A is primus de su sìndigu de igrèsias Mauro Usai at scioberadu su de 7 assessores de sa Giunta sua: est Angela Scarpa chi est su segretàriu de su cìrculu ACLI de Igrèias e dd’at donada sa dèlega a is polìticas sotziales, a is giòvanos e a is domos. Serbiat de siguru un’àtera fèmmina pro respetare sa lege de is cuotas a colore de arrosa (depent èssere assumancus su 40%) ma su sìndigu narat chi at bòfiu Scarpa pro is cumpetèntzias chi tenet issa etotu, e de parte sua at nadu ca su primu impegnu suo at èssere de controllare chi si arrispetint is iscadèntzias previstas pro is leges de setore (comente chi is funtzionàrios non connoscant is iscadèntzias o un'assessore ddis potzat nàrrere a comente depent fàghere su traballu insoru...). E semper Mauro Usai su 17 de austu pro protestare contras sa tancadura de su laboratòriu de is anàlisi de su spidale Santa Bàrbara at at ocupadu sa sede de s’assessoradu a sa sanidade in Casteddu (e est arribadu puru su sìndigu de Flùmini Majori Marco Corrias pro dd’agiudare). De chi Usai at faeddadu cun is vèrtices de sa Regione su laboratòriu at torradu a abèrrere su 21 de austu.
E sempre su 21 de austu In Carbònia s’est ispaciadu a 71 annus su predi de sa parròchia de Santu Pontzianu don Amilcare Gambella. Don Amilcare fiat un’ òmine sàbiu e de gabbale semper prontu a agiudare a su pròssimu e teniat unu fueddu bonu pro totus. Don Amilcare, chi fiat semper cun is traballadores de is indùstrias e organizaiàt cunvènnios e atòbios, at lassadu unu vacuu mannu meda in comunidade carboniesa.
Is ùrtimas dies de su mese ant torradu a incumentzare is isbarcos de algerinos is su Sulcis. Su 30 a note is carabineris ant agatadu a 16 alegerinos passillende in mesu de Sa Idda, su 31 a chitzi mannu invècias sa Guàrdia Costera at intercetadu duas barchitas in mesu de mare cun 17 personas in totu. Comente semper is Carabineris ant arrigotu custa gente e nche-dd’ant lòmpida a su tzentru de collidura de Muristenis pro is protzeduras de identificadura e espulsione.
Si su mese de austu de s’annu passadu fiat unu de is prus calentes de semper su de ocannu est sena de duda peruna cussu chi at fatu prus àcua chi mancu is prus antzianos nde tenent arregordu. At incumentzadu a is primos de su mese cun bentu de maestrale e calincuna passada de stracìa a mericeddu e àcua sulena su a note. Su tempus s’est assetiadu sa cida de mesu austu ma apoi, dae su 20 a su 26, at fatu unu pagheddu bellu a mangianu e temporadas dònnia merie cun sa protetzione civile chi mandaiàt dònnia die s’allerta groga. A s’iscònciu fatu dae is lampos (is iscuadras de s’Enel no acuriant a arrangiare in d-unu logu chi depiant intervènnere in d-un’àteru) tocat a agiunghere cussu fatu dae is istrossas a sa produtzione agrìcola: s’àxina est purdiende in is fundos (si carculat chi sa produtzione de àxina, giai provada dae s’àcua de maju, at a calare de assumancus de su 50%) e su chi abarrat no at a èssere de calidade bone proite no at a tènnere gradu; guastada totu sa produtzione de canciofa in su Sulcis de Bàsciu sende chi s’àcua meda at lissiadu is ochiellos e imoi non si-nde agatant pro ddos torrare a pònnere, scalladas totus is ortalìtzias e est incumentzende a sunfrire puru s’olia. S’ùnica cosa bona est unu pagheddu de pastura pro is allevadores e su cordolinu chi est bessende in monte. Totus is comunos de su zona ant deliberadu s’istadu de calamidade naturale e dimandant s’interventu de sa Regione pro chi agiudit is siendas agricòlas chi sunt cun s’anca a terra.
De siguru totu cust’àcua at fatu dannu puru a su setore de su turismu: sa gente no est andada a mare e nemamcu a bisitare is sitos de s’internu, proite chi preferiant a abarrare firmos in is albergos o in domos pigadas a pesone. Fatu istat chi is datos sunt bastante discreteddos, unu pagheddu prus bàscios cunfronta a s’annu passadu (is contos giustos si depent fàghere a s’acabu de custu mese) chi pariat s’annu de sa svolta ma sa beridade est chi, lassada calincuna initziativa incarrerada dae sa retza VisitSulcis, is privados e is amministratziones locales ant fatu pagu e nudda pro prommòvere sa zona nostra e sceti is comunos chi ant postu dinari a cùrrere in sa comunicatzione ant otentu resurtados bonos: pro esèmpiu Masainas cun totus is sagras prenas a intipu e puru is parchègios de sa pràgia de Su Paris fiant semper prenos, o Igrèsias aundi si sunt arregistrados giai 9000 bisitadores in Porto Flavia.
Intru de totus is eventos cuncordados custu mese (o assumancus is chi no at guastadu su tempus mau), de siguru amminescit de èsser arremonada sa de 7 editziones de Perdaxius Corre fata su 26 de austu in su parcu de Santu Leonardu: ant partetzipadu prus de 1000 personas (gente lòmpida dae totu s’ìsula e finas dae continente) e in mesu de is curridores nche fiant puru atletas ispetziales chi sunt guadangiados s’aplausu de su pùbblicu.
Roberto Pinna
