Sa cida sulcitana in curtzu. Dae su 27 de abrile a a su 3 de maju
In trancuillidade nc’ est passada puru est sa de otu cidas de corantena. Lunis depiat èssere sa die de sa de 661 Festas de Sant’Antiogu. Custa festa est sa prus antiga de Sardigna (e fintzas intr’e is prus antigas de totu s’Èuropa) ma ocannu, po sa marolla, non eus pòtziu afestare a su Patronu de Sardigna comente bolit sa traditzione: nudda missa cun sa comunidade, nudda prutzessione, e nudda isfilada de is grupos folk ma sceti una missa in sa cripta de catacumbas tzelebrada dae monsignor Giovanni Paolo Zedda in pari a su retore don Mario Riu, trasmìtia in televisione in direta regionale. Siguramente no ant a mancare in su benidore is ocasiones pro onorare a su Patronu de Sardinga e duncas ocannu is fideles si sunt dèpidos acuntentare de una maginedda de su Sant’Antiogu cun is cocoi beneditus.
Sighit ancora s’emergèntzia ìdrica in Domus Noas chi ormai est durende dae 13 meses. Infatis dae unas cantu dies sunt ponende in sa retza s’àcua de su potabilizadore bèciu chi ant arrangiadu, ma a su note tocat a serrare s’erogatzione pro prènnere is serbatòios e fintzas a de die partes de sa bidda abarrat sena de àcua. Su sìndigu M. Ventura at nadu chi sunt provende a assetiare su sistema de is manòmetros e chi sunt prontos 400mila èuros de fundos regionales pro arrangiare sa retza de distributzione chi est bècia e perdit in logus meda.
Su primu de maju fiat sa festa de is traballadores e fortzis mai a comenti ocannu at tentu valore mannu, sende chi sunt in medas chi non podent traballare, pruscatotu is artigianus chi tratant sa cura de sa persona, is butegheris e is cummissos. In su mentris sa RAS no at ancora torradu sceda a is rechestas de acraramentu chi at fatu s’ANCI Sardigna in contu de s’intrpretatzione de lege de “is 800 èuros”, ma su personale de is amministratziones comunales est faghinde un’isfortzu istraordinàriu pro pagare a lestru su contributu regionale a is famìlias chi sunt in dificlutare e in su mentris si incumentzant sa segunda torrada de su contributu de sa Protetzione Civile (is bonus ispesa de su mede passadu).
Sàbudu est essida s’ordinàntzia de su Presidente de sa Regione Solinas chi permitit de fàghere prus cosas in cunfrontu a s’ùrtimu decretu de su Presidente de su Consìliu de su 26 de maju, su decretu chi at abertu sa “FASE 2” est a nàrrere su periodu de tempus chi nosi tocat a bìvere cun su virus. In custa manera s’est fatu ancora prus treulu, pruscatotu in sa conca de is gente comuna. Est siguru ca a pònnere de acòrdiu totus non benit bene e est ancora prus difitzile a agatare un’ecuilìbriu intr’e s’amparu de sa salude e sa netzessidade de traballare ma de siguru unu pagu de coerèntzia in prus in normas de livellu diferente iat a èssere andada bene. Is prus chi sunt chesciados sunt is sìndigos chi si agatant càrrigados de responsabilidades mannas meda sena de tènnere mezos e personales e nemenacu is cumpetènzias tècnicas pro valutare situatziones cumplessas.
Fatu istat ca giai de custa cida is comunos is comunos ant giai incumentzadu a pensare a su benidore. Pro esèmpiu sa giunta de Sant’Antiogu bolet provare a sarvare s’istasone turìstica. S’idea de sa giunta est cussa de fàghere de Sant’Antiogu unu comunu “covid-free” (lìberu de su virus e siguru) e de fàghere comunicatzione in custa diretzione a manera de atirare turistas. Certu s’idea est bella meda ma fortzis si totu su territòriu de su Sulcis si movit paris in custa diretzione iat a èsser mellus. Giai cida passada su sìndigu de Carbònia iat annuntziadu sa suspensione de is tassas pro totus is atividades chi sunt dèpidas abarrare serradas, su sìndigu de Igrèsias at annuntziadu unu pianu poderosu de 400mila èuros de ismenguadura. Àteros provant a istudiare mesuras pro agiudare is impresas a manera dereta (Masainas e Villaperùciu) e unu pagu in dònnia logu ant giai torradu a incumentzare is cantieris pùbblicos chi sunt de importu mannu proite chi incumentzant a isblocare s’economia. Si incumentzant a fàghere is provas pro torrare a sa normalidade fintzas de unu puntu de vista sotziale: pro esèmpiu in Santuanni e in Portescusi ant giai abertu is campusantus e is ecocentrus ma cun limitatziones mannas.
Aici pustis de 2 meses de corantena e de accoru incumentzat sa Fase2. Ormai est dae 4 cidas chi, gràtzias a s’impegnu de is totus in su rispetu de is normas de noas de distàntzia sotziale, in logu nostru non si sunt registrados casos de positividade a su corona virus. Imoi chi incumentzat sa FASE 2, depeus tènnere bene in cunsideru ca s’emergèntzia no est acabada ancora e chi bastat unu momentu pro pèrdere totu su sacrifìtziu mannu chi eus fatu in custu tempus. E duncas, ancora una borta: a nche essire sceti si no ndi podeus fàere de mancu, a oberare sèmper guantos e mascherinas massimamente candu andaus a logos serrados, a mantènnere sa distàntzia sotziale dae is àteras personas. Fintzas s’augùriu est semper uguale: a abarrare semper sanos!
Roberto Pinna
