Novas in sardu. Is primas duas cidas de cabudanni in curtzu
Martis 1 de cabudanni su Consìliu Regionale at aprovadu sa lege regionale de riforma sanitària chi nde bogat sa sienda ùnica e torrat a pònnere is ASL locales cun personalidade giurìdica. Duncas in Carbònia at a torrare a èssere operativa sa ASL cun d-unu diretore chi at a tènnere podèrios detzisionales. S’ispera est chi mudit in mellus sa situatzione, chi pro nàrrere sa beridade, pro mori de su covid no at torradu a impeuare: in bona sustàtnzia is bìsitas spetzialìsticas sunt giai totu firmas e si provat a bellu a bellu a recuperare, ma de siguru sa cosa at èssere istentosa meda sende chi si faghent sceti pro chi tenit bìsita “urgente” in s’impegnativa o pro chini pagat in privadu.
A bellu a bellu sighit a si ispainare su SarsCoV-2 in logu nostru. A pustis de una partida de fubalu intr’e su Bidda Massàrgia e su Carbònia giogada su 2 de cabudanni est resurtadu unu giogadore positvu. Prontamenti sa ATS at incumentzadu s’òpera de traciamentu: ant fatu 200 tampones in s’istàdiu comunale de Carbònia e nd’at asseridu sceti unas cantu positivos in Bidda Massàrgia. Unu casu de positividade puru in Gonnesa, un’àteru in Carbònia, 5 in totu in Igrèsias. Una cosa est sigura: sa ATS regionale trigat meda a comunicare in manera ufitziale is resurtados de is tampones siat a is personas, siat a is sìndigos, chi a s’acabada sunt is primos responsàbiles de sa sanidade pùbblica e de custu fatu si sunt chesciados: bortas meda su comunicadu ufitziale arribat 2 si non 3 dies a pustis chi s’est ispainada sa “nova”. Sena de tènnere in cunsideru totus is boghes farsas chi essint de bucas o didos malos (sende chi custas “novas” currint puru in is telefoneddos) chi non faghent bene e creant unu clima de tensione. S’ùnica manera pro èssere siguros est a ascurtare e lìgere sceti is comunicados ufitziales de is entes locales e massimamente est a rispetare sa privacy de is personas. Su “bonu”, pro imoi e tanti e spereus chi sigat de aici, est chi is positivos sunt giai totus personas giòvunas e non tenent sìntomos e istant totus bene.
Sèmper su 2 de cabudanni s’obispu nostru, monsignor Zedda, at dimandadu a totus is predis de averiguare sa situatzione in is parròchias insoru pro torrare a partire cun sa catechesi e valutare sa possibilidade de amministrare is sacramentos de sa prima comunione e de sa cunfirma sena de perìgulos e rispetende totus in normativas anticovid, mancai faghende prus tzelebratziones a manera de nche passare custa fase de “stasi” in sa vida cristiana causada dae sa pandèmia.
At torradu, a pustis de sa “pàusa” de austu, a isbarcare gente in su Sulcis. Su sàbudu 5, a de noti funt arribados in 30 in sa costa de su Sulcis: costumant a èssere totus algerinos, ma cust’orta in mesu de is algerinos nche fiant puru duus nigerianos e unu malianu. Custa nova at fatu spantu e podit èssere chi custos piciocos apant sartadu su desertu in calincuna manera. Fatu stait chi comente dònnia borta is Carabineris nde-ddos ant pinnigados e lòmpidos a su tzentru de collidure de Muristenis pro incarrerare is protzeduras de identificadura e espulsione.
Domìniga 6 In Calesada ant acabadu de afestare is 250 annos de sa fundatzione. Craramenti pro mori de s’emergèntzia sanitària ant fatu “festa pitica” ma ricas de manifestatziones culturales: mùsica, performance artìsticas, e passilladas cun ghias espertas chi in su camminu ispiegaiànt sa natura e s’istòria de is logos. Fintzas Poste Italiane at dedicadu unu francubullu e una cartolina a sa bidda tabarkina.
Sa segunda cida de cabudanni at torradu a fàere àcua: aundi at fertu at ghetadu a istrossu ma pro pag’ora sena de fàghere tropu dannu, male meda est andada in Bidda Massàrgia: sèmpiri cenàbara 11 totu su sartu e domos meda in bidda allagadas e s’àcua chi de sa cobertura de su munitzìpiu est arrennescida a nche calare finas a su pianu terrenu ponende in perìgulu s’archìviu comunale e guastende is ainas informàticas de is ufìtzios. Su sìndigu dimandat s’istadu de calamidade naturale e at circadu agiudu a sa Regione.
Su 28 de austu, a pustis de annos de arresonos, in Roma ant firmadu s’acòrdiu pro sa furnidura de energia elètrica intrì’e s’Enel e sa Sider Alloys (est prevèdidu a 49,24 èuros a megawatora pro 5 annos prus àteros 5). Aici cenàbara 11 sa multinatzionale isvìtzera at presentadu a is sindacados e a is partes polìtica su pianu pro torrare a alluere s’impiantu: s’est trigadu meda pro mori de su covid e pruscatotu de is ritardos in sa definitzione de s’acòrdiu energèticu, ma pro una borta sunt totus cuntentos: sa funderia iat a deper partire intr’e su 2021, e in su 2023 iat a deper intrare intrare in prena produtzione.
Su coronavirus sighit a s’ispainare, is cuntzillos sunt semper uguales: a donare cura manna a s’igène de is manos e de is bias respiratòrias, a oberare sa mascherina candu seus in logu serrau o dònnia borta chi non podeus abarrare assumancus a unu metru de is àteras personas. Fintzas s'augùriu est semper uguale: a abarrare sanos!
Roberto Pinna
