Sa cida sulcitana in curtzu. Dae su primu a su 7 de mese de ladàmine
Lunis 1: Ant a sighire pro totu su custu mese de ladàmine “Domeniche al nuraghe” is bìsitas a su nuraghe de Monte Sirai cuncordadas dae sa cooperativa Sistema Museo cun s’amministratzione comunale de Carbònia. Cun sa ghia de s’archeologa Carla Perra, chi est sa diretora de su progetu de circa scentìfica, s’at a pòdere bisitare su chi abarrat de sa fortetza nuraghesa (fraigada faci a su de XV sèculos in antis de Cristu) e una parte de su bidda fraigada in s’edade de su ferru aundi parit chi si siant atobiados in paghe nuraghesos cun is fenìcios iscambiende produtziones e tecnologias. Sa bìsita si depet prenotare telefonende a su nùmeru 07811867304 o mandende una mail Questo indirizzo email è protetto dagli spambots. È necessario abilitare JavaScript per vederlo. .
Martis 2: in Masainas est acabada sa festa de Nostra Sennora de sa Salude chi comente bolet sa traditzione serrat is festas sulcitanas chi incumentzant in beranu cun s’arribu Maria Munserrara in sa ex catedrale de Tratalias. Lunis a merie, chi est pròpiu sa die de sa festa, ddoe fiant prus de 2500 personas – arribadas finas dae Campidanu – chi sunt andadas avatu de sa Santa chi at fatu su giru de sa bidda in prucessione. Fintzas sa festa tzivile, mancai ocannu su tempus non fessit tropu siguru e torressit paris cun Sant’Arega, at tentu unu sutzessu bonu meda (fiant prus de 3mila is chi ant ascurtadu su cuntzertu de Ivana Spagna in pratza de su municìpiu martis a note).
Mèrcuris 3: 3 operàios de sa Polar, sa fàbbrica aundi si traballat sa bentonite in comunu de Piscinas, ant arritzidu in is dies passada sa lìtera de licentziamentu. A cantu parit sa sienda nche-ddos bolet bogare pro ristruturatziones aziendales. Sa protesta est incumentzada sùbitu: is operàios ant ocupadu sa sala de su consìliu comunale de Piscinas e Emanuele Madeddu, segretàriu de sa Filctem CGIL, at dimandadu un’atòbiu a lestru cun sa sienda, sa Confindustria e is assessorados regionales de su Traballu e de s’Indùstria pro chi averguint is cuncessiones chi tenet sa sienda, sende chi sa sienda etotu est obbligada a prodùsere in su logu de aundi bogat sa bentonite e fortzis no est arrispetende custa clàusola.
Giòbia 4: Is carabineris ant arrestadu una fèmmina de 34 annos pro stalking e s’ex cumpàngiu. Custa fèmmina fiat giai denuntziada 2 annos a coa e a aiat arritzidu s’avisu de su Cuestore de Casteddu. Custa fèmmina in grofu de note nc’est sartada in pratza de sa domu de aundi bivit s’ex cumpàngiu e fiat circhende de intrare in domu pichiende s’enna. Sunt arribados a lestru is Carabineris chi nche-dd’ant lòmpida in sa cella de siguresa de s’istatzione de Carbònia aundi at abetau su processu pro diretissima.
Cenàbara 5: In su Sulcis est nàschida sa prima bia de su sale de sa Sardigna. Is assessores regionales Paci (bilànciu) e Erriu (entes locales) ant firmadu su protocollu de intesa cun is sìndigos de is comunos interessados e su presidente de s’Atisale (su cuncessionàriu de sa Salina de Sant’Antiogu) chi prevedit de pònnere a cùrrere 2 miliones e 500mila èuros pro fàghere unu sistema in progetu dae 13 annos chi donit valore su sale non prus sceti comente produtzione industriale ma chi bessat comente unu ghia chi donit a is bisitadores un’esperièntzia ùnica finas dae su puntu de vista ambientale, istòricu e culturale. Su sugetu atuatore ùnicu at a èssere s’Unione de is Comunos de su Sulcis chi at a fàghere interventos cun is cales s’ant a arrangiare is moris chi giai esistint is in salinas de Santa Caterina e Sant’Antiogu, s’ant a fàghere pistas ciclàbiles chi colleghint is istangiones de Porto Pino e Porto Botte, chi si fabbrichint istruturas pro arritzere is bisitadores in manera sustenìbile e chi si fatzat puru una promotzione bene fata de is sitos de interessu comunitàriu.
sàbudu 6: in su museu F. Barreca de Sant’Antiogu ant fatu su primu atòbiu de is centros commerciales naturales de sa Sardigna promòvidu dae s’assessoradu regionale a su turismu. A pustis de s’interventu de s’assessore regionale Barbara Argiolas s’est arrexonadu a pitzus de sa’importu de s’agregatzione de is siendas commerciales prus piticas chi a parre de su sìndigu de S.Antiogu Ignazio Locci finas a imoi sunt presìdios chi sighint a donare lughe a is arrugas de is centros istòricos e chi depent èsser agiudadas dae polìtica pro sighire a andare a innantis.
Domìniga 7: Est incumentzadu puru su campionadu de segunda categoria de fubalu. In su girone C s’Antiochense at bintu 3 a 1 contras a Is Urigus, su Sulcis United de Biddamassàrgia at bintu 3 a 2 in Arbus, su Masainas 2 a 0 in domu cun sa Fortitudo de Gùspini; ant pèrdidu in domu su Bugerru, sa Don Bosco e su Gonnesa (contras a Bindua, Monreale a Domusnoas); no at giogadu su Perdaxus. In primu categoria sighit a bìnchere s’Atletico de Villaperùciu, in promotzione ant pèrdidu su Carloforte (0-1 cun sa San Marco) e sa Monteponi (1-0 in Arborea), paregiadu su Carbònia (0-0 cun Idolo) e su Biddamassàrgia (1-1 cun la Palma-Monteurpinu).
Roberto Pinna
