NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
22
Sat, Sep
38 Nuovi articoli

Sa cida in curtzu. Dae su 11 a su 17 de làmpadas

Novas in Sardu (LSC)
Aspetto
Condividi

Sa cida in curtzu. Dae su 11 a su 17 de làmpadas

Lunis 11: su mese passadu ant fatu su censimentu de is canes chi si agatant in sa fratzione de Bidd’e Arriu (in comunu de Giba) e in cussa biddixedda ant contadu 130 canes e de custos nche nde fiat 97 sena de microchip. Duncas su comunu de Giba at organizadu, in collaboratzione de sa ASSL de Carbònia e is Guàrdias Zoofilas, “Cani Urbani” cun s’iscopu de nche pònnere su microchip a totus is canes chi no ddu teniant. Is biddiarriesos ant arrispùndidu bene meda e infatis ant presentadu 85 canes. Su mese chi intrat custa initziativa s’at a torrare a fàghere in su boddeu principale de Giba.

Martis 12: terremutu polìticu in Sant’Anna Arresi. Si sunt dimìtidas 3 consilieras de magiorantza e is 4 de s’opositzione e duncas s’est sciusciadu su consìliu comunale. Sa chistione fiat una dèroga chi permitiat de cambiare una istrutura cummertziale in albergu in sa zona de Porto Pino. Su sìndigu Teresa Pintus at decraradu ca cumprendit is consilieris de opositzione chi faghent su giogu insoru ma non is 3 consilieras de magiorantza e ddas at imputadas de non tènnere de coràgiu e de aer postu in crisi non solu su comunu de Sant’Anna ma totu su territròiu. Issas ant arrìspùndiu chi non si podet guvernare cun dèrogas chi depent èssere s’ecetzione (sende ca nd’aiant giai cuntzèdida una pro cussa istrutura etotu e giai àters duas bortas aiant rinviadu su puntu in consìliu comunale) e chi si nde torrant a domu insoru a conca arta. In prus ant chistionadu de amelècios e de unu clima de pagu serenidade chi non si podiat suportare prus.

Mèrcuris 13: Sant’Antiogu intrat in su benidore de sa tecnologia. Is responsàbiles sardos de sa TIM cun is amministradores at presentadu su progetu de sa retza internet a banda ultra-larga chi at a permìtere de iscarrigare dae dato finas a 100megabit a su segundu. Sant’Antiogu est intrada in sa lista de is citades italianas scioberadas dae sa Tim pro custu servìtziu nou. Su programma prevedit 9 km de cablàgiu (duncas ant a istèrrere unu cavu nou) e 29 armàdios chi ant a cunnètere in totu 4mila unidades immòbiliares (est a nàrrere domos e apartamentos privados, butegas e capannones). S’investimentu balet 580mila èuros e at a permìtere de ammelliorare sa siguresa e sa gestione de emergèntzias eventuales, controllare su passàgiu e su nùmeru de bisitadores in certos logos e propònnere solutziones noas finas pro is turistas.

Giòbia 14: a fortza de protestare paret ca est movendesì calincuna cosa pro su postura in siguresa de sa SS293 (s’istradone chi dae Silìcua calat a su Sulcis de Bàsciu). Infatis s’ANAS at ghetadu unu pagu de asfartu nou in su tretu chi dae Nuxis arribat a Piscinas. Su chi lassat ispantados est chi ant postu sceti unu pillu fine de catramu in mesu de is duas corsias lassende sa parte de mesu e is oros de s’istradone sena de asfartare. S’ispera est chi non siat una befa ma sceti sa fase preliminare de unu traballu cumpletu, finas proite chi postu de aici cussu istradone – fundamentale pro totu su Sulcis de Bàsciu – est essidu ancora prus perigulosu.

Cenàbara 15: in Roma sa Càmera de is Deputados at votadu in favore de sa pròroga de is ammortizadores sociales pro is operàios de is àreas de crisi industriale sardas e duncas pro un’àtera arruncada podent abarrare trancuillos is ex traballadores de s’ex Alcoa de Portovesme e puru is de su polu industriale de Portu Turre. Sa Càmera no at arritzidu s’emendamentu de su PD de chi prevediat de donare s’ammortizadore sociale puru pro is operàios de sa zona industriale de Otzana e sùbitu est incumentzada sa polèmica polìtica. Pino Cabras, deputadu de su M5S elìgidu in su collègiu de Sulcis, at nadu ca pro cussos traballadores serbit unu provedimentu ad hoc e non un’emendamentu a ghetadu a brètiu.

Sàbudu 16: at tentu unu resurtadu bonu meda sa giorronada ecològica chi s’amministratzione comunale de Nuxis at organizadu in pari a totus is assòtzios (7 in totu) locales. Duos grupos de personas, fiant giai in 50, si sunt pinnigadas a pari si sunt postas a nde bogare e a seberare s’àlliga chi gente pagu abbista nc’at iscavuadu in s’Arriu de Bachera e a pagu tretu de su furridroxu de Is Ollargius; in su mentris totus is piciocheddos e is pipios faghiant letzione de ecologia in su parcu comunale. S’obbietivu fiat de trasformare is logos aundi nche fiat s’àlliga in logos de cumpartzidura coinvòlgende sa chi si narat “citadinàntzia ativa” e de imparare a is prus minoreddos su respetu pro s’ambiente e sa natura.

Domingu 17: domignu chi benit is igresientes scioberant su sìndigu nou in su ballotàgiu. S’isfidant Mauro Usai (PD + cìvicas de àrea UDC) chi at pigadu su 41% a su primu turnu e Valentina Pistis (centru-dereta) chi invècias at pigadu su 28,5%. Is candidados no ant fatu perunu aparentamentu e cunsiderende chi su M5S (20%) at lassadu libertade de votu pro is eletores suos benit male a fàghere previsiones.
Roberto Pinna