Sa cida sulcitana in curtzu. Dae su 9 a su 15 de donniasantu
S’est scìpidu chi sa Guardia de Finantza at postu sa multa a tres personas chi cun su fuoristrada insoru fiant currende ororu de mare is pràgia de Porto Pino martis a note. E cust’orta non sunt is sòlitos turistas continentales is chi no ant rispetadu s’ambiente ma sunt tres personas de Sant’Antiogu ca nanca teniant bidea si pònnere a piscare.
mèrcuris si-nd’est andadu un’àteru sulcitanu de gabbale. In S.A. Arresi a 72 annos s’est ispaciadu Basilio Sulis chi pro annos meda est istadu presidente de s’assòtziu Punta Giara e aiat "imbentadu" su festival “Ai confini tra Sardegna e Jazz” arrinneschende a fàere arribare in su Sulcis is mellus musicistas de custu gènere musicale. A bortas fiat cunsideradu unu “visionàriu” sende chi aiat provadu pònnere in pari is istrumentos sardos prus traditzionales comente is launeddas in pari a su mùsica Jazz. Su Festival at donadu unu contributu mannu meda pro fàere connoschere sa bidda de Sant’Anna e is bellesas suas in totus su mundu.
Giòbia in Perdaxus si sunt dimìtidos prima unas duos consilieris comunales de magiorantza (e intr’e custos s’assessore Stefano Esu) e a pustis si sunt dimìtidos is 5 consilieris de opositzione. S’idea est de nde sciusciare s’amministratzione ghiada dae su sìndigu Gianfranco Trullu. Sa chistione no est crara: a su chi parit is consilieris non si sunt dimìtidos totus paris sigundu su chi prevedit s’art. 141 de su TUEL e duncas su sìndigu at incarreradu is protzeduras de sùrroga de is consilieris dimissionàrios.
Cenàbara est istètia un’àtera die isbarcos de algerinos in su Sulcis. Sa motovedeta de sa Guardia de Finantza ant interzetadu una barca cun 26 òmines a pagu tretu de Portovesme e nci ddos at iscortados a su portu industriale; àteros 5 ddos (2 fèmminas e 3 òmines) sunt arribados deretos in Sant’Antiogu. Comente semper nche-ddos ant lòmpidos a su tzentru de collidrua de Muristenis chi est torra prenu: ddoi at prus de 200 personas e at sunt iscopiados certos intr’e is òspites e una protesta generale cun su sìndigu de Muristenis chi dimandat s’interventu de su prefetu.
Domìniga a note gente male intraniada est intrada in s’iscola mèdia de bia 2 Giugno e at atacadu fogu a is registros e a àteros documentos bècios. Is pompieris in pagu ora nd’ant istudadu su fogu e is Carabineris sunt indaghende pro cumprèndere chini apat fatu custa bella faina.
giornamentu de sa situatzione covid chi sighit a impeuare. In Villaperùciu is positivos ant aumentadu a 15 e si sunt totus auto-sinnialados in antis chi arribessit sa comunicatzone ufitziale de sa ATS cun su sìndigu chi at apretziadu sa responsabilidade ammostrada dae is tzitadinos suos; in Santadi serradas tres classes (duas in s’asilu e una in is elementares) cun is positivos chi artziant a 18 e àteras personas positivas chi ant fatu su tampone in privadu e dd’ ant fatu ischire a su sìndigu; in Carbònia su totale de is casos registrados est arribadu a 93; in Igrèsias is positivos sunt arribados a 84 cun 26 personas in corantena; in Domus Noas is positivos sunt 9 (2 in s’ispidale), torrant a artziare in cuntàgios fintzas in Gonnesa: in paga dies sunt torrados a arribare a 11; in Bidda Massàrgia is positivos calant a 7 e 7 sunt corantena; in Sant’Antiogu is positivos passant dae 3 a 22; in Santu Giuanni Suèrgiu su sìndigu at serradu s’iscola de Matzàcara e sinnialat at 2 casos positivos in su territòriu comunale. Sa situatzione in sa RSA de Nuxis no est bona: su sìndigu at comunicadu su nùmeru ufitziale de 13 ospites positivos (19 casos in totu cun 6 sanados), ma fontes non ufitziales chistionant de unu nùmeru prus artu meda e in mesu de custos ddoi at traballadores meda chisunt timende de pònnere in perìgulu is famìlias insoru. Novas bonas dae Carloforte: is positivos de 19 chi fiant sunt calados a 8 (2 sunt ricoverados e unu si agatat in d-un’àteru comunu).
Ormai est craru chi sa ATS nci ponit tempus meda a fàere tampones e a torrare s’èsitu a is interessados e sa situatzione in is repartos covid sunt in crisi. Sa primu sienda chi amparat sa salude nostra seus nosu etotu! Tocat cun passièntzia a rispetare is règulas de igene chi totus connosceus e massimamente a non fàghere atrupèllios cun àteras personas: depeus èssere nosu etotu in custu momentu a fàere de totu pro agiudare is dotores e totu su personale mèdicu. Ma sa cosa peus de custus tempus lègiu sunt is boghes, su suspetu e is farsidades chi bessint a pillu in contu de is personas e de is famìlias chi nche sunt infertas in sa maladia. S’ùnica cosa de fàere est a agiudare is personas in dificultade chi bortas meda nche ruent in sa solidade prus totale. A bortas abastat fintzas una telefonada o unu messàgiu in su telefoneddu pro pònnere coràgiu!
Is arricumandatziones non serbit a ddas repìtere, s’augùriu eja: a abarrare semper sanos!
A cura di Roberto Pinna
