èuros) pro pònnere in siguresa su Ponte de Sant’Antiogu. Duncas imoi tocat a is ufìtzios comunales a incarrerare totus is proceduras chi serbint pro chi partant is traballos pro arrangiare in manera definitiva su ponte chi no at tentu prus cura dae annos meda. In su mentris su comitadu Porto Solky sighit sa batalla sua contras a su ponte nou e sàbudu in d-una cunferèntzia pro is organos de imprenta ant ammostradu totus is anomalias chi nci sunt is òperas giai progetadas chi tenent unu valore de 75 miliones de èuros.
Mercuris 6: Marisa Orrù e Roberta Pierantoni, chi sunt is responsabiles regionales de su servìtziu de s’intrega de sa currispondèntzia e de is pacos de Poste Italiane sunt andadas a Villaperùciu pro atobiare s’amministratzione comunale e arresonare in contu de is problemas de is ùrtimos meses (pruscatotu sa bulletas non donadas chi ant portadu a su distacu de sa currente elètrica in domos privadas e in siendas agrìcolas). Is dirigentes de Poste Italiane ant prima ascurtadu is chèscias de s’amministratzione comunale e pustis ant ispiegadu cales sunt is problemas de su sètiu nou chi at pigadu sa distributzione currispundèntzia e ant dimandadu sa collaboratzione de is citadinos pro resòlvere is problemas. In prus ant promìtidu chi si impegnat a cumprèndere a comente mai su postinu chi depit passare assumancus duas bortas a cida est passende sceti una borta dònnia 10 dies.
Giobia7: in is locales de sa palàssiu de ex diretzione de sa Grande Miniera de Serbariu ant incingiadu sa sala dedicada a Fabio Masala chi fiat su fundadore e su primu diretore de sa Società Umanitaria in Sardigna. In custa sala, chi tenet 130 postos e is mellus impiantos àudio e de proietzione vìdeo, s’ant a pòdere castiare film e cuncordare cunvènnios. Sa sala però bolet èssere puru unu logu aundi si potzat fàghere unu percursu de educatzione e promotzione de sa cultura audiovisiva cun s’obietivu de aumentare su nùmeru de utentes, mancai proponende una programmatzione de cualidade chi donit atentu mannu a is ecellèntzias de su cìnema sardu.
Cenàbara 8: in Piscinas su prof Italo Meloni de s’universidade de Casteddu e Giampiero Pinna chi est presidente da sa FCSB ant presentadu su progetu de sa Ciclovia de su Camminu de Santa Bràbara. Pro tretos meda su percursu torrat paris cun cussu de fàghere a pee, e mesurat in totu 440km e est ispartzidu in 9 tapas. Ascurtende sa presentada custa ciclovia at a tènnere finantziamentos regionales e parit chi sa cosa siat fàcile ma sa beridade est chi pro acabare totu nc’at a bòllere assumancus 10 annos e pro tretos meda si podet passare sceti cun sa mountain bike sende chi sunt moris biancos e nc’at punta a susu meda, e de siguru sa MTB no est su mezu giustu prus adatu pro su cicloturìsmu e in prus nc’at puru calincunu arrogheddu chi pròpiu non si faet a passare. Est berus puru su chi at nadu Giampiero Pinna: is camminos si faghent camminende e duncas est pretzisu a fàgher connòschere su percursu cun totus is bellas suas o sinuncas non s’at a cumentzare mai.
Sàbudu 9 e domìniga 10: sa protesta de is pastores est arribada puru in su Sulcis. In Gonnesa unas cantu pastores ant arregaladu a sa popolatzione su late e su casu chi ant pesadu in domu, ma in Bidda Massàrgia, Santadi e in su ponte de Sant’Antiogu sa protesta dd’ant fata in manera diferente. Is pastores si sunt pinnigados a pari e doniunu nc’at iscavuadu unas cantu casiddos e bandones de late a terra e ant firmadu su tràficu. S’ingestu de protesta, chi est forte meda e fàghet prànghere su coru, est contras a is industriales chi pagant su late sceti a 60 centesimos a litru, unu tanti chi no abastat mancu pro is costos de produtzione e is pastores dimandant arrispetu pro su traballu e dignidade pro is famìlias insoru. S’ispera est chi su movimentu de is pastores, chi non bollent in mesu de issos ne polìticos e nemancu assòtzios de categoria, fatzat propostas de giudu chi siant cumbenientes pro totus e chi firmint is pagos macos chi podent arrovinare totu custa bella initziativa.
Roberto Pinna
