NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
21
Sat, Jul
50 Nuovi articoli

Sa cida sulcitana in curtzu. Dae s'8 a su 14 de gennàrgiu

Novas in Sardu (LSC)
Aspetto
Condividi

Sa cida sulcitana in curtzu. Dae s'8 a su 14 de gennàrgiu

Lunis 8: fiat ispainende-sì sa boghe chi sa RWM, sienda tedesca mere de sa fàbbrica chi produset bombas in Domus Noas, fàbbrica chi in ùrtimas dies de s’annu passadu fiat acabada in mesu de unu reportage de su New York Times e in totus is TG natzionales, fiat pronta a serrare sa f’istabilimentu pro mòvere sa produtzione diretamente in Aràbia Saudita. Fiant cuntentos is pacifistas chi bollint sa riconversione de sa fàbbrica, timorosos is amministradores locales, is operàios e meda gente comuna chi difendint non su chi si produset ma su valore de su traballu. In s’interis s’amministradore delegadu de sa RWM Italia at decraradu in d-una intervista a s’Unione Sarda chi sunt arrispetende sa lege, chi non faghet a cunvèrtere sa fàbbrica e chi sa produtzione s’at a bèndere sceti a paisos de sa NATO.

Martis 9: Su Comunu de Igrèsias at intregadu is traballos pro sa progetatzione de su restàuru de tres monumentos importantes meda: cussu dedicadu a Quintino Sella chi est finas unu de is sìmbulos de sa tzitade, cussu dedicadu a is chi sunt mortos in sa primu gherra mondiale de pratza Oberdan, e cussu in memoria de Zaira Pinna Deplano chi s’agatat in su campusantu monumentale.

Mèrcuris 10: puru su tzìrculu locale de su PD e contràriu a fàghere unu ponte nou pro arribare a Sant’Antiogu. Su diretivu, a pustis de una riunione longa meda, cun d-unu documentu ant decraradu ca s’at a ispèndere dinari meda ma no esistint valutatziones de su raportu intru de is costos de s’òpera e de is benefìtzios chi at a portare a is comunidades locale. Duncas su PD santantioghesu isperat chi su dinari previstu in su Piano Sulcis pro su ponte bengat torradu a modulare e postu pro is infrastruturas de su portu e sa siguresa de sa SS 126.

Giòbia 11: Is rapresentates de sa Syder Alloys at atobiadu is sindacados in sa sede de su MISE in Roma e ant presentadu su pianu industriale nou. Ant cunfirmadu investimentos pro 135-140 miliones de èuros (8 miliones a “fondo perduto”, 84 miliones a tassu agevoladu de torrare in 8 annos e 20 miliones postos dae s’Alcoa; a custos s’iat a pòdere assungere unu laminatòiu pagadu deretu dae sa sienda isvìtzera) e iant a dèpere torrare a traballare unos 400 operàios. S’obbiettivu est cussu de prodùsere 150mila tonnelladas a s’annu de allumìniu primàriu e vergellas.

Cenàbara 12: a pustis de sa conca de crabittu imbuddiada cun 2 ballas, sunt aparèssidas 2 iscritas (una in is bagnos de is giardinos pùbblicos e in d-unu muru de una domu in su tzentru) contras a su sìndigu de Igrèsias Emilio Gariazzo. Ddas ant signaladas prontamenti a is Carabineris e a sa Politzia. Una de is iscritas fiat firmadas MAS, Movimento Armato Sardo. No at trigadu a lòmpere sa soliedariedade de totus is esponentes polìticos de su territòriu e de is amministradores locales, e nc’at puru gente meda chi at iscritu in is social network contras a custu tipu de atziones fatas a traetoria.

Is coordinadores de su GAL Sulcis in sa sede de Masainas ant atobiadu is amministradores locales e ant presentadu is cursos de formatzione pro disocupados e ocupados (in totu ddoi at 90 postos) chi ant a tratare de bioedilìtzia, animatzione e progetatzione de s’isvilupu locale, e “green economy”. In su situ internet www.chipartecipaconta.eu si podent agatare totus is informatziones chi serbint pro partetzipare a custos cursos chi sunt de a beru interessantes e utilosos.

Sàbudu 13: in s’istitutu Beccaria de Carbònia ant intregadu is laboratòrios didàticos nous finantziados dae su Piano Sulcis. In is laboratòrios s’ant a fàghere simulatziones de impresas turìsticas e de programmas de cumputer chi serbint a gestire is protzessos de produtzione de ollu, binu, presciutos e casu chi s’Istitutu Beccaria etotu est pro incarrerare in sede distacadas de Santadi e Bidda Massàrgia (in is ex iscolas agràrias).

Domingu 14: est acabadu su girone de andade de is campionados dilettantes de fubalu. In su girone B de Promotzione regionale su Carloforte est a su segundu postu a 3 puntos de sa S.Marco; est trancuillu pròpiu a mesu classìfica su Carbònia. In su girone B de primu categoria sa Monteponi de Igrèsias est arrispetende is pronòsticos: est prima a sola cun 33 puntos, sighint a 3 puntos Samassi e Barùmini, prus atesu s’Atletico de Villaperùciu e Bidda Massargia. In su girone B de sa segundu categoria S’Isola S.Antioco est a sola a su primu postu 3 puntos a innantis de su Cabuterra.

Est acabada puru s’andada de su girone F de su campionadu natzionale de B2 natzionale de Volley. S’Olimpia de Sant’Antiogu no est andende bene: s’agatat a su de 5 ùrtimos postos cun sceti 12 puntos.

A cura di Roberto Pinna