Sa Cida Sulcitana in Curtzu Dae s’11 a su 17 de mese de Idas in limba sarda comuna
Domingu 11: in Carbònia est acabada sa fiera de is editores sardos. Nc’est istètia una discreta presèntzia de pùbblicu chi at pòtziu ascurtare presentadas de òperas noas e de tradusiduras de òperas clàssicas. Invècias in Sant’Antiogu est acabada sa de XX editziones su festival de cortometràgios “Intrecci mediterranei”. Sempre in Sant’Antiogu at tentu sucessu mannu Su Nascimentu, su presèpiu bivente chi at bistu sa partecipatzione de prus 300 figurantes chi ant trasformadu s’Arruga de is Grutas in d-una Betlemme pitichedda.
Lunis 12: parit chi s’unda de gente chi partit dae s’Algeria e chi arribat a in sa costa sulcitana non bollat acabare prus. Intr’e note una motovedeta de sa Guardia Costiera de Sant’Antiogu at agiuradu una barca in dificoltade. Ant carrigadu is 22 òmines chi fiant in sa barca e nche ddos lòmpidos a terra e s’incras nche ddos acumpagiados a Casteddu pro s’identificadura.
Martis 13: ant fatu iscàndulu mannu is fotografias pubblicadas in Facebook de una persona chi fiat droghende-sì a siringa in su parcu de bia Sanzio in Carbònia. Gente meda est acimbellada proite ca s’eroina, chi in is annos 80 e 90 at rovinadu personas meda e is famìlias insoro, est torrende in su Sulcis (ant arrestadu a 2 personas pro su possessu de cussa sustàntzia). S’ispera de totus, massimante de babbos e mamas de fàmilia, est chi is Fortzas de s’Òrdine intervengant a lestru pro istruncare prontamente custu fenòmenu e chi si torrit a donare informatziones precisas a is prus giòvanos. Invècias is Fortzas de s’Ordine cumbidant is citadinos a denuntziare a issos calesisiat problema o situatzione de perìgulu in logu de iscriere in is social network pro chi potzant intervènnere a lestru.
Mèrcuris 14: sa RSU de s’Eurallumina at incumentzadu s’ocupatzione de s’assessoradu de s’Ambiente, e sunt abetende sa risposta chi s’ENEL iat a dèpere donare a sa RUSAL pro sa fornidura dereta de su vapore chi serbit pro fàere torrare a partire is impiantos.
Is carabineris de Carbònia cun su personale de sa Motovedetta CC 707 sighint a averguare is indennizos a is piscadores donados in is annos passados. Cust’orta est tocadu a fèmmina de Santu Giuannu Suèrgiu a èssere denutziada pro trufa. Sa fèmmina aiat dimandadu (e otènnidu) s’indennizu pro 6 meses de meses de atividade mancai apat fatu sceti una prova de 7 dies.
Giòbia 15: sa decraratzione sessista in pubblicada in Facebook dae Massimiliano Zonza, chi est su presidente de su consiìliu comunale de Carbònia, in contu de s’ex e Maria Elena Boschi imoe “promòvida” a ministru, at lassadu gente meda ispantada. De siguru custa decraratzione non faghet onore a Zonza, massimamente de chi in Carbònia etotu su 25 de su mese passadu ant fatu sa giorronada contras a sa violèntzia a pitzu de is fèmminas. Est giustu a nàrrere chi Zonza s’est iscusadu siat cun sa Boschi siat cun totus is fèmminas chi sunt intèndidas ofèndias dae is faeddos suos.
Est craru ca su clima polìticu avelenadu a livellu natzionale e totus is tontesas chi sunt bessende a pillu in is social networks sena de nisciunu controllu sunt intoschende sa conca de gente comuna. A parridade de chini iscriet tocat a si firmare unu pagu a resonare a pitzu de cali si ollat chi siat cosa, a manera chi, assumancus pro custas festas imbenientes, nche siat unu pagu de serenidade in prus pro totus.
Cenàbara 16: Est lòmpida sa risposta positiva de s’Enel e duncas is traballadores de s’Eurallumina ant lassadu sa sala de is riuniones de s’assessoradu a s’ambiente. S’ENEL at iscritu ca pro imoi non si podet trasferire su vapore ma at postu a dispositzione su carbonile suo pro fabricare una centrale a crabone noa. Duncas podet torrare a cumentzare s’iter de valutatzione de impatu ambientale chi iat a dèpere acabare in su mese de gennàrgiu 2017.
Sàbudu 17: In Igrèsias, a is 11 de mangianu, is sìndigos de 23 comunos de su Sulcis Iglesiente e de su Guspinesu, de fronte a su notaiu ant firmadu s’atu costitutivu de sa Fundatzione de su Camminu de Santa Bràbara. A is 4 de merie, in pratza Sella ant postu sa primu perda de su camminu e a is 5 s’est fata sa presentatzione de totu su Camminu de fronte a 10 giornalistas chi traballant in is testadas natzioanales prus importantes chi fiant sighende s “educational tour” de is camminos de sa fide prommòvidu dae sa Regione Sardigna.
a cura di Roberto Pinna
