Sa cida sulcitana in curtzu. Dae su 27 de martzu a su 2 de abrile
No arribant novas bonas pro sa crisi de sa Portovesme srl. Sa sienda no at atzetadu is propostas fatas dae su Guvernu pro abasciare su costu de s’energia (unu crèditu de imposta de 2 miliones de èuros pro is pròssimos 3 meses). In su mentris creschet sa tensione de is traballadores cun is protestas insoru chi sunt torradas in is crònacas natzionales e ant arricidu sa solidariedade de su presidente Solinas chi at impromìtidu de non ddos lassare a solos. In prus sunt provande a cuncordare un’àteru atòbiu in Roma circhende de fàere arribare is concas mannas de sa Glencore, su multinatzinale isvìtzera chi est sa mere manna de totu. Sunt pretzisos is faeddos chi at nadu in d-un’intervista a L’Unione Sarda su predi de Portescusi don Antonio Mura: chini podet sarvare is postos de traballu non pentzat a sa vida de is personas – ca su traballu est dignidade – ma castiat sceti a cantu dinai ddi torrat in càscia e a pustis de annos e annos de pagu siguresa est arribada s’ora de agatare solutziones definitivas.
S’amministratzione comunale de Piscinas at detzìdidu de donare unu contributu econòmicu de 1800 èuros in favore de is assòtzios culturales e entes chi traballant in su territòriu e registradas in s’albu locale, pro su faimentu de unos cantos murales a manera de fàere sa bidda prus bellixedda. In Tratalias invècias bolent provare a donare vida noa a sa bidda bècia: cun d-una indàgine informale is gestores de su brugu bèciu circant assòtzios culturales e de arricreu, artisanos e cummertziantes chi bollant fàere is atividades insoru in is domos chi sunt abarradas isbòidas.
Giòbia passadu Micheli Ladu, in sa biblioteca de Portescusi, at presentadu su romanzu Riu Mannu. Est unu libru piticheddu in sa forma ma mannu meda de sentidu, chi movende dae un’esperièntzia chi ant fatu totus is sardos chi sunt nàschidos fintzas a su 1985 (sa bìsita militare) tratat in manera lèbia e bortas meda irònica chistiones chi definint s’identidade de sa Sardigna e de is sardos: dae sa bisura de s’istòria “apillada” fata dae is dominadores istràngios, passende pro su cuntzetu de distàntzias linguìstica e geogràfica chi est manna meda candu seus in is logos nostros e praticamente isparesset cando seus foras de Sardigna, fintzas a arribare a s’idea de su falsu mitu de “su connotu” chi arriscat de ingannare a nosu etotu. Riu Mannu est fintzas un’esperimentu linguìsticu: s’autore, isfrutende sa geosinonimia e sa richesa de su lèssicu, at provadu a nche ghetare unu ponte a pitzus de s’arriu de sa lìmba sarda chi est mannu de diaderus.
Is comunos de Narcau, Giba, Tratalias, Nuxis, Piscinas e Perdaxus ant acabadu o sunt incarrerende is protzeduras de intrega de su finantziamentu de 120 mila èuros (in mèdia unus 20mila èuros a dònnia comunu) dae su PNNR pro su faimentu de nou o pro cumpletare àreas atretzadas pro atividades isportivas individuales o de grupu in parcos pùbblicos.
Su primu de abrili fiat sa die de contare fàulas e is operadores de su Sistema Museale de Santadi ant fatu bella brulla. In sa pàgina Facebook insoru ant postu sa fotografia de una “arresoja” preistòrica iscoberta in Germania narende chi dd’iant agatada in sa gruta de Monte Meana e chi fiat sa pu prus antiga de su mundu e chi fiat in espositzione in su Museu Archeològicu. Gente meda nc’at crètidu e ant incumentzadu a cumpartzire su post chi in duas dies, mancai is operadores etotu apant nadu ca fiat brulla, est arribadu a prus de 100mila personas. Custu post fatu iscracàlliare gente meda, calincunu nc’est abarradu male e s’est arrinnegadu, ma de siguru at fatu connòschere su Museu Archeològicu de Santadi: mancai non siat mannu meda, est su logu perfetu pro si fàere un’idea crara meda de 4000 annos de preistòria, protostòria e istòria de su Sulcis de Bàsciu e duncas cumbenit de diaderus a andare a ddu bisitare.
Dòminigu chi benit est Pasca Manna: arribit a totus is chi ligint custa rubrica s’augùriu de passare custas dies de festa in paghe, salude e allegria!
sa cida sulcitana in curtzu
A cura di Roberto Pinna
