NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
22
Wed, Aug
25 Nuovi articoli

Sa cida in curtzu. Dae su 15 a su 21 de gennàrgiu

Novas in Sardu (LSC)
Aspetto
Condividi

Sa cida in curtzu. Dae su 15 a su 21 de gennàrgiu

Lunis: s’annu nou est incumentzadu de pagu e VisitSulcis sighit a portare a innantis s’atzione de promotzione turìstica de su territòriu: custa cida passada is rapresentantes de sa retza de impresas e amministratziones locales fiant in sa CMT de Stocarda chi cun prus de 250mila bisitadores est sa fiera turistica prus manna de totu sa Germània. Si cunfirmat cantu giai si scidiat dediora: su Sulcis est unu territòriu connotu ancora pagu e nudda, e mancai no ammanchint is lìmites istruturales (pagus albergos mannos) e infrastruturales (is istradas e finas is portos non sunt bonos) tenet possibilidades mannas de crèschere, massimamente si si circat de avalorare is resorsas ambientales e naturales chi interessant a is turistas amantiosos de sa trancuillidade e de is escursiones.

fogaroni terraseoMartis 16: ddoi fiat gente meda in Terreseu (biddixedda in comunu de Narcau) aundi s’assòtziu Terraseo 2010 cun sa collaboratzione de sa Parròchia at cuncordadu unu bellu fogoroni de Sant’Antoni. In antis de alluere su fogu don Antoni Cherchi at cantadu is cògius iscritos dae su cantadore Pierpaolo Falqui. Duncas est incurtzende su tempus de Carnevale e in medas biddas is assòtzios locales sunt organizende is isfiladas: s’ant a fàghere in Sant’Antiogu, Santu Giuanni Suèrgiu, Santadi, in Masainas e in Igrèsias.

Mercuris 17: in Carbònia dae 2 cidas at serradu su “Centro Disabili” e est torrada a incumentzare sa polèmica politica cun s'opositzione chi imputat a sa giunta comunale de àere serradu un'àteru servìtziu. Is babbos e is mammas de is piciocos si serbint de custu servìtziu ant dimandadu ispiegatziones a su comunu. S’assessora a is servìtzios sotziales L. La Barbera at ispiegadu chi su tzentru at serradu pro mori de chistiones burocràticas (su dirigente de su servìtziu nou at trigadu a arribare in Carbònia) e chi at a abèrrere torra a intus de s’acabu de su mese cun s’idea de allargare su servìtziu puru a àteros comunos de su territòriu.

01 19 Asilo Carlo SannaGiòbia 19: cambiat sa gestione de s’asilu “Carlo Sanna” de Sant’Antiogu. S’amministratzione passat dae su Comunu a s’ Istitutu Comprensivu Istatale “Sant’Antiogu-Caleseda”. In custa manera si sarvat un’istitutzione de importu mannu pro sa comunidade santantioghesa chi fiat arrischende de èsser serrada e si-nde iscabulet s’amministratzione comunale de totu is òneres e protzeduras burocràticas. S’assessore a s’istrutzione pùbblica Rosalba Cossu at ispiegadu chi a lestru ant a incumentzare puru sa “Sezione Primavera” e su “Nido dell’Infanzia”, servìtzios pro is pipieddos prus piticos, chi abarrant a gestione comunale.

Cenàbara 20: in sa biblioteca de Santadi Lorenzo Caterini in pari a s’assessora a sa cultura Simona Garau, at presentadu s’ùrtimu libru suo “La mano destra della storia” aundi provat a ispiegare proite is sardos non connoscint s’istòria insoro. Sa manera de s’autore de trattre custu problema no est tropu pretzisa, finas proite chi oberat ideas bècias de 200 e prus annos (sa “natzione” pro esèmpiu) sena de tènnere in contu is evolutziones de is cuntzetos e is resurtados de is circas prus reghentes in totus is setores chi pertocant sa cultura e s’istòria de Sardigna. Perou est giustu a nàrrere chi, sena de duda peruna, s’autore ponit duas chistiones interessantes e de importu mannu: sa prima est su bisòngiu de comunicare in manera crara a sa gente comuna is resurtados de is circas, sa de duas est s’assentzia in is programmas iscolàsticos de s’istòria e cultura sarda chi sunt fundamentales pro formare cuscèntzias prus atentas.

Sàbudu: S’AIAS At licentziadu pro “giusta càusa” a Michele Serra, chi est unu de is sindacalistas chi fiat protestende contras a sa sienda chi depit ancora 8 mensilidades (7istipèndios e una tredicèsima) a is dipendentes. Serra aiat arritzidu una cuntestatzione iscrita proite chi aiat fatu decraratziones a is òrganos de imprenta chi faghiant dannu a s’azienda. No at trigadu a arribare sa solidariedade de is sìndacados e de is polìtcos locales a su dipendente licentziadu (issu est su de 4 sindacalistas chi at pèrdidu su traballu) chi si chesciat proite chi a parridare sua in 26 annos at sempre traballadu bene e cun cuscèntzia e nche-dd’ant bogadu sceti proite chi est dimandende su rispetu de su diritu de is traballadores de èsser pagados.

10 23 vento impetuosodomingu 21: Custa cida su bentu at suladu a forte meda (at incumentzadu su maestrale chi apoi at furriadu a bentu estu). Parit chi mèrcuris in sa punta de Monte Sèbera apat tocadu 120km a s’òra e domingu ant dèpidu rinviare unas cantu partidadas de is campionados de fubalu. Is travessuras, pagu male, ant iscosciadu sceti calincuna nae de is matas prus mannas sena de àteru dannu e ant fatu su prexu de is fotografos chi sunt andados a tropas a arritratare a is undas chi a bortas fiant prus artas de 4 metros. Pertantis àcua pagu e nudda – sceti calincunu istìddiu sàbudu a note – e duncas is arrios non calant e is digas sunt semper prus isbòidas.
Roberto Pinna