NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Mon, Aug
23 Nuovi articoli

Sa cida sulcitana in curtzu. Dae su 4 a su 10 de làmpadas

Novas in Sardu (LSC)
Aspetto
Condividi

Lunis 4: is piciocheddos de sa 2A de s’iscola mèdia de Giba, chi est frecuentada puru dae istudentes de Masainas e de Piscinas, ant bintu su primu prèmiu de su cuncursu de sa Cummissione Regionale pro is oportunidades uguales. Is istudentes de s’iscola gibàia, cun su coordinamentu de is professores Di Liberto e Tocco e sa collaboratzione tècnica de is operadores de sa “Fabbrica del Cinema” de Carbònia ant fatu “Champions S” chi est unu cortometràgiu chi tratat de is istereòtipos de gènere (est a nàrrere frases giai fatas, finas tontesas in contu de is diferèntzias intr’e òmines e fèmminas) e provant a ddos cambiare.

màrtis 5: duas piciocheddas de Carbònia, de chi ant passadu in pari su ponte de su 2 de làmpadas sunt isparèssidas e ant fatu passare 2 dies de cimbella manna a is parentes. Infatis candu lunis non sunt torradas a domu dae s’iscola chi frecuentant in Igrèias is familiares ant fatu sa denùntzia a is Carabineris chi si sunt postos a ddas circare. A s’acabada is militares de sa cumpangia de Dolianova ddas ant agadas in d-una bidda de su Campidanu sighende is tràcias de is telefoneddos e gràtzias a sa collaboratzione de amigos e conoscentes. Is piciocas istant bene e sunt torradas a domu insoru.

Mèrcuris 6: sighint is traballos in s’ex istabilimento ALCOA. Infatis nd’at bogadu su cartellu bèciu e a lestru ant a pònnere cussu cun s’iscrita Sider Alloys chi sunt is meres nous de sa fàbbrica de allumìniu. Unu sinniale craru chi sa chistione de su riavviu est andende a innantis. Pertantis ant a intrare a traballare àteros 4 ex dipendentes de s’ALCOA chi ant a andare a fàghere su “management” de s’istabilimentu e si abetat sa decisione de sa multinatzionale isvìtzera a pitzus de is 3 propostas fatas dae 3 ditas esternas pro torrare a fàghere partire s’istabilimentu (in sustàntzia depent istabilire cantu e cales machinàrios cambiare de bellu e nou e cantu nde depent lassare de cussos bècios).

Giòbia: fiat giai unu mese chi no arribaiant prus algerinos in su Sulcis e comente s’est assetiadu unu pagheddu su tempus sunt torrados a isbarcare. Faci a is 8 de mangianu is Carabineris, de chi ddos tzerriados un’òmine chi fiat passillende, ant firmadu 20 personas in sa zona de Porto Pino. Àteros 20 fiant ddos at intercetados sa Capitaneria de Portu in d-una barchita chi fiat impunnende conca su portu commerciale de Sant’Antiogu. Is Carabineris, comente dònnia borta, nde-ddos ant pinnigados e lòmpidos a su centru de collidura de Muristenis pro is protzeduras de identificadura e espulsione.

Cenàbara 8: una nova bona pro is assòtzios isportivos santantioghesos. Infatis s’amministratzione comunale at detzìdidu de ghetare manu a su palàssiu de s’isport. Cun d-un’interventu de 68mila èuros s’ant a cambiare is gennas e is fentànas, s’ant a pònnere in siguresa is muros prus perigulosos, ant imbrachinare is muros a parte de aintrus e s’at arrangiare sa crobetura in is puntos aundi si infiltrat s’àcua pròina.

Sàbudu 9: in Gonnesa at fatu ispantu sa decisione de su sìndicu Hansell Cabiddu de pònnere Simone Franceschi, chi fiat vicesìndigu de Igrèsias finas a domingu, assessore esternu a su turismu, bilànciu e cultura a pustis de is dimissiones pro motivos personales de Paola Delussu. Su chi at fatu fàghere murros de angione a is gonnesinos est sa nòmina de unu foresu (chi est prevista dae s’istatutu comunale): de siguru Franceschi at traballadu bene in Igrèsias, ma gente mede si dimandat comente siat possìbile chi in Gonnesa no ddoi fessit un’àtera persona capassaa de fàghere s’assessore e is prus polèmicos narant ca Gonnesa est essida fratzione de Igrèsias .

Domingu 10: s’est votadu pro is eletziones amministrativas in 3 comunos de su Sulcis Iglesiente. In Teulada sighit a fàghere su sìndigu Daniele Serra chi cun su 57,90% at bintu sena de problemas contras a s’ex sìndigu de Sant’Anna Arresi e consilieri regionale Paolo Dessì. In Flùmini Majori su sìndigu nou est Fabrizio Miscali chi at pigadu prus de su 60% e nd’at pigadu sa cadira chi fiat de Nando Pellegrini. in Igrèsias invècias si andat a su ballotàgiu: cun su 41% est primu Mauro Usai (PD+cìvicas de area UDC) chi at a isfidare Valentina Pistis de su centru-dereta (28,50%). Su M5S sighit a èssere su primu partidu in Igrèsias ma su 20% non bastat pro arribare a su ballotàgiu. Pigat su 7,8% Carlo Murru (sustènnidu dae listas cìvicas) e pagu prus de su 2% Asmaa Oug chi fiat candidada pro sa Manca Sarda.

Roberto Pinna