Sa cida sulcitana in curtzu. Dae su 9 a su 15 de Mese de Ladàmine
Lunis 9: Sunt 30 is ammininistratziones comunales sardas chi incora tenint a contu insoru sa gestione de su servìtziu ìdricu, e uanidas in s'assòtziu GASI (gestiones autonomas servìtziu ìdricu) sunt prontas a sighire sa batalla pro non donare a Abbanoa sa gestione de custu servìtziu primàriu. Intru de custas nc’est puru cussa de Nuxis chi cun d-una lìtera a is residentes at ispiegadu ca in custu momentu serbint risorsas finantziarias e in pagos faeddos at dimandadu a totus is residentes de pagare su servìtziu, proite chi si non si pagat su servìtziu etotu, mancai si arrinnesciat a non passare a Abbanoa, s’Amministratzione Comunale no at a pòdere mantènnere s’autonomia ìdrica.
Martis 10:si su contu de chini iscriet custa rubrica est giustu, custa cida (ant incumetzadu a arribare martis), sunt 88 is algerinos isbarcados in su Sulcis. Bona parte ddos ant intercetados in mare is motovedetas de sa Guàrdia de Finantza e de s’Esèrcitu, ma non sunt ammancados is chi sunt isbarcados in is plàgias Portu Tramatzu e Porto Pino. Comente sèmpiri nde-ddos arrigotos is Carabineris e nche ddos lòmpidos a su tzentru de collidura de Assèmini. Mancai su Ministru de s’Internu apat impromìtidu un’acòrdiu cun su guvernu algerinu e su Presidente de sa Regione si chescit custa undada non firmat prus. A dolu mannu, paret pretzisu su dìciu sardu: <>. Pertantis faghet ispantu, e creschet puru s’arrinnegu de sa gente comuna, una pàgina FB algerina in ue si podent biere is vìdeos de is viàgios e finas is fotografias tiradas a unu grupu apena isbarcadu cun is carabineris in divisa.
Mèrcuris 11: Tarcisio Agus, su commissàriu istraordinàriu de su Geoparco, est andende a bisitare totus is comunos chi sunt parte de custu ente subracomunale chi acarraxat totu sa zona de su Sulcis-Iglesienti e de Guspinesu. Agus atobiende is amministradores locales at sinnialadu ca sa situatzione est praticamente uguale a su 2001 candu si fiat su presidente de su collègiu de is sìndigos e non si sunt fatos passos a innantis. S’idea de Agus sua est cussa de incumentzare un’atzione de promotzione a livellu europeu pro totus is sitos chi ruent in su territòriu de su Geoparco e de donare una manu de agiudu (in tèrmines econòmicos) a nde aprontare àteros a manera de crèscere s’oferta pro is turistas e isperat chi totus is amministratziones comunales collaborint totus in pari.
Giòbia 12: is giuntas comunales de Portescusi e de Sa Baronia-Villaperùciu sunt asuta de s’atacu de is opositziones proite chi no ant partecipadu a su bandu regionale pro pònnere in siguresa is arrios. In Portescusi sa magiorantza arrispundit ispieghende ca candu fiat essidu su bandu regionale si fiant apena insediados (su bandu iscadiat su 28 de mese de argiolas) e duncas no nche fiat su tempus de aprontare is ischedas e isperant chi torrint a abèrrere su bandu etot. In Sa Baronia su sìndigu arrispundint chi s’ùfìtziu tècnicu, a curtzu de personale, no at acurtu a aprontare sa dimanda e chi a dònnia manera cun is mezos de s’Unione de is Comunos ant giai fatu interventos e ca nche sunt àteros 60mila èuros postos in bilànciu (fundos comunale, de s’Unione de is Comunos e de sa Protetzione Civile) pro nde fàghere àteros.
Cenàbara 13: sa bibliocabina de Igrèsias est intrada in sciòpiru. Est totu imbuddiada cun su nastru de is cantieris e nc’est puru unu fòlliu de paperi apicadu in ue is giòvanos de s’assòtziu culturale Trevessu, chi ant cuncordadu custa bella cosa, ispiegant is arrexones de sa serrada. Est tropu sa gente chi no at cumprèndidu s’iscopu de s’initziativa: calincunu at pigadu sa bibliocabina a tipu magasinu pro nche lassare enciclopedias e rivistas bècias o ddoi apicat manifestos. Ma custa iat a èssere sa mancu cosa, defatis nc’est puru chini pròpiu no dd’arrispetat: a chini pigat is libros e ddos torrat a bèndere, a chini ddoi lassat àliga a intrus. Is piciocos de s’assòtziu Trevessu si iscusant cun totus is chi ant oberadu sa bibliocabina cun sensu cìvicu e cumbidant totu sa comunidade a ddi donare cura.
Sàbudu 14: In Perdaxus e in Narcau est acabadu su progetu “...Ciak, Kibera” finantziadu dae unu bandu de cooperatzione internatzionale de sa RAS. Artistas, registas e musicistas italianos e keniotas ant fatu unu video, unu documentàriu e un album de cantzones isvilupende is ideas de is ex-pipios de istrada de Nairobi, de is piciocos africanos ospitados in s’istrutura de Rosas e de is istudentes de is iscolas mèdias locales.
Domingu 15: In su campionadu de fubalu de promotzione su Carbònia at bintu in domu 3-1 cun s’Andromeda; su Carloforte at paregiadu 2 a 2 in Arborea. S’Atletico de Villaperùciu at fatu 1-0 in domu de sa Monteponi e imoi est primu a solu in su girone B de prima categoria; in segunda categoria s’Isola di Sant’Antioco bincit 3 a 1 su derby cun s’Antiochese. Est incumentzadu puru su campionadu de serie b de volley: sa VBA Olimpia de Sant’Antiogu mancai apat gherradu in dònnia set at pèrdiu 3-0 in Marcianise (Caserta). In sa sèrie D de Basket est andende bene meda sa Sulcispes chi at bintu 85-62 in Su Masu.
a cura di Roberto Pinna
