Sa cida sulcitana nin curtzu. Dae su 18 a su 24 de làmpadas
Domingu 18: cida passada s’est votadu in 4 comunos sulcitanos e is sìndigos de Nuxis, Carloforte e Portescusi ant giai presentadu is giuntas insoru. In Nuxis Pier Andrea Deias at postu Michele Fanutza vicesìndigu, Romeo Ghilleri a s’ùrbanìstica, Pamela Pubusu a su turismu e Francesco Manca a s’isport. In Carloforti cun Salvatore Pugioni ant a guvernare Elisabetta Di Bernardo (vicesìndigu e polìticas sotziales), Stefano Rombi (traballos pùbblicos), Aureliana Curcio (cultura e turismu), Gianfranco Grosso (isport), Giovanni Verderosa (servìtzios tecnològicos). Giorgio Alimonda at cunfirmadu Ignazio Atzori vicesìndigu, at donadu s’incàrrigu de su turismu a Giorgia Marroccu, Orietta Mura (sa prus votada de totus) at a sighire is polìticas sotziales, cumpletant sa giunta Attilio Sanna (traballos pùbblicos) e Enrico Atzei (traballu e indùstria)
Lunis 19: est incumentzende sa mobilitatzione pro sa Portovesme srl. In sa sala de is riuniones de su consòrtziu s’est fata una riunione cunvocada dae su sìndigu de Portescusi aundi s’est ispiegada sa situatzione: serbit chi andit a innantis, e a lestru puru, s’iter pro chi si fatzat una discàrriga noa in Genna Luas (in comunu de Carbònia), proite sinuncas in su mese de cabudanni s’at a firmare sa produtzione de cussa fàbbrica.
Martis 20: S’amministratzione comunale de Bidda Massàrgia at annuntziadu chi a lestru ant a incumentzare is traballos pro su tzentru intermodale nou in s’istatzione de is trenos. S’at a modernare s’internu de s’istatzione e in foras s’ant a fàere parchègios e àreas birdes.
Mèrcuris 21: Ignazio Locci at anuntziadu sa giunta chi at guvernare Sant’Antiogu. Eleonora Spiga est su vicesìndigu cun dèlega a is polìticas sotziales, Renato Avellino sighit su cummèrtziu, Rosalba Cossu sa cultura, a Roberta Serrenti s’isport e su turismu, a Francesco Garau ddi tocat s’ambiente e is traballos pùbblicos. Sa dèlega de su bilànciu abarrat a su sìndigu etotu chi at cunvocadu su consìliu comunale su 3 de mese de argiolas pro s’insediamentu. S’Amministrazione no at mancu acurtu a incumentzare ca su grupu de Genti Noa (chi est lòmpidu segundu pro 250 votos sceti) est partidu a s’atacu: defatis ant cuntestadu sa data de cunvocatzione narende chi in totus is àteros comunos is giuntas sunt traballende giai dae una cida e chi in Sant’Antiogu s’est perdende tempus.
Giòbia 22: acabat un’àtera cida difìcile pro su M5S carboniesu. Lunis s’est dimìtidu, a pustis de sa polèmica pro is post sessistas aparèssidos in d-unu grupu Facebook, su presidente de su Consìliu Comunale Massimiliano Zonza (ancora non si scit chini at a pigare su postu suo). In prus s’est scìpidu chi su vicesìndigu e assessore a s’ambiente Gian Luca Lai traballat dae 2 meses pro unu consòrtziu de impresas chi at bintu s’apaltu pro is bonìficas pagadas dae una sienda prus manna chi at fatu dimanda pro fàere una discàrriga noa in Genna Luas. Duncas unu grupu de ativistas de su M5S at fatu essire unu documentu aundi dimandat si su vicesìndigu tengat calincunu conflitu de interessu. Lai at decraradu chi at giai circadu sa parridade in contu de sa positzione sua a s’ANAC (Autoridade Nazionale Anti Corrutzione) e chi si nche sunt problemas est prontu a lassare s’incarrigu polìticu. Petantis su sìndigu Paola Massidda at fatu pubblicare in su situ de su Comunu una lìtera aundi contat is resurtados de su primu annu de mandadu amministrativu.
Cenàbara 23: is isbarcos de algerinos in su Sulcis ormai sunt normales, sa nova est ca 2 barcas sunt intradadas inderetura in is portos sulcitanos. A merie 5 òmines e 1 fèmina sunt arribados in su portu de Teulada; faci a is 11 de note una barca partida dae Hannaba est lòmpida in su portu de Sant’Antiogu. Sa Guàrdia Costera nde-ddos at arrigotos e intregados a is Carabineris. A custos tocat a nde aciùngere àteros 4 isbarcados in sa plàgia Porto Pino. Comente semper is Carabineris nche-ddos lòmpidos a su tzentru de collidura de Assèmini.
Sàbudu 24: ddoi fiat puru s’obispu Giovanni Paolo Zedda in sa festa chi s’est fata in is giardinos pùbblicos de Igrèsias pro s’acabu de su Ramadan. Sa festa dd’ant organizada unas cantu assòtzios chi traballant in su sotziale (intru de custas Casa Emmaus). S’obietivu fiat cussu de promòvere sa conoscèntzia e su rispetu de totus is fides religiosas.
Roberto Pinna
