NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
23
Thu, Jan
25 Nuovi articoli

Is festas de Paschixedda e e is primas dua cidas de su 2019 in curtzu

Novas in Sardu (LSC)
Aspetto
Condividi

De chi a metade de mese de is idas fiant arribadas novas bonas pro s’istabilimentu de s’Eurollumina (sa RAS at donadu totu is autorizatziones chi serbint pro s’investimentu de sa RUSAL), lunis 20 de mese de idas su ragionieri Carlo Lolliri, pustis de 53 annos de servìtziu, at annuntziadu chi a s’acabu de s’annu depiat lassare s’incàrrigu de presidente de sa Portovesme SRL chi est s’ùnica sienda manna (1000 dipendentes) de su polo industriale de Portovesme chi at arresìstidu a sa crisi incumentzada 10 annos a coa e chi sighit a fàghere ùtiles. Lolliri òmine de gabbale, istimadu dae is traballadores e dae is sindacalistas, in sa carriera sua at bistu sa sienda naschende e dd’at mandada a innantis in su periodu trumentadu de s’acabu de is annos 90 e is primos 2000, at nadu chi abarrat a dispositzione pro donare contzillos e chi at a fàghere àteras atividades foras de sa sienda.

Su 23 de mese de idas at fatu burriana manna: a meigama su bentu estu nd’at sciusciadu una mata in pratza Sella e sa bona sorte at bòfidu chi in su momentu no ddoi fessit nisciunus passende acanta. S’est arrischiada sa tragedia in mare candu a mericeddu is undas artas 8 metros nc’ant iscutu una nave in is arrocas de Porto Sciusciau (in territòriu de Sant’Antiogu) e est intervènnidu s’elicoteru de sa Guardia Costera pro salvare 8 marineris. Passadu su perìgulu de disastru ambientale sa nave est ancora arrèschida e sunt istudiende sa manera pro nde-dda bogare. Su logu, a comente annos a coa fiat sutzèdidu cun sa barca Caroline in Mangiabarche, est essidu tapa de “pellegrinàgiu” pro is curiosos chi cun sa s’iscusa de una passillada andant tirare una fotografia su relitu.

Su 30 de mese de idas s’Amministratzione de Sant’Antiogu at firmadu s’acòrdiu cun sa RAS pro intrare in sa retza regionale de is camminos religiosos e duncas sa basìlica at a èssere meta de pellegrinàgiu. A parre de su sìndigu Nàssiu Locci custu atu at a tènnere importu mannu pro s’isvilupu turìsticu de Sa Idda.

Comente acuntessit dae 20 annos, fiant una cincquantina is chi in Funtamare si-nche sunt ghetados a mare su mengianu de annu nou. De chi is coragiosos nde sunt essidos dae s’àcua gelada, s’est fatu su cumbidu traditzionale pro totus is presentes.

Su 2 de gennàrgiu s’amministratzione de Igrèsias at incingiadu is ufìtzios distacados in s’ex pretura de arruga Pacinotti e duncas, tres bortas a sa cida a mengianu (lunis, mèrcuris e cenàbara) e su martis a merie, sunt a disponimentu de is residentes de Serra Perdos is ufìtzios de is servìtzios demogràficos e su protocollu.

S’annu est nou ma certos problemas sunt uguales a s’annu passadu. Infatis su 3 de gennàrgiu sunt isbarcadas giai 100 personas in is pràgias de Domus de Maria, Teulada, S.A.Arresi, Sant’Antiogu e inderetura a Carloforte, sichei is Carabineris de sa cumpangia de Carbònia ant tentu cosa de fàere meda pro nde-ddos pinnigare totus e nche-ddos lòmpere a su centru de collidura de Muristenis pro incumentzare is protzeduras de identificadura e de espulsione. Abarrant puru is problemas in sanidade: s’assòtziu APENT at denuntziadu chi s’impiantu de riscaldimentu de su centru dialisi de s’uspidale Sirai fiat guastu. A custu problema si-nde sunt interessados fintzas is giornales natzionales s’ 8 de gennàrgiu e nc’est bòfidu s’interventu de unas cantu consilieris regionales pro agatare una solutzione de siguru provisòria a unu problema chi est durende dae 10 annos e chi causat sufferèntzias mannas meda a is malàdios chi andant pro sa terapia.

Si ocannu s’isfida de is fotografias in is social network dd’at binta sa pratza de Is Sollus de Sant’Antiogu ca nci fiat sa gente a tropas chi andaiat a si tirare su selfie aintrus de una spècia de bòcia totu allucorada, invècis Carbònia at bintu s’isfida de sa befana: ddoi fiant, intr’e mannos e piticos, assumancus milla personas a dda castiare in su mentris nde calaiat a fune dae su campanili de Santu Pontzianu.

In su mentris domìniga 12 est incumentzadu su girone de torrada de is campionados diletantes de fuballu. In ecellentza su Carbònia at bintu 3 a 0 contras a su Ghilartza e s’agatat in su primu postu in classìfica e punnat a artziare dereta in Serie D. In su girone A de promotzione sa Monteponi, prima de Paschixedda at cambiadu metade de iscuadra (est torradu su bomber Samuele Curreli dae su Carbònia) cun sa punna de nde essire dae sa zona playout e infatis de chi at bintu 2 partidas de sighiu at sorigadu su Villamassàrgia a 20 puntos, trancuillu a mesu classìfica su Cortoghiana cun 25 puntos. In su girone B de prima categoria parit cundennada s’Antiochense 2013, ùrtima cun 6 puntos sceti, in zona playout s’Atletico de Villaperùciu cun 15 puntos, andant bene meda su Narcau e sa Fermassenti chi sunt a su de 3 e a su de 4 postos in classìfica e s’ant a gherrare su playoff