NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Mon, Nov
58 Nuovi articoli

Sa cida sulcitana in curtzu. Dae su 23 a su 29 de mese de ladàmine

Novas in Sardu (LSC)
Aspetto
Condividi

Sa cida sulcitana in curtzu. Dae su 23 a su 29 de mese de ladàmine

Lunis 23: at tentu sutzessu mannu sa de 22 editziones de sa sagra de is olias in Bidda Massàrgia. Sunt aproliadas prus de 4mila personas dae totu sa Sardigna e finas dae Continente pro ascurtare su cuntzertu de su musicista bosniacu Goran Bregovic in fatu S'Ortu Mannu. Non sunt ammancadas is polèmicas proite chi gente meda s’est chesciada pro is prètzios artos meda de is navetas e pro sa pagu organizatzione prus in generale. A custu si agiungit s’opositzione in consìliu comunale chi narat ca pro su chi at portadu a sa bidda s’est ispèndiu tropu (giai 100mila èuros). Su sìndigu Debora Porrà invècias est soddisfada, ammitit ca de siguru nc'at cosa de ammelliorare, massimamente pro su chi pertocat sa comunicatzione cun sa gente chi andat in bidda, e promit chi a lestru s’at a pubblicare su rendicontu de totu sa manifestatzione.

Martis 24: Su sìndigu de Igrèsias Emilio Gariazzo e Aleksandr Studnev chi est su sìndigu de Bobriusk (220mila abitantes in Bielorussia) ant firmadu in sa sala de su Consìliu Comunale su patu de gemellàgiu. Est dediora chi Igrèsias tenet raportos istrintos cun sa Bielorùssia: sunt medas is piciocheddos chi is igresientes ant ospitadu in is domus insoru a pustis de su disastru de Chernobyl e unas cantu de issos sunt istados adotados. Sa tzerimònia at ufitzializadu un’impegnu de collaboratzione in is setores de sa cultura e de su turismu. Sa delegatzione de Bobriusk in prus at atobiadu siat is assòtzios culturales siat unu grupu de imprendidores. A s’acabu de totu su sìndigu bielorussu at cumbidau is igresientes a andare a ddos agatare s’annu chi benit in sa tzitade insoru.

Mèrcuris 25: pro totu sa die sa zona de su Sulcis est abarrada chena de collegamentu internet e sena de lìnnea telefònica. A mangianu in sa SS 126, a pagu tretu de Genna Gonnesa, is operàios de s’ANAS chi fiant cambiende unu guard-rail ant segadu su cavu printzipale de sa TIM e aici nd’ant isturadu su collegamentu internet e citiu is telèfunos fissos cun su prefissu 0781 dae Carbònia a bàsciu. Entes pùbblicos, bancas e postas firmos de su totu; supermercados e totus is atividades cummertziales collegadas a sa retza fissa teniant is POS blocados e podiant regòllere sceti dinari contante. Su guastu dd’ant arrangiadu candu giai fiat iscurigadu.

Giòbia 25: s’est iscipidu ca ocannu in Carbònia non s’at a fàghere sa rassegna de teatru CEDAC 2018. Pro s’Amministratzione carboniesa su costu de sa rassegna est tropu artu e iant a bòllere pònnere totus is resorsas de su setore cultura pro tzelebrare is 80 annos de sa tzitade. Pro gente meda, cunsiderende chi in is annos sa rassegna at semper otentu resurtados de pùbblicu bonos meda (350 abbonados dònnia annu cun medas ispetàculos chi ispaciànt totus is billetos cun gente chi lompiat dae totu sa Sardigna), est làstima a no dda fàghere prus. S’Amministratzione at lassadu aberta s’oportunidade de organizare un’àteru “cartellone” prus baratu coinvolgende is cumpangias locales.

Cenàbara 26: a fortza de manifestatziones e de chèscias is sìndigos sulcitanos ant incumentzadu a otènnere calincunu resurtadu pro sa siguresa de is istradas printzipales de su territòriu chi, est cosa connota dae totus, sunt malipigadas meda. In Casteddu ant torradu a atobiare a su Prefetu e is dirigentes de s’ANAS, de sa Provìntzia de su Sud Sardigna e de su Piano Sulcis e ddis ammostradu unas cantu fotografias chi ispiegant bene sa situatzione de is istradas printzipales sulcitanas. A is sìndigos ant promìtidu de isblocare is protzeduras pro is traballos prus urgentes e chi a lestru ant a incumentzare a pònnere calincunu sapu pro tupare is fossos prus perigulosos.

Sabùdu 27: A pustis de is sutzessos de 2 cidas agoa àteros duos picicocos sulcitanos ant otentu un’àteru resurtadu de importu mannu: su duo Don Leone (Donato Cherchi de Carbònia e Matteo Leone de Caleseda) sunt arribados a su primu postu a s’Italian Blues Challenge in Fermo e duncas su mese de martzu chi benit ant a andare in Norvègia a rapresentare s’Itàlia in su EBU chi est una de is rassegnas prus importantes de mùsica blues in Europa.

Domigu 29: est acabadu custu mese e est acabada puru s’istasone turìstica chi ocannu s’est allonghiada meda. De siguru est istada positiva e finas in custu mese, pro mori de su tempus bonu est abarradu unu bellu pillu de turistas - giai totus istràngios (frantzesos pruscatotu) - chi ant fatu crèschere su nùmeru de bisitadores in is sitos turìsticos prus internos. Pro s’annu chi benit s’isperat chi is resurtados bonos de audience de su su telefilm “L’isola di Pietro” (cun Gianni Morandi protagonista e giradu Sant’Antiogu, Carloforte e Portescusi) torrint in termines de publitzidade pro su territòriu e chi sigant is atziones de promotzione unitària che cussas incarreradas dae sa retza VisitSulcis. De siguru si is operadores de su turismu e is amministradores locales sighint a traballare totus in pari si podet cumentzare a pentzare de trasformare s’economia dae industriale a turìstica e de nde essire dae custa crisi chi paret non bollat acabare mai.

Roberto Pinna