Sa cida sulcitana in curtzu. Dae su 7 a su 13 de mesi de idas
Is festas de Paschixedda sunt incuertzende e in is social network est incumentzende sa sfida intr’e is “imperatos” prus arritratados: ocannu at a bìnchere Ponziano sa mata de Nadale arta 10 metros e prena de lughes in pratza Roma in Carbònia, o s’isteddu arrùbiu de pratza Sella cun totus is stelle di Natale postas in su tzentru istòricu de Igrèsias, opuru Hope (isperàntzia in ingresu) s’òrsu artu 7 metros chi ant cuncordadu in pratza Umberto in Sant’Antiogu? Invècias mèrcuris 16, a mericeddu is sonadores de zampogna, cornamusa e launeddas ant passillare in is arrugas de su tzenru de Portescusi. Fintzas a cenàbara 20 in Igrèsias est prevèdida, in favore de is prus pagu assortados, s’initziativa Scatole di Natale: chini bolet podet prènnere in un’iscàtula crapitas bistiris, gioghitos, cosa de papare e pro s’igene personale e unu billetu de augùrios lassande iscritu pro chini est destinada. Is puntos de regorta sunt sa sede ACLI de bia Crocefisso 90 e s’Ufìtziu Turìsticu Comunale in pratza de sa Seu. Sàbudu 21 su Comunu de Santadi in pari a sa Caritas e sa Pro Loco organizat La Scala della Solidarietà: dae is 10:00 a is 19:00 si podent lassare pacos e bustas cun bene de primu netzessidade pro agiudare is chi dònnia die bivent cun dificultades mannas.
Custas initziativas in custu tempus lègiu chi seus bivende faghent praghere e allirgant su coru.
Lunis sa giunta comunale de Sant’Antiogu at postu 93mila èuros pro agiudare is famìlias in dificoltade: 18mila èuros sunt pro is bancos alimentares de is parròchias e de sa Caritas chi ant a collaborare cun is servìtzios sotziales de su comunu, in is àteros 75mila ant a essere donados cun unu bandu pùbblicu a is partidas iva e traballadores autònomos locales in forma de bonos de ispèndere in is atividades econòmicas de Sa Idda.
Sàbudu In sa fratzione de Is Pateris, in comunu de Carbònia, nc’est istètiu unu pagu de preocupatzione proite chi una persona ant sinnialadu a is pompieris chi un’òmine chi fiat in s’oru de s’arriu de Santu Milanu, chi in cussu momentu fiat calende furiosu, fiat isparèssidu e at pentzadu chi ndi-dd’essit pigadu s’àcua. Is pompieris si sunt postos a ddu circare ma sende chi no nche fiat nisciuna denùntzia est capassu chi s’òmine si-nde siat andadu a solu.
Domìnigu Su Carbònia Calcio a pustis de unu mese e mesu at torradu a incumentzare su campionadu se serie d: in su campu comunale de Giba at paregiadu 1 a 1 cun su Nola. Invècias duos piciocos ant tentu un’aventurai in is montes de Santadi: si sunt pèrdidos pro unas cantu oras in su padente ma unu certu puntu is telefoneddos ant torradu a pigare su signale e sunt arrinnèscidos a cuntatare una parente chi ddos at postos in comunicatzione cun is vìgiles de su fogu chi ddos ant torrados a agatare sanos mancai unu pagheddu afartados.
Agiornamentu de sa situatzione covid-19. A su chi parit dae is comunicatziones ufitziale fatas dae is comunos fintzas in logu nostru puru s’epidemia, mancai fatzat unu pagu de àrtzia e cala, est cumentzende a si firmare. Infatis In Carbònia, contende sanados e casos nous, abarrant 27 positivos, ancora artu su nùmeru de Igrèsias: 87 positivos cun ma cun 28 negativizados e sceti 9 casos nous; is positivos abasciant puru in Santu Giuanni Suèrgiu (18, - 5) e in Portescusi 3 (-5).
In Sant’Antiogu is positivos artziant a 23; in Villaperùciu sunt 18 (in totu si sunt registrados 34 casos chi est unu nùmeru bastante artu si tenit in cunsideru ca is residentes sunt pagu prus de 1000); aumentu puru in Domunosa sunt 17 (+3 ma cun 10 sanados) e sighint a abarrare serradas is iscolas elementaris ma torrant a abèrrere is iscolas mèdias. A pustis de duas cidas si torrant a registrare casos in Caleseda (7 positivos e 4 personas in corantena); aici etotu e in Bidda Massàrgia cun 8 casos e 7 personas in corantena. Su sìndigu de Piscinas at comunicadu domìnigu su primu casu invècias nisciuna nova dae Nuxis, S.A.Arresi, Santadi, Narcau e Perdaxus, ma in totu sa zona ant torradu a abèrrere totus is iscolas chi fiant serradas cida passadas.
Ancora zeru casos Masainas, Musei, Bugerru e Frùmini Majori e in su mentris is controllos de is Fortzas de s’Òrdine incumentzant a èssere prus istrintos: is Carabineris giai in is cidas passadas ant postu calincuna multa a is chi ant cassadu a giru pustis de is 22 sena de motivu vàlidu e cenàbara a note in Bidda Massàrgia nd’ant postu 15 de 400 èuros e signalatzione a sa prefetura a unu grupu de giòvunos chi a mesu note passada fiant ancora a travessu.
Is racumandatziones sunt semper uguales: mantènnere sa distàntzia de siguresa, mascaredda semper avutu e a istraviare is atrupellios; si ddu podeus fàere depeus donare una manu de agiudu a is famìlias aundi at fertu sa maladia. S’augùriu est a abarrare sanos!
A cura di Roberto Pinna
