NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
19
Wed, Sep
37 Nuovi articoli

Domingu 16: est acabada cun sa premiazione de is bincidores sa de tres setziones sa de VIII editziones de su Carbònia Film Festival, organizadu dae sa Società Umanitaria cun su Comunu de Carbònia, sa RAS e medas àteros sponsors pùbblicos e privados. Sa manifestazione at tentu unu sucessu mannu de pùbblicu (prus de 5mila ispetadores ant bistu is 20 proietziones fatas in su Cineteatro) e in pratza Roma ant fatu laboratorios, leturas e presentadas de libros in mesu de is istand enogastronòmicos. Invècias in Sant’Antiogu est acabadu sa de II editziones de “Pència, gioga e papa” una manifestazione organizada dae s’Auser chi teniat pro obbietivu sa comunicatzione e sa divulgatzione scentìfica. Pro totu su fine de cida passadu atòbios, laboratòrios pro totus is edades e ospites “ispeciales” ant animadu pratza Italia e su Lungomare.

Lunis 17 Est acabadu su festival Tuttestorie organizadu dae su SBIS in su parcu de Villa Sulcis e in sa Biblioteca Centrale de Carbònia. Giai 2000 pipios e piciocheddos de totu is iscolas de su Sulcis, acumpangiados dae is insignantes insoru, sunt andados a Carbònia, in ue cun su coordinamentu de 7 operadoras de sa coop SCILA e s’agiudu mannu de is istudentes de su Liceu Gramsci-Amaldi e de àteros assòtzios e impresas chi traballant in su setore culturale, ant atobiadu autores e artistas e ant fatu medas laboratòrios de letura, iscritura e de disegnu a pitzus de su tema de su coràgiu.

Martis 18: A parridade de Ignazio Locci, consilieri regionale de Forza Italia, su bandu pro sa gestione de is impiantos isportivos chi at fatu s’Amministratzione de Sant’Antiogu introdusit una lògica imprenditoriale chi at a causare problemas mannos a is assòtzios isportivos. Sigundu Locci s’idea de s’Amministratzione – intregare is impiantos a unu cuncessionàriu circhende de guadàngiare dinari dae is pesones chi ant a pagare is assòtzios isportivos pro ddos oberare – est cosa dannàrgia, proita ca chini at a bìncere su bandu at a crèscere su prètziu pro s’impreu de is impiantos etotu e duncas nc’at s’arriscu chi su bandu andit desertu cunsiderende ca is cunditziones sunt meda proibitivas e duncas at a tocare a ddu cambiare.

Gigi Rubiu, consilieri regionale de s’UDC, cun d-un’interpellàntzia a s’assessore a sa Sanidade Arru at torradu a denunziare totus is criticidades de sa sanidade de su Sulcis, ispieghende pro esèmpiu chi pro una bìsita reumatològica in is istruturas pùbblicas tocat a abetare a su mese de austu 2017. Duncas a parridade de s’esponente centrista, su tempus pro is bìsitas est tropu longu, una via crucis chi no acabat prus pro is fàscias prus dèbiles de sa populatzione chi dònnia die si depent cunfrontare cun sa derrota de sa sanidade in su territòriu.

Mèrcuris 19: su Comunu de Giba at otentu unu reconoscimentu de importu manu in su Forum “Compraverde bio-green” chi s’est fatu in Roma e at bistu sa partecipatzione de 17 istados, 4 delegatziones ministeriales, 110 ospites istràngios e 2.000 operadores (amministratziones pùbblicas e impresas). Totus is chi ant partecipadu a su forum, lòmpidu a sa de X editziones, fiant impegnados in d-unu iscàmbiu de esperièntzias e metodologias in su setore de is acuistos “birdes” e de s’econòmia sustenìbile e ant premiadu is esperièntzias virtuosas. A su Comunu de Giba dd’est tocadu su prèmiu Mensa Verde, sende chi su servìtziu mensa de is iscolas gibaias est assèridu a èssere su mellus pro su chi pertocat sa cualidade de sa cosa de papare e sa ridutzione de is impatos sociales e ambientales .

Giòbia 20: In Casteddu, de fronte a su SAVI in arburada Trieste, sa RSU de s’Euroallumina at fatu su de 8 presìdios in 45 dies. Su SAVI est faende is valutatziones de impatu ambientale a pitzus de su pianu de investimentos - 200 miliones de èuros - fatu dae sa RUSAL. Sa decisione de su Savi iat a dèpere lòmpere su 29 de su mese chi intrat. Sa RSU arricumandat a totus is entes regionales e locales chi sunt coinvòlgidos in sa procedura autorizativa de donare atentzione manna pro chi in sa pròssima cunferèntzia de servìtzios no bessant a pillu àteras arrociallas burocràticas.

A meigama unu grupu de 60 migrantes ospitados in s’ ex albergu de Terrùbia, in comunu de Narcau, giai totus originàrios de su Bangladesh, at incumentzadu una protesta corchende-sì in mesu de s’istrada provinciale 78 chi collegat Narcau a sa SS293. Is migrantes si sunt chesciados proita ca dae 2 meses non sunt donende-ddos su poket-money e pro àteros problemas a sa gestione de s’istrutura. Sa protesta dd’ant acabada faci a is 6 de merie, candu sunt lòmpidos is Carabineris e sa Politzia de Carbònia e ant otentu s’impegnu a risòlvere is problemas de s’istrutura.

Cenàbara 21 Sa Caritas diocesana de Igrèsias, a intrus de su progetu “Iscola de Maduridade” at postu 20 borsas de istùdiu pro is istudentes chi ocannu si sunt immatriculados a s’universidade. Is destinatàrios sunt piciocos e piciocas chi si sunt diplomados in d-un’iscola de sa ex provìncia de Carbònia-Igrèsias chi apant pigadu assumancu 70/100 in su 2016 e chi siant in cunditzione de dificoltade econòmica. Dònnia assegnu tenet su valore de 500 èuros. Sa dimanda si depet bitire a manu, non prus a trigariu de s’8 de donniassantu o a centru de ascurtu diocesanu “Marta e Maria” de Igrèsias in V. della Decima o a s’Interparrochiale “Madonna del Buon Consiglio” in v. Satta 150, su martis dae is 10:00 a is 12:00 o su giòbia dae is 16:00 a is 18:00.

Sàbudu 22: Su sìndigu de Carbònia, Paola Massidda, at iscritu una lìtera aberta is citadinos cun sa cale ddos at cumbida-ddos a lìgere is informos chi s’agatant in su situ istitutzionale de su Comunu (in sa parte dedicada a sa Protetzione Civile) in ue si podent agatare bonas normas de cumportamentu in casu de arriscos dae calamidades naturales. Custos informos ant a èssere imprentados e postos in is iscolas, in ufìtzios comunales e in totus is edifìtzios pùbblicos.

a cura di Roberto Pinna

Sa cida sulcitana in crutzu. Dae s'11 de abrile a su 17 de abrile

Lunis 11 de abrile: Domingu a note ant postu fogu a sa màchina de Mariella Piredda, s'assessora a is polìticas sociales de su comunu de Sant'Antiogu. Issa etotu in Facebook at anuntziadu chi at a sighire a andare a innantis e a traballare pro sa comunidade sua. Luegus a s'assessora est lòmpida sa solidariedade dae totus is polìticos santantioghesos e at ricidu puru sa bìsita de s'assessore regionale a is entes locales Cristiano Erriu.

Sèmpre in Sant'Antiogu est acabada se festa de su patronu de totu sa Sardigna. Cussa chi est finida lunis fiat sa de 657 editziones de festa religiosa prus antiga de totu s'Europa. A is 17:30 s'obispu de Iglèsias monsignor Giovanni Zedda at celebradu sa missa in sa basìlica e a pustis est partida sa processioni cun grupos folk, tracas, sonadores de launeddas chi nde sunt bennidos dae totu s'ìsula.

Martis 12 de abrile: Francesca Ene, sa presidente de s'assòtziu "Io non ho paura, donne contro la violenza" est istètia ammeletzada: in sa màchina sua dd'ant lassada unu billetu in ue ddoe fiat iscritu <<tanto muori>>. A su momentu no at incora presentadu denùntzia.
Su Consìliu de Amministratzione de su Cunsòrtziu Industriale at aprovadu su primu lotu funtzionale pro is traballus pro bonificare e pro afungurare su fundale de fronte a sa banchina est de su portu de Portovesme. Custos traballos, chi in totu tentent valore de unos 16 miliones de èuros, sunt de importu mannu meda pro su benidore de totu su polu industriale sulcitanu.

Mèrcuris 13 de abrile: faci a is 2 de meigama, in Is Pruinis calincunu at atacadu fogu a is matas chi s'agatant intr'e mesu de sa plàgia e s'istrada provinciale chi andat a Capo Sperone. Sunt intervènnidos a lestru is òminnes de sa Forestale e unas cantu iscuadras de volòntarios. Custu fiat su primu fogu de ocannu in s'ìsula de Sant'Antiogu.

Giòbia 14 de abrile: sunt passadas duas chidas dae candu sa Delcomar at incumentzadu su servìtziu de traportu passegeris a Carloforte. Pro imoe is cosas sunt andende bene (fatu bastante istranu candu si chistionat de servìtzios pùbblicos!): is traghetos sighint a fàere is pròpios oràrios e su matessi nùmeru de viàgios, is billetos sunt unu pagu prus baratos, giae totu su personale chi traballaiat cun sa Saremar est istètiu pigadu dae sa Delcomar (ammancat una bintina de marìtimos chi ant a andare luegus in pentzione e pro is àteros nche bollet ancora unu pagu de tempus). S'ispera de totus est chi su servìtziu sigat a funtzionare in su benidore in custa manera.

Cenàbara 15 de abrile: Fabio Usai, su personàgiu polìticu de su momentu in Carbònia, intervistadu dae Giovanni Di Pasquale at ispiegadu cale est sa positzione sua a pitzus de is eletziones comunales imbenientes. Defatis su partidu de SEL non bollet a Usai – òmine chi at tentu longa militàntzia in sa dereta – in is listas chi ant a sustènnere sa candidadura a sìndigu Giuseppe Casti (PD). In pagos faeddos Usai at nadu ca at abbandonadu su PDL proita ca su partidu s'est sciusciadu a pustis de sa crisi de s'ùrtimu guvernu de Berlusconi e duncas dd'est partu mellus a si pigare is responsabilidades suas de fronte a totu sa gente chi dd'at votadu (in su 2011 at pigadu prus de 600 votos). Duncas in custos ùrtimos annos bortas meda at agiuradu sa magiorantza de centru-manca chi at pèrdidu "arrogos" in Consìliu Comunale e preferit a sighire a fàere is cosas in manera crara e de fronte a totus, sena de si cuare e di si propònnere pro guvernare sa citade, sende ca no ddoe sunt àteras alternativas possìbiles.

Sàbudu 16: sighit sa chistione de su Ponte nou chi at a collegare s'ìsula de Sant'Antiogu a sa Sardigna. Defatis su Consìliu Comunale de Sant'Antiogu est cunvocadu in setziada istraordinària a is 4 de merie de martis 19 de abrile pro arresonare a pitzus de su bandu de 67 miliones de èuros publicadu dae s'ANAS.

domingu 17 de abrile: in Carbònia est incumentzada sa de duas editziones de sa Primavera Sulcitana, sa kermesse chi punnat a fàere connoscere su territòriu de su Sulcis-Iglesiente. Custa manifestatzione est organizada dae s'assòtziu Primavera Sulcitana cun su patrocìniu de 19 comunos de s'ex Provìncia de Carbònia-Iglesias prus Teulada. Duncas finas a su 19 de làmpadas, dònnia fine de cida, in totus is comunos chi pigant parte, ddoe ant a èssere espositziones de hobbista e artisanos, s'ant a organizare escursiones in su sartu a pee o in bicicleta, s'ant a podere tastare is màndigos tìpicos de su Sulcis, ascurtare cuncertos e bisitare sitos archeològicos e monumentos.

Altri articoli...