NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
20
Fri, Sep
38 Nuovi articoli

Sa cida in curtzu: Dae su 2 a s’8 de Cabudanni

Novas in Sardu (LSC)
Aspetto
Condividi

Sa cida in curtzu: Dae su 2 a s’8 de Cabudanni 

Lunis 2: in sa sala consiliare de su Comunu de Igrèsias is assessores regionales a s’Indùstria Anita Pili e a is Traballos Pùbblicos Roberto Frongia ant atobiadu is sìndigos de s’ex provìncia de Carbònia-Igrèsias (de 23 nche nde-fiant 18) e ant fatu presèntzia puru is consilieris regionales sulcitanos, fintzas is chi ant elìgidu in su collègiu de Casteddu (G. Oppi, S. Tunis e C. Cuccu), e in prus nci fiant puru imprendidores e sindacalistas. A pustis de s’isterrida fata dae su “mere de domu” Mauro Usai, pro unas cantu oras s’est fueddadu de is problemàticas de s’indùstria sulcitana e de is àteras possibilidades de isvilùpu pro su territòriu ma est craru a totus, dae annos meda, ca si non si fàghent is infrastruturas (istradas e sa banda lada) e si non si donat atentzione manna a s’ambiente, sa situatzione econòmica de su logu nostru at a sighire a impeuare.

Martis 3: in sa gruta de su Montixeddu, chi abarrat a pagu tretu de s’ex miniera de sa Marchesa in comunu de Nuxis, ant incumentzadu is isgavos archeològicos chi ant a èssere ghiados dae su professor Riccardo Cicilloni de s’universidade de Casteddu. S’iscopu de custos isgavos, chi sunt finantziados dae sa RAS, est cussu de indagare su passàgiu dae sa cultura de Monte Claro a cussa de Bonnanro e cumprèndere ita ruolu at tentu custa in formatzione de sa civiltade nuraghesa. Is isgavos ant a andare a in antis pro totu custu mese de cabudanni e sa cosa bella est chi si podent bisitare cun is istudentes chi ant ispiegare ita sunt faghende e ita ant agantadu.

Mèrcuris 4: in sa pràgia de Portovesme ant agatadu su corpus de una fèmmina morta. Sa gente chi fiat in sa pràgia at bistu su corpus ororu de mare e at telefonadu sùbitu a is carabineris. A cantu sa morta fiat una fèmmina de 65 annos de Carbònia. A primu mirada no ddoe ant sinniales de violèntzia e fortzis sa fèmmina est morta pro càusas naturales. A dònnia manera su PM de Casteddu at ordinadu de fàghere s’autopsia.

Giòbia 5: ormai est essida a pillu s’idea de un’àtera riforma de su sistema de is entes locales (5 provìncias prus sa citade metropolitana de Casteddu) e fintzas de su sistema sanitàriu chi a cantu parit previdit 5 ASL locales cun d-unu spidale ùnicu pro totu su Sulcis. Custas ideas non praghint meda e a s’acabada a fortzas de chèscias is sìndigos sulcitanos sunt arrenneschidos a otènnere un’atòbiu cun s’assessore regionale a sa sanidade Nieddu.

Cenàbara 6 In Igrèsias s’est insediada sa cummissione comunale de indàgine chi at a traballare a pitzus de is ex àreas mineràrias. A parre de sa presidente Valentina Pistis custa est un’ocasione de importu mannu chi at a permìtere de fàghere propostas cuncretas pro chi sa tzitade potzat torrare a partire. Sa cummisione at a averguare sa situatzione de is bonìficas e de s’avaloramentu de patrimòniu. Cun sa cummissione ant a collaborare puru is tècnicos de su Comunu e de àteros entes interessados e a lestru ant a dimandare un’atòbiu cun is assessorados cumpetentes de sa RAS.

Sàbudu 7: Est lòmpida puru in su Sulcis sa moda de imitare a Samara Morgan, sa protagonista a pilus longos de su film horror “The Ring” chi aiat tentu unu sutzessu mannu meda in is primos annos 2000. Duncas giai in dònnia bidda Samara est aparessida e piciocheddos meda si sunt ispassiados a dda tirare una fotografia e dda pònnere in is social network. In Frùmini Majori sa chistione fiat essende giai tropu sèria proita ca pro unas cantu notes una turista tedesca de 25 annos dae Su Mannau calaiat a pee a su campusantu e calincunu fiat cumentzende a tìmere fintzas proite chi podiat causare calincunu incidente. Duncas martis a note dd’ant firmada is Carabineris. A custa picioca no dd’ant acusada de nudda ma ant fatu presente a totus chi custa brulla podet èssere perigulosa pruscatotu pro chini dda faghet.

Domìniga 8: est acabada cun d-unu sutzessu mannu de pùbblicu in totus e is 22 cuntzertos de sa de 34 editziones de sa rassegna “Ai confini tra Sardegna e Jazz” chi ant fatu in sa pratza de su nuraghe de S.A. Arresi e puru in sa pratza de sa crèsia de S. Maria de Pramas e in is pràgias de Masainas e de Porto Pino. Nc’est istada una coa de polèmicas: su diretore artìsticu e ex presidente de s’Assòtziu Punta Giara Basilio Sulis at nadu ca sunt prontos a mòvere su festival in àteras biddas si non si risolvint certos problemas a intru de ocannu e su sìndigu Teresa Diana chi invecis at nadu chi s’Amministratzione sua est pronta a circare una solutzione.

Salude: Roberto Pinna