SA CIDA SULCITANA IN CURTZU Dae su primu a su 7 de gennàrgiu 2017.
Domingu 1: in sa plàgia de Funtanamare, comente est ormai traditzione dae su 2002, una bintina de personas, ominis e fèmminas, giovànos e antzianos no ant tìmiu su bentu fridu e s’àcua ghiaciada e si nci sunt ghetados a s’àcua. S’eventu dd’at organizadu dae s’assòtziu “Amare il Mare” de Igrèsias cun su patrociniu de su Comunu de Gonnesa. Su tema de ocannu fiat sa solidariedade pro is personas pagu fortunadas. A s’essida de s’àcua unu brìndisi e una fita de panetoni totus in pari, acabussadoris e ispetadores, pro si nche fàere is augùrios de annu nou.
Lunis 2: S’annu nou no est incumentzadu bene pro su chi pertocat su traballau. Defatis dae oe is 525 traballadores de s’Ati Ifras sunt licentziados e sichei abarrant serrados is cantieris de is sitos archeològicos de Sant’Antiogu, de su su nuraghe de Seruci in Gonnesa, de Monte Sirai in Carbònia e de sa necròpoli de Pani-Lòriga in Santadi. Sena de fàere nudda puru is chi traballaiant in birde pùbblicu in Domus Noas e in s’area de s’ex miniera de Rosas in comunu de Narcao. Pro imoi s’ùnica siguresa pro custos traballadores est s’indennidade de disocupatzione finas a candu no ant a intrare in s’IGEA a tempus determinadu, e apoi sa dita chi at a gestire is traballos de su Geoparco ddos iat a dèpere arregòllere torra. S’ispera de totus est chi si coitit cun is proceduras proita ca nc’at su perìgulu mannu chi si-nde isperdat s’ispecializatzione e sa professionalidade manna de custos operaios.
No abastaiat sa mala nova de su traballu pèrdidu dae is operaios de s’Ati Ifras, est lòmpida puru un’àtera bussinada a faci de is sulcitanos. Defatis su commissàriu istraordinàriu de sa provìncia de su Sud Sardigna at cunfirmadu s’aumentu de s’alìcuota provìnciale pro sa RC auto in su Sulcis Iglesiente: si passat dae su 12,5% a su 16%. Custu bollet nàrrere, sigundu su SNAA (Sindacadu Natzionale Agentes Assigurativos) chi at a tocare a pagare prus cara s’assiguratzione pro unos 92.000 veiculos (màchinas, autocarros, motos e àteros veìculos) e in totu in is cassas de sa provìncia de su Sud Sardigna ant a intrare 1milione e 200mila èuros. Su commissàriu Giorgio Sanna at nadu ca custu providementu est dolorosu ma bollet fatu a marolla proite ca s’Istadu centrale non est prus donende dinari a is entes intermèdios chi sighint a mantènnere is funtziones insoru istabilidas dae sa lege e duncas pro garantire si servìtzios mìnimos tocat a crèscere is tassas.
Martis 3: Dae su primu de s’annu in duas notes sunt lòmpidos 46 algerionos in is costas de Sant’Antiogu e in sa plàgia de Porto Pino. Is chi ddos ant bistos ant tzerriadu is Carabineris chi nde-ddos ant arregotos e nche-ddos lòmpidos a is centros de collidura de Casteddu e de su Campidanu.
Mèrcuris 4: sa classe 2A de s’iscola Antioco Manai de Sant’Antiogu at bintu su primu prèmiu de su “Corto Festival” in Roma. Pro imoi non sunt andados a nde ritirare su prèmiu proite ca s’iscola non teniat su dinare pro pagare su viàgiu. Duncas, cunsiderada sa situatzione, sa giuria at detzididu de abetare a su mese de maju chi benit pro sa premiatzione a manera chi s’iscola santantioghesa agatit su dinari chi serbit pro nche mandare a Roma sa classe cun sa professora Barbara Sitzia chi at sighidu su progetu. In su filmixeddu ideadu, scenegiadu e interpretadu dae is alunnos etotu si contat s’istòria de unu pipiu autìsticu.
Giòbia 5: 4 giòvanos de Sant’Antiogu e 1 de Masainas ant a partecipare a su progetu “Promemoria Auschwitz Sardegna 2017”, finanziadu dae is Comunos de Sant’Antiogu e de Masainas in collaboratzione cun s'ARCI Sardegna e con assòtziu torinesu “Deina”. Custu progetu est unu camminu abundi is chi partecipant tenent s’oportunidade de fàere su viàgiu in trenu finas a Auschwitz e de atobiare àteros piciocos e piciocas e de arresonare totus in pari a pitzus de is temàticas istòricas e sociales de cussos annos malos chi ant bistu miliones de personas isparèssere pro more de su machìmine de is òmines, Un’oportunidade manna pro is giòvanos dae 18 a 25 annos chi bollent fàere custa esperièntzia. Nc’at tempus finas a is 3 de meigama de su 10 de gennàrgiu pro fàere sa dimanda. Dae su 12 de gennàrgiu ant a cumentzare is collòcuis motivatzionales pro scioberare is chi ant andare a fàere su viàgiu.
Cenàbara 6: Su Comunu de Sant’Antiogu at ghetadu su bandu pro donare is contributos pro is assòtzios isportivos e pro is contributos pro su diritu a s’istùdiu (borsas de istùdiu e contributos pro is libros de testu). Tot’e duos is bandos iscadint su 31 de gennàrgiu. Invècias in Narcau su Comunu at abertu su bandu pro agiudare is incuilinos morosos sena de curpa, est nàrrere is personas chi ant arricidu un avisu de isfratu esecutivu proite ca non podiant prus pagare sa pesoni de sa domu. Nc’at tempus finas a su 31 de gennàrgiu pro presentare sa dimanda.
Sàbudu 7: Cun su presèpiu bivente fatu dae 80 personas in Sant’Anna Arresi sunt acabadas is festas de ocannu, chi assumancu in su Sulcis, nche sunt passadas in trancuillidade e sena de fatos de crònaca eclatantes. Si pròpiu nc’at calincuna cosa de sinnialare, est cunfronta a s’annu passadu, est su tempus malu chi est lòmpidu cun s’annu nou: àcua nudda, dies de bentu forte oru de mari e cilixia in is campos.
Fatu istat ca in dònnia bidda o citadi, si sunt organizadas festixeddas (cun Babbo Natale o cun sa Befana de mesu, a logos fiant inderetura is Tres Urreis comenti bollet sa traditzione sarda prus sintzilla) pro is pipios e finas pràngios o cenas pro is antzianos. Totus custos eventos fiant ocasiones de agregatzione organizadas giae sempre dae grupos de volontàrios cun pagu dinari, chi ant tentu sucessu mannu in dònnia logu. Custu de siguru est unu sinniale de vitalidade forte de is comunidades nostras, chi mancari sigat a ammancare su traballu, s’ammostrant dignitosas e solidales e unidas in manera forte.
Roberto Pinna
