NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
17
Sat, Nov
30 Nuovi articoli

La cida sulcitana in curtzu.Dae su 18 a su 24 de làmpadas

Novas in Sardu (LSC)
Aspetto
Condividi

La cida sulcitana in curtzu.Dae su 18 a su 24 de làmpadas

Lunis 18: est andada bene meda sa mostra de òperas fraigadas cun is matoneddos Lego chi s’amministratzione comunale de Carbònia at cuncordadu in s’auditorium de sa Grande Miniera de Serbàriu e chi fiat unu de is eventos previstos pro celebrare is 80 annos de sa citade. Is 1500 bisitadores in is 40 metros cuadros de s’espositzione ant osservadu casteddos de s’edade de mesu, monumentos modernos che su Thaj Mahal, una bidda de su far west e una de is vichingos e puru is astronaves de Star Wars. Ma in mesu de totus custas bellas òperas s’ “iscultura” chi is bisitadores ant tentu prus agradèssida fiat su campanile de Santu Pontzianu chi est unu de is sìmbulos de Carbònia.

Martis 19: Puru Pino Cabras, deputadu de su M5S elìghidu in su collègiu de su Sulcis at criticadu sa decraratzione de su ministru de s’internu chi bolliat fàghere unu censimentu de is rom e de is sintos chi si agatant in su territòriu italianu. A parre de Cabras custu censimentu no est prioridade de custu guvernu e fortzis iat a èssere mellus a tènnere prus in cunsideru sa criminalidade organizada chi est infiltrada in is tzitades de su nord. Duncas a pustis de 2 cidas dominadas dae is “essidas” de su Ministru de s’Internu su M5S at donadu calincunu sinniale de vida.

Mercuris 20: in sa plàgia de Maladroxa, in comunu de Sant’Antiogu, est operativu “L’Isola del Cuore” chi est su primu istabilimentu in Sardigna fatu apostadamente pro is personas malàdias chi pro bìvere tenent abisòngiu de èssere atèndias cun custàntzia. Duncas gràtzias a is volontàrios de s’assòtziu “Le Rondini” e is dotores ispecialistas chi traballant totu a in donu, finas is prus malàdios podent andare si gosare su mare e su sole. Custu est unu sinniale bellu e forte de progressu e civiltade chi dae su Sulcis partit pro totu sa Sardigna.

Giòbia 21: custa cida sunt 46 is nordafricanos chi sa Guàrdia de Finantza, in 4 interventos, at salvadu in mesu de mare. Mèrcuris su patugliadore “Tenente Paolini” at fatu 2 interventos e nc’ant tragadu 2 barchitas a su portu de Casteddu (21 òmines in totu), giòbia invècias nd’ant arrigotu 15 dae un’àtera barchita chi aiat fatu guastu a su motore e àteros 10 ddos ant intercetados a 15 km de Cabu Teulada. De chi nche ddos ant fatos isbarcare in su portu de Casteddu, is Carabineris nche-ddos lòmpidos a su centru de collidura de Muristenis pro is protzeduras de identificatzione e espulsione.

Cenàbara 22:In Sant’Antiogu ant incingiadu in s’ex “Casa del Mutilato” su Centru Servìtzios pro su Territòriu e s’amministratzione comunale at presentadu su programma de is eventos pro s’istade 2018, chi dònnia annu est semper prus arricu. Ocannu ddoe ant a èssere cuncertos in s’Arena Fenìcia, cun Erman Meta e Francesco De Gregori (su 13 e su 30 de austu). Dònnia giòbia finas a su 6 de cabudanni s’at a fàghere su Sulkys festival cun 2 ispetàculos: unu pro is mannos e unu pro is prus minoreddos. Sa novidade de ocannu est “Cabarena” (prevista su 28 e su 29 de mese de argiolas) candu is mellus mastros de su cabaret ant a andare a fàghere s’ispetàculu insoru in s’Arena Fenìcia. Craramente no ant a mancare is manifestatziones dedicadas a s’enogastronomia comente “Calici di Stelle” e “Grutas obertas” e, comente dònnia annu, su primu de austu s’at a festare Sant’Antiogu Màrtiri.

Sàbudu 23: in Santadi ant fatu unu cunvènniu pro regordare is 50 annos de s’iscoberta de su gruta de su Bennatzu chi est connota puru cun su nùmene de sa Gruta de s’Ischisòrgiu. Fiat pròpiu su 23 de làmpadas de su 1968 chi unu grupu de ispeleologos igrèsientes fiat intradu in d-unu stampu acanta de su medau de Su Bennatzu e aiat agatadu una gruta manna e in d-una de is salas ddoe fiat unu tèmpiu cun unu istocu pro is sacrifìtzios, unu trìpode, e unus 400 vasos chi asserit a èssere de s’acabu de s’edade nuraghesa. Pro s’ocasione su museu de Santadi, chi arregollit sa parte prus manna de is repertos, at cuncordadu unu allestimentu nou. S’ispera de is amministradores santadesos est cussa de resèssere a abèrrere sa Gruta de s’ischisòrgiu a su pùbblicu cun sa collaboratzione de is grupos ispeleològicos e de is archeòlogos.

Dominu 24: a pustis de una campagna eletorale prena de faeddos atzudos e polèmicas (s’ùrtima pro sa tancadura de su laboratòriu de is anàlisi de su CTO) is igresientes ant scioberadu su sìndigu insoro. Su ballotàgiu dd’at bintu Mauro Usai, sustènnidu dae su PD cun cìvicas de àrea UDC, chi at distacadu de mancu 400 votos a Valentina Pistis (centru-dereta). Usai at cunfirmadu is votos de su primu turnu (de is 5.748 nd’at pèrdiu sceti 41); Pistis nd’at pigadu 1.368 in prus (5.233) ma non sunt bastados pro bìnchere. Bàscia meda s’afluèntzia chi s’est firmada a su 46.2%, e pro sa primu borta in Sardigna su sìndigu dd’at scioberadu prus pagu de sa metade de is chi teniant su deretu de votare. Augùrios pro unu traballu de brofetu a su sìndigu nou!

Roberto Pinna