Custa cida passada in totu su Mediterràneu otzidentale est arribadu Cèrberu, s’anticilone nordafricanu chi is metereòlogos ant postu a comente su cane a tres concas chi in sa mitologia custodiat s’intrada de s’inferru. Duncas dae lunis at fatu basca manna meda cun is temperaduras màssimas chi mèrcuris sunt lòmpidas a prus de 40 grados (43 e prus marcados in is istatziones mèteo de Igrèsias e Santadi) e sceti in s’oros de mare bentuliados fiant prus bàscias de unu 5-8 grados. Is dies infatu si sunt registrados valores prus bàscios ma s’ùmididade arta meda in s’àiri at furriadu totu a cama lòina chi fiat peus puru. Cenàbara e sàbudu at fatu unu pagheddu de bentu e nos at lassadu torrare sulidu ma dae domìnigu est arribande Caronte, un’ àteru anticiclone chi tenet su nùmene de su barcaderi chi nche sartaiàt is ànimas de is dannados a s’inferru. Custu puru est impromitende “bene”... Eus a biere ita nd’at a bènnere e ispereus chi no nde lompat Lutzìferru puru!
S’assòtziu de Protetzione Civile TerraMare dae Carbònia movit in manera definitiva a Caleseda. Intr’e is arrexones de custu scioberu ddoi at sa mancàntzia de locales adeguados pro ospitare totus is mezos (idròvoras, grupos eletrògenos, gazebos e gommones). Infatis s’ex masellu de bia Lubiana non est in cunditziones bonas e s’ex albergu de bia Mazini est cumpartzidu cun sa Politzia Municipale e àteros assòtzios sìmbiles (Radio SER Carbonia e Athena) e duncas no ddoi at logu bastante pro totus. Dae inoghe sa detzisione de andare a Caleseda aundi sunt ospitados in d-unu locale comunale giae dae su 21 de maju cun s’obietivu de fàere puru sucursu a mare.
In Bidda Massàrgia e in Carbònia ant fatu unas cantu manifestatziones pro regordare is 170 annos dae s’istitutzione de su Comunu de Serbariu. Infatis in su 1853 sende chi sa popolatzione de is sartos sulcitanos fiat creschende meda, su guvernu sabàudu aiat detzìdidu de pònnere òrdine in s’amministratzione locale e duncas aiat istituidu 6 comunos autònomos in su Sulcis. Intru de custos ddoi fiat puru Serbariu (is àteros fiant Portescusi, Biaddiarriu, Pramas, Santadi e Narcau) e nd’aiat distacadu bona parte de su territòriu de su Sulcis de Bàsciu dae su controllu amministrativu de Bidda Massàrgia. Serbariu at abarrare sea comunale finas a su 1938 candu s’istadu fascista aiant fundadu Carbònia (chi nd’at aciapare fintzas a s’acabu de sa segunda gherra mondiale fintzas Portescusi). E duncas martis in sa Domu Fenu de Bidda Massàrgia, a intrus de su festival “Radici” ant fatu unu bellu cunvegnu aundi espertos e sìndigos ant arrexonadu de istòria locale, bistimentas traditzionales e amministratzione pùbblica. Invècias sàbudu e domìnigu, su Comitadu de Cuartieri, in Serbariu etotu at organizadu sa sagra de is maloreddus e de is sapueddus (sa pasta tìpica sulcitana fatos a pasta de civraxu nieddu pagu ispongiada e ghetados deretos a s’àcua buddendi) e ispetàculos de ballu e de cantu sardu chi ant tentu unu discretu sutzessu de pùbblicu.
In custas dies passadas in su situ web de un’agentzia immobiliare manna est aparessidu un’annùntziu chi parit pròpiu una befa. Infatis chini tenit dinai si podit comporare Sa Màchina Bècia, su fàbbricu chi ant pesadu in su 1870 in Sedda Modditzis e chi ospitaiàt is machinàrios pro nde bogare su minerale dae miniera. S’agentzia pro totu su dominàriu – descritu che unu casteddu (assimbilat diaderus a su de Salvaterra) cun 12 locales chi acarràrgiant 3800 metros cuadros – circat pagu prus de 442mila èuros e at fatu ischire chi su fàbbricu apartenit a unu privadu e duncas si podet bèndere chena de problemas. Custa nova at fatu ispantu mannu, ma Mauro Usai, su sìndigu de Igrèsias at nadu ca est pagu preocupadu pro custa chistione, sende ca est bene unu bene identitàriu e duncas non podet èssere mudadu in nisciuna manera mancai acabit in manos privadas.
Roberto Pinna
