Sa cida sulcitana in curtzu
In S.G. Suèrgiu, a pustis de 3 annos de arresonos de s’amministratzione comunale cun Abbanoa, ant incomentzadu is traballos pro adeguare su collegamentu a su depuradore de is fognas de is fratziones minores chi si agatant a giru de s’istradone provintziale chi dae sa Calcidrata andat conca a Matzàcarra e Portesucsi. Is traballos ballent 730mila èuros e sunt finantziados diretamente dae su bilànciu comunale e iant a deper acabare in 7 meses.
Est arricu meda puru su programma de “CineSulky - L’arena, il cinema, le stelle” organizadu dae s’assòtziu il Calderone cun su sustegnu de sa CSC de Carbònia e s’Amministratzione comunale de Sant’Antiogu. Infatis dònnia giòbia, a incumentzare dae su 9 de mese de argioas e fintzas a su 9 de cabudanni s’at a fàere una proietzione in s’Arena Fenìcia de film chi ammostrant una visione diferente de su mundu. S’intrada costat 4 èuros (3 èuros fintzas a 21 annos) e su billetu si podet comporare in su buteghinu opuru in su centru servìtzius de su territòriu de via Roma.
Su primu de mese de argiolas, pro su de 3 annos de sighidu, ant incingiadu su bandiera asulla in sa pràgia de Maladroxa. Sa bandiera asulla est sinònimu de bonas pràticas ambientales, de atzessibilidade e de cualidade arta meda de s’abba. Fintzas a su 31 de austu s’ant a cuncordare medas initziativas de educatzione ambientales in pari a su CEAS de Sant’Antiogu, s’AICS e sa delegatzione de MareVivo Sud Sardigna.
Sàbudu, a pustis de s’undada manna de 3 cidas a coa, ant torradu a arribare algerinos in su Sulcis. Sàbudu a note in 5 sunt isbarcados in Tuerredda, in territòriu de Teulada, e nde-ddos ant pinnigados is Carabineris chi ant scercuestadu puru sa barchita de vetroresina chi teniat unu motore de 30 cuaddos. In grofu de note sa Politzia at firmadu 5 personas a pagu tretu de Bruncu de Tèula, in comunu de S. G. Suèrgiu, chi fiant impunnende conca a Carbònia. A custos 10 tocat a nde aciungere 8 chi sunt isbarcados Porto Pino e 10 chi chi at intertzetadu a-i largu de Sant’Antiogu sa Guàrdia de Finantza. Comente semper nche-ddos ant lòmpidos a su tzentru de collidura de Muristenis pro incarrerare is protzeduras de identificadura e espulsione.
Semper sàbudu sa bona sorte s’est torrada a firmare in Càrbonia aundi ant intzertadu unu “5 Stella” de su Superenalotto. In oras bonas a su fortunadu chi nde aciapat prus de 644mila èuros. Eis a perdonare ma chini iscriet custa rubrica pentzat ca sa mellus manera de bìnchere est a non ghetare dinari in su giogu de azardu.
Domìniga a mengianu est sutzèdida una tragèdia manna in Carbònia. Una picioca de 16 annos s’est morta in d-unu incidente de màchina acuntèssidu faci a is 4 de chitzi in s’ingruxada de via Gramsci cun via Costituente aundi sunt abarradas ingortas àteras 4 personas e 2 de custas ddas ant ricoveradas in còdighe arrùbiu in s’ispidale Sirai de Carbònia. Is Carabineris sunt traballende pro cumprèndere sa dinàmica de s’incidente.
Agiornamentu covid-19. In su mentris chi andat a innantis sa campagna de vacinatzione is sìndigos de Portescusi e Domunosa ant fatu ischire chi in is comunos insoru no nc’at prus positivos. Dae is àteros comunos de su territòriu no arribant datos e duncas nisciuna nova est bona nova! S’emergèntzia no est acabada ancora e depeus semper abarrare atentos mancari no nche siat prus s’òbbligu de sa mascheredda in logu abertu. Abarrade sanos!
