Sa cida sulcitana in curtzu. Dae su 22 a su 28 de làmpadas
Ormai parit chi in Carbònia no nci siat prus assèliu po s’amministratzione comunale a 5 Steddas. Gente meda, a pustis de su fogu de cida passada in sa zona PIP, si chesciat pro s’erba chi at invàdiu totu su popolau; nc’at problemas pro s’istàdiu comunale imoi chi sa scuadra de fuballu est artziada in serie D e e is tècnicos sunt circhende de agatare un’acòrdiu pro sa gestione; mèrcuris ant presentadu sa motzione de isfidùcia firmada dae 10 consilieris de opositzione. Sa motzione at a èssere discùtia dae su consìliu non prima de 10 dies e pro imoi e tanti est difìtzile a fàghere previsiones: magiorantza e opositizione a nùmeros sun 13 (12 consilieris prus su sìndigu) a 12, ma eventuales “assentzias stratègicas” in d-una parte o in s’àtera podent donare unu resurtadu a sorpresa.
In su mentris is consilieris regionalis Fabio Usai e Michele Ennas in pari a Giorgio Oppi ant presentadu una proposta de lege pro torrare a fàghere una Provìncia de su Sulcis Iglesiente. Is boghes de is sòlitos bene informados chistionant de unu dòpiu cabulogu ma cun su territòriu de s’ex provìntzia sulcitana chi iat a deper carrargiare totus su sud ovest cun Silìcua, Vallermosa, Teulada e Domus de Maria, Gùspini e Arbus cun bona parti de su chi fiat su Campidanu de Mesu chi iat a deper andare a sa provìntzia de Aristanis.
Su benidore pro Casa Serena no est siguru pro nudda. Infatis chena de su contributu regionale su Comunu de Igrèsias non est in cunditziones de mandare a innantis su ricoveru chi ospitat 60 personas e assigurat 60 postos de traballu. Casa Serena balit 2,5 miliones de èuros in su bilànciu comunale. Su sìndigu Mauro Usai, chi at arregordadu ca custu est unu problema chi durat de 20 e prus annos, at incumentzadu is protzeduras pro sa tancadura de s’istitutu e is traballadores ant incumentzadu s’istadu de agitatzione. Su servìtziu, a dolo mannu, est in pèrdida e s’ùnica speràntzia est chi sa RAS pongat dinari e chi in su mentris si acabint a lestru is traballus in s’ex albergu Margherita di Savoia chi però est meda prus piticu e no at a pòdere regòllere totus is traballadores de Casa Serena.
A Sant’Antiogu sunt arribados is mezos de sa dita americana chi ant a sciuciare sa CDRY BLUE, su cargo chi a s’acabu de s’annu passau si fiat arrèschidu acanta de Portu Sciusciau pro mori de una burrasca de maestrali. Is operatzionis iant a dèper cumentzare su mese chi intrat e parit chi sa nave bengat partzida in duas partes e a pustis nche-dda traghint a Gènova. Is rilievos de is sub de sa Guàrdia Costera de Casteddu ant cunfirmadu chi no ddoi at sinniales de incuinamentu e de siguru custa est una nova bona meda.
A bellu a bellu – e fiat ora! – sunt torrende a incumentzare is atividades ambulatoriales in sa Assl de Carbònia: si sunt recuperende is prestatziones suspèndias in su lockdown, in su CTO e in su Sirai a lestru at a torrare operativa puru sa chirurgia “a cumplessidade bàscia” e is prelievos de sàmbene si faghent sceti cun prenotatzione e si traballat pro torrare a abèrrere totus is laboratòrios territoriales.
Sighit a torrare sa normalidade fintzas pro su chi pertocat sa cultura e su turismu: in Igrèsias ant torradu a incumentzare is letziones s’iscola cìvica de istòria; in sa gruta de Santu Giuanni in Domus Noas ant incingiadu s’impiantu de illuminatzione nou chi at a permìtere a is bisitadores de passillare in siguresa e de gosare de custu ispantu de sa natura. In Sant’Antiogu sàbudu est incumentzadu “Lo sbaracco”: una bèndida promotzionale chi s’at a fàghere dònnia sabudu de is 10 de mengianu a mesunote (cun sa mùsica chi incumentzat a mericeddu) aundi si atividades cummertziales ant a cuncordare una parada acanta de s’intrada insoru e ant a propònnere prodotos a prètzios cumbenientes.
Sa cida est acabada cun d-un’undada manna meda de isbacos. Infatis domìniga a mericeddu sunt in 45 is algerinos (o aci narant de èssere) chi cun 4 barchitas funt arribados in sa costa sulcitana a pustis de unu viàgiu chi at duradu unas 10 oras gràtzias a is cunditziones mèteo perfatas. De custos in 19 sunt arribados in Porto Pino pròpiu in mesu de sa gente chi fiat pighende su sole in sa primu pràgia. Craramente totus, e passièntzia pro sa distàntzia de siguresa, si sunt acostados a telefoneddu paradu pro tirare una fotografia o fàghere unu vìdeo. Comente dònnia borta is Carabinieris e sa Politzia nde-ddos ant pinnigados e lòmpidos a su tzentru de collidura de Muristenis aundi ant a fàghere sa corantena e pustis ant a incarrerare is protzeduras de espulsione.
Ormai eus intrende in su de duos meses de sa fase due: is racumandatzionis sunt is sòlitas: mascherina in logu serradu e distàntzia interpersonale de rispetare sèmper. S’aùguriu est a abarrare sanos!
