sa cida sulcitana in curtzu. Dae su 14 a su 20 de làmpadas
In cabudanni s’at a votare non sceti in Carbònia ma fintzas in àteros 7 comunos sulcitano. in Narcau non si torrat a candidare Danilo Serra: cun d-una lìtera a is paisanos suos at annuntziadu chi lassat sa polìtica locale pro si dedicare de su totu a su traballu e a sa famìlia. Si cunfirmat su chi si ischidiat in antis de su rinviu: s’abogadu Antonello Cani e sa dotora Maria Rosa Montixi tenent giae is listas cumpletas e ant incumentzadu sa campagna eletorale. In Gonnesa invècias s’isfida at a essere intr’e Hansell Cabidu chi circat sa cunfirma, s’ex sìndigu ex consilieri regionale de su PD Pietro Cocco; at donadu sa disponibilidade sua puru s’ex consilieri comunale Antonello Casu ma pro imoi e tanti no nc’at nudda de ufitziale.
Mèrcuris 16 s’est ispaciadu a 91 annos monsignor Tarcisio Pillola. Nàschidu in Pramantelu, dd’iant fatu predi in su 1954, in su 1986 dd’iant fatu obispu e at ghiadu sa Diocesi nostra dae su 1999 a su 2007, fundende in su 2000 su Sulcis Iglesiente Oggi. In ùrtimos annos biviat in Casteddu e fintzas a candu sa salude si dd’at permìtidu at sighidu a tzelabrare sa missa in sa crèsia de is Santos Perdu e Pàulu in su cuartieri de Is Mirrionis.
Dae giòbia 17 ant torradu a pònnere su dòpiu sensu de circulatzione in sa SS 126 in su tretu de is fangos arrùbios: su lìmite de velotzidade est postu a 20km/h cun divietu de sorpassu pro permìtere de fàere is traballos de ponimentu in siguresa. In su mentris ant torradu a abèrrere puru sa SP 77 (Perdaxus-Tratalias): su tretu chi dae Santu Leonardu arribat a Gùturu Ponti (aundi ddoi est s’sistressiadòrgiu pro Villaperùciu-Santadi) imoi est perfetu, sceti ca passada s’ingruxada s’istradone est torra prenu de fossos (a bortas longos 1 metru e cun 15cm de fungudia) e duncas est perigulosu meda, massimamente a su note sende chi ammancat totu sa sennialetica. S’ispera de is chi bivint in su Sulcis de Bàsciu est chi sa Provìntzia sigat a arrangiare is istradones.
In Sant’Antiogu ant presentadu “Trova il tuo Sound”, chi est su calendàriu de is eventos pro custa istade chi est ricu meda. Si incumentzat dae su 21 de làmpadas e fintzas a totu su mese de ladàmine ddoe at a èssere assumancus un eventu dònnia die: si andat dae s’enogastronomia a is escursiones in is sitos archeològicos, passende pro mostras e momentos dedicados a su benèssere personale.
S’Amministratzione Comunale de Igrèsias pro agiudare is atividades econòmicas fertas dae sa crisi econòmica ingenerada dae sa pandemia de covid-19 at detzìdidu de azerare sa TARI. S’agevolatzione prevedit chi si abascit de s’80% su tributu in casu de suspensione e tancadura de s’atividade pro unu perìodu chi andat dae 10 a 20 dies, de su 100% in casu de suspensione o tancadura de prus de 20 dies. A lestru at a esser postu a disponimentu su mòdulu pro presentare sa rechesta a is ufìtizios comunales.
Sighint a tancare is servìtzios pùbblicos in logu nostru: s’Agentzia de is Intradas lassat Carbònia, cosa chi a nàrrere sa beridade faet pagu ispantu sende chi sa parte prus manna de is servìtzios e de is isportellos sunt giae dae annos cuntzentrados in Igrèsias dae in ue arribat sa denùntzia de su PD locale chi narat chi sunt serrende totus is salas operatòrias de su CTO proite chi ammancat su personale. Sa farta de personale sanitàriu in is istruturas sulcitanas no est una novidade e sa cosa curiosa est chi is polìticos de totus is ischieramentos dda denuntziant ma nemus faet calincuna cosa cuncreta pro rimediare.
Sighit su progetu “Adotta una spiaggia” incarreradu dae s’assòtziu ambientalista “Marevivo”. Sa Delegazione Sud Sardegna at detzìdidu de adotare sa Laguna de Santa Catelina. Sàbudu e merie s’iscuadrone de volontàrios s’est atobiadu a su rifornidore de Ponti e dae innias, armados de guantos e sacos, sunt andados ororu de mare e in pagu ora ant arregortu prus de 220 kilos de àliga, massimamente plàstica, imbidru e materiale ingombrante. Pustis su Comunu de Sant’Antiogu at provèdidu a s’ismaltimentu de is refudos.
Custu fin’e cida passadu at fatu basca manna meda, cun su temperadura chi a logos est arribada a 40 grados e s’àiri serrada cun su bent’e sole chi sabudu a note at fatu burriana e at fatu iscònciu a is istabilimentos de sa pràgia de Porto Pino. Custu clima, a dolo mannu, fiat perfetu pro is piròmanes: ant atacadu unu fogu in sa zona de Pramas chi fiat currende conca a Tratalias: is òmines de sa Forestale e volontàrios de sa ProCiv nde-dd’ant isturadu in un’ora de traballu.
Agiornamentu covid. In Portescusi is positivos calant a 8, sunt semper 3 in Domunosa e nde abarrant 2 sceti in Gonnesa. Nisciuna datu is àteros comunos…e duncas nisciuna nova, bona nova! Sigheus a abarrare atentos!
Roberto Pinna
