Sa cida sulcitana in curtzu. Dae su 24 a su 30 de Maju
Est arribende s’istade e paret chi non si-nde potzat fàere de mancu de rispetare sa “traditzione” lègia de atacare fogos. Infatis martis in su sartu de Santu Giuanni Suèrgiu est dèpidu intervènnere s’elicòteru de sa base de Marganai; in territòriu de Bidda Màssargia sunt intervènnidos sa Forestale de Silìcua, is Pompieris de Igrèsias e su GEV locale; in Mìgia Arràmini in comunu de Masainas, est intervènnida sa forestale de Sant’Antiogu, sa Protetzione Tzivile de S.A.Arresi e su personale comunale. Totus is fogos gràtzias a s’interventu lestru (e fintzas proite ca su logu est ancora friscu) no ant fatu tropu dannu.
Non bastant is traballos in sa SS126 acanta de su ponte de Is Gannaus chi ant ridùsidu sa carregiada a una corsia sceti, imoi nc’at àteros problemas puru acanta de sa discàrriga de sa miniera de Monteponi. Infatis est ruende su muru chi aguant sa discàrriga e inias puru est bènnidu a marolla a pònnere unu semàforu e lassare s'istrada una corsia sceti chi est causende fileras de màchinas longas meda. Sa SS126 est s’artèria de comunicatzione prus importante de totu su Sulcis e su sìndigu de Igrèsias Mauro Usai, dae chi at emìtidu duas ordinàntzias, at otentu dae s’ANAS un’interventu chi in 10 dies iat a deper permìtere de ripristinare su dòpiu sensu di circulatzione.
Tanti pro cambiare nc’at problemas in su mundu de sa sanidade sulcitana. Infatis est arrischende de serrare su servìtziu de endoscopia digestiva in s’ispidale Sirai de Carbònia. Est dae annos chi si fueddat de su fatu chi su servìtziu potzat èssere aunidu a Igrèsias. Su responsàbile de su repartu at mandadu una comunicatzione a sa diretora de s’ispidale ispieghende chi pro sa mancàntzia de orgànicu e pro crititzidades istruturales non podet prus èssere assiguradu su servìtziu. Su consiliere regionale de su PSdAz Fabio Usai at fatu presente chi in totus is repartos ammancat personale at dimandadu chi is personas postas a ghiare sa ASSL de su Sulcis risolvant a lestru custu problema e at aciuntu chi est ora de incumentzare a resonare a pitzus de s’istruturazione de is servìtzios in is ispidales chi potzat satisfare sa dimanda de sanidade territoriale in su benidore.
Sàbudu est arribadu unu donu de importu mannu a s’assòtziu Le Rondini chi dae annos meda traballat in favore de is personas cun disabilidades graves meda e gestit su su tzentru “Domo Noa” de via Costituente in Carbònia. Infatis 27 imprendidores ant comporadu unu pulminu chi at a serbire a trasportare is malàdios in siguresa e aici podet incumentzare su servìtziu de colònia marina pro assumancus 20 piciocos chi andant a su tzentru.
At tentu unu resurtadu bonu meda "Divina Sardegna", su progetu a incuru de su FAI- Sardegna pro regordare is 700 annos de sa morte de Dante Alighieri. Sa delegatzione de su FAI acumpangiada dae sa professora Grazia Villani e unu bellu grupu de turistas sunt partidos dae su tzentru istòricu e sunt arribados fintzas a is muras e su casteddu de Salvaterra e ant tentu s’ocasione de connòschere in manera funguda e pretzisa s’istòria de “Sa Citari” in s’edade de mesu.
Don Maurizio Mirai, chi est su preide parròchia de sa parròchia de sa Biada Vìrgine de su Rosàriu in Villaperùciu, fintzas a su 31 de mese argiolas chi benit at a èssere s’amministradore de is parròchias de Santu Nicolau de Bari, de sa Madonna de Fàtima, de Santa Maria de Montefraca e San Giovanni Bosco in Terresoi chi sunt in territòriu de Santadi.
Agiornamentu de sa situatzione covid-19. Is ùrtimos datos disponìbiles cunfirmant ca s’ispainadura de su cuntàgiu est sighende a melliorare. In Carbònia is positivos sunt 50 cun 40 personas in corantena, invècias in Gonnesa is positivos sunt 37 (pro toteduos is comunos su datu est de su 25 de maju). Abarrant 8 positivos in S.G. Suèrgiu e 3 sceti in Domunosa. Datu istàbile in Villaperùciu (5), artziant invècias in Portescusi aundi dae 8 passant 15 cun 24 personas in corantena.
Dae custa cida seus intrados torra in zona bianca e ant torradu a abèrrere puru is grutas de Su de Is Tzuddas (Santadi), de Su Mannau (Frùmini Majori) e fintzas Villa Bice si podet bisitare pighende apuntamentu cun sa Pro Loco de Piscinas. Podeus nàrrere chi imoi totus is sitos de su territòriu sunt operativos e prontos pro arritzire is bisitadores. A su chi si ligit gente in Sardigna est arribendi-nde, e si bident in is pràgias camper cun targa istràngia, ma is prospetivas de is operadores non sunt pròpiu positivas e isperant de sarvare assumancus s’ùrtima parte de s’istasone turìstica. Fatru istat ca st pretzisu a rispetare is règulas de igene e de distantziamentu sotziale proite ca, dd’eus provadu giai in su mese de martzu, a torrare a segus est unu momentu. Abarrade sanos!
Roberto Pinna
