Est acabende sa campagna eletorale pro is eletziones regionales de su 25 de friàrgiu e dae “Continente” sunt calados puru is leaders polìticos natzionales: s’ùnicu chi at istressiadu in su Sulcis est Matteo Salvini chi at fatu comìtziu e cena manna in Narcau. In su mentres sighint is fibrillatziones in sa magiorantza de Igrèsias. Fiant giai passados a su grupu mistu Federico Melis e Gianna Concu elìgidos in sa lista “Mauro Usai Sindaco” (ca no ddos ant carculados in is scioberos polìticos), pustis est essidu Simone Pinna (candidadu cun Renato Soru) chi at lassadu is Progressisti e avatu est andadu Marco Loddo chi at lassadu su PD. A cantu parit Alessandro Lorefice puru non escludit de lassare sa magiorantza. Duncas a sigunda de a comente ant a andare is eletziones regionales est capassu chi sa magiorantza chi at triunfadu mancu ses meses a coa perdat àteros consilieris.
Is energias annoàbiles sunt essidas argumentu de campagna eletorale e in su mentris arribant novas a pitzus de impiantos eòlicos chi siendas mannas iant a bòllere pònnere in su Sulcis. Sa subraintendèntzia ispetziale pro su PNRR at bociadu su parcu “Sud Iglesiente”: fiant prevèdidas 7 palas artas 210 metros ma custas andant a distruère s’echilìbriu de su paesàgiu. Est essidu a pillu chi puru in su territòriu de Villaperùciu, in is montigheddos chi iscudint a sa diga de Montepranu, sa sotziedade Sardaeolica (chi est parte de su grupu SARAS) iat a boller pònnere 10 rotores (potèntzia totale de 72 megawat) in d-una zona chi est bona sceti pro su pastura ma chi est prena de sitos archeològicos de dònnia edade cun is protzeduras de averiguamentu chi sunt giai incarreradas a su Ministeru de s’Ambiente. Su Ministeru de s'Ambiente etotu at circadu acraramentos a sa Enel Green Power a pitzus de su parcu de 42megawat chi iat a boller fàere intr’e Bacu Abis e Cortoghiana e duncas pro imoi e tanti sa valutatzione de impatu ambientale s’est firmada.
Est craru a totus ca sa dipendèntzia dae is combustìbile fòssiles est perigulosa pro s’ambiente a livellu globale e fintzas pro sa siguresa energètica natzionale, duncas benit a marolla a agatare maneras alternativas pro prodùsere energia. Ma est berus puru chi su pesu de custa produtzione non podet èssere iscarrigadu totu asuba de is comunidades locales sena de ddas tènnere in cunsideru, sende chi a pitzus de custas òperas detzidit su Guvernu tzentrale. Bortas meda aparessint istruturas mannas chi guastant su paesàgiu e is tzitadinos no nde tennint nudda. Duncas iat a esser cosa bene fata a iscriere in manera crare in sa lege de lassare bene e servìtzios (is chi in economia si narant “royalties”) in proportzione a su faturadu pro favorèssere s’isvilupu de is comunidades chi perdint su paesàgiu insoru (in custu casu si narat esternalidade negativa).
In Villaperùciu ant incumentzadu traballos in duas arrugas de su tzentru urbanu. S’interventu balet 350mila èuros chi sunt arribados dae su PNRR gràtzias a s’impegnu de is ufìtzios comunales: depint torrare a fàere s’asfartu e arrangiare su marciapiedi in s’arruga de campusantu e in s’arruga chi tirat conca a su furriadòrgiu de Terratzu.
Custu domingu passadu fiat su domingu de segare is pingiadas e duncas est acabadu carnovali puru. Sàbudu ant fatu isfiladas in Masainas, in Sant’Antiogu e in Bidda Massàrgia chi gràtzias a su gemellàgiu cun is màscaras venetzianas sa bidda s'est prena de gente. Domingu est andada gente meda puru a Teulada a bìere is mascaras de sa traditzione sarda e ant fatu festa manna e bella in Igrèsias: ddoi fiant 17 grupos organizados unos 800 figurantes chi ant fatu su giru de sa tzitade cun d-unas cantu milla personas chi si sunt gosados s’ispetàculu de sonos e colores in Pratza Sella e, a ora de iscurigare a comente bollet sa traditzione, ant postu fogu a Norfieddu, su mustajone de linna e istràcius chi est su sìmbulu de su carnovali de is cresientes.
a cura di Roberto Pinna
