Sunt tirende a longu is traballos in su ponte chi abarrat a pagu tretu de Is Gannaus in sa SS 126. S’istradone est ridùsidu a una corsia sceti e nc’ant postu unu semàforu ma giae dae unas cantu cidas chi non si bidet nemus traballende-ddoi. S’ispera est chi fatzant a lestru a acabare proite ca est una bia de comunicatzione fundamentale pro su territòriu chi ponet in comunicatzione Carbònia cun Sant’Antiogu e su Sulcis de Bàsciu. Si sa siutatzione abarrat aici in s’istade su tràficu at a aumentare meda (giae in su fine de cida si bident fileras de veturas longas chilòmetros) e custu at a causare problemas mannos.
Traballos e òperas pùbblicas in Igrèsias. Lunis at incingiadu s’ecotzentru nou de Monte Agruxau e duncas is chi bivint in is fratziones no ant a tènnere prus sa netzessidade de arribare fintzas a corso Colombo pro iscarrigare s’àliga. In Serra Perdosa ant incumentzadu is traballlos pro fàere àteros 60 parchègios a palas de s’ex trinbunale (giae 60mila èuros su valore de s’òpera). Sighint puru s’isterrimentu de 36km de fibra òtica ultralestra chi at acarrargiare, assumancu a primìtizos, 6.500 unidades immobiliares de su tzentru urbanu.
Claudia Mura chi est sìndigu de Calesada s’est dimìtida dae presidente de s’Unione de is Comunos de s’Arcipèlagu de su Sulcis. Mura at nadu chi sa bidda sua abarrat istrecada dae su pesu demogràficu de Sant’Antiogu e dae sa fama tuìstica de Carloforte e imputat a is collegas de no arrinnèscere a castiare atesu e chi custa manera de agire faet dannu fintzas a is comunidades insoru. Is collegas isperant chi cambit bidea e a lestru.
Custa cida puru sunt arribados algerinos in su Sulcis. Dae giòbia a sàbudu sunt arribdas 23 personas. Una barchita cun 3 personas est lòmpida in territòriu de Pula, una cun 4 personas est arribada a Teulada. Cenàbara a meigama is motovedetas de sa Guàrdia de Finatza ant sorigadu in mesu de mare 3 barchitas aundi ddoi fiant 16 personas e nche-ddos acumpangiaus a su portu de Sant’Antiogu. Comente semper nche-ddos ant lòmpidos a su tzentru de collidura de Muristenis pro incarrare is protzeduras de espulsione.
Agiornamentu covid-19. Nc’at trèulu mannu e polèmicas in logu nostru. Andat a bellu meda sa campagna vacinale e dònnia die si intendint chèscias de personas chi fiant prenotadas e chi no ant pòtzidu fàere su vacinu. Cenàbara a mangianu est arribada una lìtera firmada dae su dirigente s’Igene Pùbblica de Carbònia a is sìndigos de Carbònia, Igrèsias, Sant’Antiogu, Santadi e Bidda Massàrgia chi ddos cumbidaiat a valutare s’oportunidade serrare is iscolas in is comunos insoru in su mentres chi acabat su traciamentu de is casos positivos. Is sìndigos de Carbònia e Igrèsias in direta YouTube ant denuntziadu su fatu chi in Carbònia traballant sceti 5 personas chi depent traciare is cuntatos de is positivos. Custa atividade est essida istentosa meda proite ca cun sa chistione de is variantes is positivos depent inditare is cuntatos de is 2 cidas pretzedentes e duncas su nùmeru de personas de circare est mannu meda. Sichei is sìndigos pro mellus siguresa, fintzas proite chi arriscant santziones penales, ant detzididu de serrare totus is iscolas in Carbònia e Igrèsias, sceti is superiores in Sant’Antiogu (su litzeu e is professionales de via Bolzano) e in Santadi e Bidda Massàrgia (is iscolas agràrias). Pustis su manager de s’ATS Temussi at emìtidu unu comunicadu aundi at decraradu chi su de s’ATS fiat sceti unu cuntzillu e tocaiat a is sìndigos a valutare. Comente semper, candu nc’at perìgulos, is istitutziones ant fatu de pala in coddu e is sìndigos si agatant a deper pigare a solos detzisiones graves meda. De siguru chini pagat est su tzitadinu, in custu casu sunt is istudentes chi ddis tocat a torrare in DAD pro 2 cidas.
Si a pustis de un’annu e prus de pandemia seus ancora custu puntu bolit nàrrere chi nc’at calincuna cosa chi no est funtzionende a livellu organizativu e tocat a sa “polìtica” a intervènnere in manera detzisa pro chi si assetit totu sa chistione. Dae custa cida iant a deper arribare àteras unidade pro acabare su traballu de traciamentu e fàere prus vacinos, isperende chi is nùmeros no impeuint.
Cun custa situatzione benit male puru a donare un’agiornamentu pretzisu de su cuntàgiu in su territòriu. Dae is ùrtimos datos disponìbiles paret chi is nùmeros siant istàbile in Igresias aundi ddoi at 110 positivos; si signalant 2 casos in Nuxis; 15 casos in S.G. Suèrgiu cun totus is iscolas serradas. Ammelliorat ancora su datu de Domunosa chi est calada a 21 positivos. Novas bonas puru dae Carloforte aundi abarrant 5 positivos e cun sa colllaboratzione de s’Esèrcitu s’ant a vacinare totu is residentes dae is 18 annos a innantis.
Incumentzamus sa de 2 cidas in colore de aràngiu e duncas nos tocat a tènnere ancora passièntzia. Sigheus a rispetare is règulas de distantziamentu sotziale e de igene. Abarrade sanos!
Roberto Pinna
