NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
18
Sun, Feb
41 Nuovi articoli

Sa cida sulcitana. Dae su 5 a s’11 de freàrgiu

Novas in Sardu (LSC)
Aspetto
Condividi

Sa cida sulcitana in curtzu. Dae su 5 a s’11 de freàrgiu


Lunis 5: In Masainas su Comunu at pubblicadu unu bandu pro donare contributos a is chi ant a pònnere mendulados in s’annada agraria 2017/19. S’idea est cussa de torrare a cualificare su paesàgiu de su sartu e de pònnere a prodùsere fitas de terra chi oi in die sunt isbandonadas. Si prevedit una agevolatzione finas a milla èuros a imprendiores a solos o assotziados chi tengat sa sienda in su territòriu comunale. De siguru custa est un idea bona meda massimamente si tenet in cunsideru su fatu chi sa mèndula est unu de is ingredientes fundamentales de bona parte de is durches de sa traditzione sarda e si osservat chi sa rechesta de custos durches (chi agradant meda siat a is locales siat a is turistas istràngios) est creschende semper e benit a marolla a comperare sa mèndula importada dae continente o inderetura dae s’èsteru.

Martis 6: in Carbònia, a 83 annos s’est ispaciadu Caterno Cesare Bettini chi aiat fundadu e dirìgidu pro prus de 30 annos su cunsòtziu “L’altra Sardegna”. Bettini fiat nàschidu in Mòdena e fiat arribadu in Sardigna in su 1981 de chi aiat fatu viàgios in 3 continentes. Fiat unu professore de geografia turìstica aiat iscritu unas cantu libros a pitzus de sa Sardigna e dd’aiat fata connòschere a tour operator meda; fiat puru unu animadore chi non si firmaiat mai de propònnere ideas e de partetzipare a fieras e atòbios.

Mèrcuris 7: In Narcau est nascende sa Consulta de is Giovànos, chi bollet èssere una aina pro fàghere partetzipare is giòvanos a sa vida de is istitutziones democràticas. S’idea de is amministradores narcaresos e cussa de ascurtare is ideas de is piciocos a manera de programmare in manera cunforma a is propostas insoro siat is manifestatziones culturales e totus is polìticas dedicadas a is prus giòvanus.

Giòbia 8: in Portescusi, Tore Cherchi chi est su coordinadore de su Piano Sulcis, cun su sìndigu Giorgio Alimonda e rapresentantes polìticos e de su sindacadu e una truma de ingegneris, at presentadu su programma pro is bonìficas de su terrenu e de sa falda in sa zona de s’àrea industriale de Portovesme. In totu sunt andende a innantis investimentos chi balent 170 miliones de èuro e a custos tocat a aciùngere àteros 60 miliones pro is costos de gestione. Sende chi custos costos sunt basados a pitzus de unu progetu bèciu (chi depiat durare 5 annos) est fàtzile chi tochit a agiornare costos e sa durada tenende bene in contu is resurtados chi ant a èssire dae is pròssimas cunferèntzias de servìtziu. Est pretzisu a regordare chi totu custu dinari est pagadu dae is siendas chi traballaiant in zona industriale sigundu su printzìpiu giustu “chini incuinat pagat”.

Cenàbara 9: Est arribada una nova bona pro is 21 traballadores da “La Rosa del Marganai” chi cida passada aiant arrìtzidu sa lìtera de licentziamentu: infatis sa de chi is diregentes de sa San Raffaele SPA ant atobiadu cussos de sa ATS regionale in Casteddu ant detzìdidu de revocare is licentziamentos e de circare in pari una solutzione pro sarvare is postos de traballu. De siguru custu est unu sinniale positivu chi ammostrat chi candu is polìticos locales de calisisiat partidu o livellu movìnt totus a una conca arribant resurtados bonos pro totus.

Sàbudu 10: su Comunu de Sant’Antiogu at donare pro 10 annos e a in donu 100 metros cuadros in sa plàgia de Maladroxa a s’assòtziu “Le Rondini” chi traballat cun personas disàbiles. “Le Rondini” at a cuncordare su tretu de plàgia cun totu is cosas chi serbint a is personas malàdias pro chi issas puru potzant andare a si gosare unu pagheddu de mare e de sole in s’istade. In custa manera sa plàgia de Maladroxa at a èssere sa primu in totu sa Sardigna adata a is disàbiles.

Domingu 11: Fiat carnevali e unu pagu in dònnia logu ant fatu isfiladas opuru festixeddas pro is pipios. S’àcua at guastadu s’isfilada de sa giòbia lardajola prevista in Portescusi invècias est andada bene sa festa chi is assòtzios de Perdaxus ant organizadu in su centru sociale cun su cumbidu de tzìpulas e parafritos. Nche fiat gente meda sàbudu a merie in Igrèsias (prus de 2000 màscaras e 21 carros arribados finas dae sa zona de Casteddu – record de presèntzias); est andada bastante bene mancai fessit proende puru sa s’isfilada chi ant fatu in Carbònia. Is manifestatziones acabant su fine de cida chi benit cun isfiladas in Sant’Antiogu e Santu Giuanni Suèrgiu.

In Milanu est incumentzada sa BIT (Borsa Italiana del Turismo) e craramente non podiant ammancare is rapresentantes de sa retza VisitSulcis chi ant a abarrare in sa tzitade lombarda finas a mèrcuris. Sunt previstos atòbios cun su pùbblicu e cun 20 tour operator natzionales e internatzionales.

Roberto Pinna